КIэлэегъаджэу, этнограф-ушэтакIоу, тхакIоу Бахъукъо Ерэджыбэ ехьылIагъ
ШIур ыпхъэу щыIагъ
«Лъэпкъым фапшIэрэр кIодыщтэп» ГущыIэжъ
Ар къыгурыIоу, ыгукIи ыпсэкIи зэхишIагъэу, иадыгэ лъэпкъ гъэсэныгъэ-шIэныгъэм фэщэгъэным ыкIи адыгэ тхыгъэ литературэр игупшысэкIэ ыгъэбаиным, егъэджэн-пIуныгъэм гъогу фыхэхыгъэным афэшъыпкъэу щыIагъ Бахъукъо Ерэджыбэ Пщымафэ ыкъор. КъыгъэшIэгъэ илъэс 87-м щыщэу илъэс 60-р ныбжьыкIэ пIуныгъэм, лъэпкъ этнографием икъэухъумэн-кIэугъоен ыкIи адыгабзэм иягъэшIэн, анахьэу адыгэ литературэм ихэгъэхъон, афигъэшъошагъ. Емызэщыжь зэлъашIэрэ кIэлэегъэджагъ.
Ерэджыбэ шышъхьэIум и
20-м, 1922-рэ илъэсым Красногвардейскэ районым ит къуаджэу Джамбэчые къыщыхъугъ. 1941-рэ илъэсым Адыгэ кIэлэегъэджэ техникумыр, 1952-рэ илъэсым Мыекъопэ кIэлэегъэджэ институтым литературэмкIэ икъутамэ, 1956-рэ илъэсым Краснодар кIэлэегъэджэ институтым филологиемкIэ ифакультет къыухыгъэх.
1940 — 1961-рэ илъэсхэм Еджэркъое гурыт еджапIэм идиректорыгъ, етIанэ икъуаджэ къыгъэзэжьи, Джамбэчые гурыт еджапIэм икIэлэегъаджэу ыкIи изавучэу Iоф ышIагъ. Егъэджэным готэу Бахъукъом къуаджэм тарихъ-этнографическэ музей гъэшIэгъон щызэхищэныр фэлъэкIыгъ, ащ идиректорыгъ, кIэлэегъэджэ IофшIэным иветераныгъ, илъэпкъ фэгумэкIэу, фэзафэу, фэхьалэлэу щыIагъ. ИгъашIэ гъэсэныгъэ-пIуныгъэм, лIэужхэр гъогу зафэ тещэгъэнхэм сыдигъуи фэгъэзэгъагъ, лъэуж дахэ къыгъэнагъ.
Джамбэчые итарихъ-этнографическэ музей
ИкIыгъэ я ХХ-рэ лIэшIэгъум ия 80-рэ илъэсхэм акIэм, IофшIэныр Адыгэ хэку музеим щезгъэжьэгъакIэу, лIым апэрэу нэIуасэ сыфэхъугъагъ.
ИгъэпсыкIэ-шIыкIэкIи, иIокIэ-шIыкIэкIи Бахъукъо Ерэджыбэ иадыгэ лъэпкъкIэ гумэкI-гукIэгъушхо зэрэхэлъыр, лъэпкъым фишIэщтымкIэ къогъанэ зэримыIэр къыхэщыщтыгъ. Ащ имузей лъэпкъ Iэпэщысэу, пкъыгъо зэфэшъхьафэу, тхыгъэ гъэшIэгъоныбэу адыгэм ищыIэкIэ-псэукIагъэр пасэм къыщыублагъэу джырэ уахътэмкIэ кIэкIыжьэу къаIуатэу чIэлъыгъэр бэдэдагъ. Ахэр IэпкIэ-лъапкIэу зэгъэзэфэгъагъэх; музей дэпкъхэм экспонатхэр, ахэм япхыгъэ хъугъэ-шIагъэхэм, пкъыгъохэр зиIэгъэ цIыфхэм яхьылIэгъэхэ тхыгъэ зэгъэкIугъэхэр атеплъагъощтыгъэх.
Къоджэ музеимкIэ бгъэшIагъо икъоу угъоигъабэ чIэлъыгъ; ахэм зэкIэлъыкIокIэ-зэхэугуфыкIыгъэр ахэлъэу экспозициехэри гъэпсыгъагъэх. Бахъукъо Ерэджыбэ егъэджэным кIыгъоу лъэпкъ мэхьанэ зиIэ музеим изэхэщэн Iоф ыуж ихьэгъагъ, ыгукIэ шIоигъуагъэти, къыдэхъугъ имурад. Ащ имузей, тэ, Адыгэ хэку музеим инаучнэ IофышIэхэми, куп тыхъоу тыкIощтыгъ, ылъапсэ гъэпытэгъэнымкIэ тишIуагъэ едгъэкIыщтыгъ; ежьыри, ищыкIагъэ зыхъукIэ, къежьэти, Мыекъуапэ Адыгэ хэку музеим къакIощтыгъ; экспонатыкIэ горэ иIэ хъугъэмэ е зы ижъырэ тхыдэ-къэбарыжъ горэ ытхыжьыгъэмэ, къытфиIуатэщтыгъ, ымышIэрэм (ышIэрэр багъэми), Iушыти, кIэупчIэныр ишэныгъ, илъэпкъ шIур филэжьэу щыIагъ.
Бахъукъо Ерэджыбэ фэдэу гуетыныгъэшхо зыхэлъ патриот-энтузиастхэр арых адыгэ культурэр, адыгэ шIэныгъэр лъэгъо гъэнэфагъэ тещэгъэнхэм, ахэм хахъо афэшIыгъэным мыпшъыжьэу дэлэжьагъэхэр. Джары лIым ыцIэ непэрэ мафэми епIоныр, ишIушIагъэ игугъу пшIыныр, лIэужхэм афиIотыкIыгъэныр ищыкIагъэ зышIырэр.
Ерэджыбэ итарихъ-этнографическэ музей къуаджэу Джамбэчые дэсхэр анахь зэрыгушхохэрэ гупч, ар лъэпкъым итхыдэ, итарихъ анап.
ЫпшъэкIэ къызэрэщысIуагъэу, Бахъукъор кIэлэегъэджагъ. Адыгабзэр, адыгэ литературэр аригъашIэщтыгъэх, ахэр агукIэ ныбжьыкIэхэм якIасэ зэришIыщтым сыдигъуи ынаIэ тетыгъ. Урокыр ытымэ ригъэкъоу иунэгъо Iоф пыуцожьырэмэ ащыщыгъэп, Ерэджыбэ имафэхэр къоджэ еджапIэм щигъакIощтыгъэх, джарэу егъэджэнми, музей Iофми зэлъаIыгъыгъ. Ригъэджагъэхэм ащыщхэм адыгабзэр, литературэр къыхэзыхыгъэхэр бэу ахэтых; нэмыкI сэнэхьатхэр яIэхэми, якIэлэегъэджэ инэу Ерэджыбэ ипсэлъэ-гупшысэ къаготэу щыIэныгъэм ягъогу щыпхыращыгъ. Ары, шIоу ыпхъырэр зэрэшъхьалъэрэр ылъэгъугъ ежь кIэлэегъаджэми, ащ кIуачIэ къыхилъхьэщтыгъ.
Егъэджэн тхылъхэм яавтор
Егъэджэн-пIуныгъэ IофшIэным фэIэпэIэсэ кIэлэегъаджэм тхылъхэри зэхэгъэуцогъэнхэм Iоф дишIагъ. Е. П. Бахъукъор «Я 5 — 6-рэ классхэм апае литературэмкIэ тхылъхэм» язэхэгъэуцон хэлэжьагъ. Джащ фэдэу «Урокым хэмыхьэрэ литературэ еджэнымкIэ тхы-лъыр я 6-рэ классым пае», «Я 4 — 10-рэ классхэм литературэмкIэ зэребгъэджэщтхэмкIэ тхылъыр» зэхигъэуцуагъэх. «Литературоведческэ терминхэмкIэ гущыIалъэр» (гъусэ иIэу) ыкIи нэмыкI методикэ тхылъхэм адыгэ литературэмкIэ яавтор, гъусэ иIэуи Iоф адишIагъ, адыгабзэкIэ къыдэкIыгъэх.
ТхэкIуагъэ ыкIи къыхиутыщтыгъэх
Ытхыхэрэр 1965-рэ илъэсым къыщегъэжьагъэу къыхиутыщтыгъэх. ТхакIом адыгабзэкIэ къыдигъэкIыгъэх: «Гъогууан» («Долгий путь», 1970), «Лъэужхэр гъэхъунэм зэпырэкIых» («Следы пересекают поляну», 1978), «ЛъышIэжьхэр» («Мстители», 1985), «Тэтэркон» («Перекати-поле», 1985), «Янэрэ ыпхъурэ» («Мать и дочь», 1997), «ЛъэгъуакIэр пхырыщыгъошIоп» («Нелегко быть первопроходцем», 1997), «Къангъэбылъ» («Игра в жмурки», 2020), романэу «Лъэтегъэуцу» («Становление», 1994), 2006-рэ илъэсым тхакIом прозэкIэ тхыгъэу, роман, повесть, рассказхэр дэтхэу «ЦIыфыгъэм екIурэ гъогур» («Стать человеком») зыфиIорэ тхылъыр къыдигъэкIыгъ.
2007-рэ илъэсым тарихъ романэу «Болэтыкъо Джамболэт» («Джамбулат Болотоков»), 2008-рэ илъэсым тхылъэу «Джамбэчый» къыдигъэкIыгъэх.
КIэлэегъаджэу, ушэтакIоу, гупшысакIоу, тхакIоу Бахъукъо Ерэджыбэ шIур ыпхъэу игъашIэ къыгъэшIагъ, илъэпкъ гъунэнчъэу илъэпIагъ.
Зэошхом хэлэжьагъ
Бахъукъо Ерэджыбэ Пщымафэ ыкъор Хэгъэгу зэошхом хэлэжьагъ, къэралыгъо тын лъапIэхэу Щытхъум иорденэу я III-рэ шъуашэ ыкIи Хэгъэгу зэошхом иорденэу апэрэ шъуашэ зиIэхэр къыфагъэшъошагъэх.
Е. Бахъукъор АР-м культурэмкIэ изаслуженнэ IофышIагъ, Урысыем итхакIохэм я Союз 2000-рэ илъэсым къыщегъэжьагъэу хэтыгъ.
ЛъэгъошIу пхырищыгъ
УицIыфыгъэ напэ кIэбгъэтхъэу, лъэпкъым, Хэгъэгум, цIыфхэм уафэшъыпкъэу ущыIэныр насыпыгъ. Джащ фэдэ лъэгъошIу тетыгъ ыкIи пхырищыгъ щыIэныгъэм Ерэджыбэ. ЦIыф гъашIэм зэрилъэкIэу ыцIэ щигъэпытагъ: кIэлэегъэджагъ, Хэгъэгум иухъумэкIуагъ, ушэтэкIо-этнографыгъ, тхэкIуагъэ.
Унэгъо гупсэф дахи иIагъ, ыпхъухэр ыкIи ыкъо ыпIугъэх, ылэжьыгъэх; ахэр еджагъэх, гъэсагъэх, къалъфыжьыгъэхэр непэрэ мэфакIэм ыпчэгу хьалэлэу, зафэу итых. Арышъ, шIур кIодырэп, ар лэжьыгъэ пхъыгъэу гъашIэм къыщэтIэмыжьы.
Адыгэ лъэпкъым къыхэкIыгъэ цIыф Iушмэ, лIышIумэ ащыщыгъ Бахъукъо Ерэджыбэ, игъашIэ шIагъэкIэ бай, ыцIэ епIоныр, ягъэшIэгъэныр тефэ, къылэжьыгъ.
Мамырыкъо Нуриет.