Лъэпкъ зэхэщакIу
Урысыем итеатральнэ марафон 2019-рэ илъэсым щылэ мазэм и 19-м рагъэжьагъ. Театрэм и Илъэсэу хэгъэгум щыкIорэм иIофыгъо инхэм ар зэу ащыщ.
Адыгэ Республикэм итеатрэхэр марафоным хэлажьэх. Урыс театрэу А. Пушкиным, Камернэ музыкальнэ театрэу А. Хьанэхъум ацIэхэр зыхьыхэрэр, республикэм и Къэралыгъо филармоние щызэхащэгъэ нысхъапэхэм ятеатрэу «Дышъэ къошыныр», Адыгеим и Лъэпкъ театрэу И. Цэим ыцIэ зыхьырэр джырэблагъэ Астрахань щыIагъэх.
— Владивосток марафоным иапэрэ зэхахьэ щыкIуагъ, — къеIуатэ Лъэпкъ театрэу И. Цэим ыцIэ зыхьырэм ихудожественнэ пащэу ХьакIэгъогъу Къэсэй. —Федеральнэ шъолъырхэу Сыбыр, Урал, Гупчэм, нэмыкIхэм марафоныр ащылъагъэкIотагъ.
— Къыблэм зэрэщыкIощтым тыщыбгъэгъуазэ тшIоигъу.
— ШышъхьэIум и 30-м марафоным илъэмыдж Астрахань щагъэпытагъ, — зэдэгущыIэгъур лъегъэкIуатэ Лъэпкъ театрэм ихудожественнэ пащэ игуадзэу, режиссер шъхьаIэу Исуп Тимур. — Урысыем и Правительствэ и Тхьаматэу Дмитрий Медведевыр, ащ игуадзэхэр, Урысыем культурэмкIэ иминистрэу Владимир Мединскэр, Къыблэм ишъолъырхэм яминистрэхэр, нэмыкIхэри зэхахьэм хэлэжьагъэх.
— Адыгэ Республикэм культурэмкIэ иминистрэу Аулъэ Юрэ къытиIуагъ Астрахань щыкIогъэ зэхахьэр гум къинэжьынэу, цIыфмэ ашIогъэшIэгъонэу зэрагъэпсыгъэр.
— Шъолъырхэм ятворческэ купхэм, артистхэм ясэнаущыгъэ Астрахань къыщагъэлъэгъуагъ. Лъэпкъхэм яискусствэ хэхъоныгъэ зэришIырэр пащэхэм къыхагъэщыгъ. Едзыгъо пэпчъ гупшысэ хэхыгъэхэр уигъэшIыщтыгъэх.
— Адыгэ Республикэм итеатрэхэм, артистхэм къатегущыIэба.
— Тэхъутэмыкъое районым иансамблэу «Уджым», Камернэ музыкальнэ театрэм иактрисэу Ирина Кириченкэм, Лъэпкъ театрэм иартисткэхэу Уайкъокъо Асыет, Къэбэхь Евгение, Ордэн Фатимэ, нэмыкIхэм орэдхэр къаIуагъэх, театральнэ пычыгъохэр къагъэлъэгъуагъэх.
— Олимпиадэ джэгунхэм ямэшIоустхъу фэдэу ашIыгъэ нэпэеплъ тамыгъэ кIэракIэр марафоным хэлажьэхэрэм зэIэпахы.
— Астрахань тыщыIэу Дмитрий Медведевыр Урысыем и Президент, Правительствэм ацIэкIэ зэхахьэм къыщыгущыIагъ, марафоным щызэIэпахырэ нэпэеплъ тамыгъэр хэкум ипащэхэм къаритыгъ.
— Марафоныр Къыблэм зэрэщыкIощтыр гъэнэфагъэу щыта?
— Къалэхэри, мафэхэри зэхэщакIохэм агъэнэфагъэх, — къеIуатэ ХьакIэгъогъу Къэсэй. — ШышъхьэIум и 30-м Астрахань апэрэ зэIукIэр щыкIуагъ. Iоны-гъом и 8-м Краснодар, и 10-м Волгоград, и 13-м Симферополь, и 16-м Севастополь, и 19-м Ростов-на-Дону, и 22-м Элиста, и 24-м Мыекъуапэ марафоным иедзыгъохэр ащызэхащэщтых.
— Мыекъуапэ кIэух зэхахьэр щыкIоныр къызхэкIыгъэр гъэзетеджэхэм, театрэм пыщагъэхэм ашIогъэшIэгъонэу тэлъытэ.
— Тэри ар тшIогъэшIэгъон. Театрэм и Илъэс Урысыем щэкIо. Хэгъэгум культурэмкIэ и Министерствэ, театрэм иосэшIхэр пэшIорыгъэшъ къэгъэлъэгъонхэм яплъыгъэх, спектаклэ анахь дэгъухэр къыхагъэщыгъэх. Адыгэ-Абхъаз театрэхэм я Дунэе фестивалэу Мыекъуапэ щыкIуагъэм осэшхо фашIыгъ, Лъэпкъ театрэу Цэй Ибрахьимэ ыцIэ зыхьырэм испектаклэу «Кавказский меловой кругыр» зэхэщакIохэм къыхагъэщыгъ.
Бзи 4-кIэ къагъэлъэгъощт
— «Кавказский меловой кругыр» лъэпкъ шIэжьым, гукIэгъум афэгъэхьыгъ. Бзэ зэфэшъхьафхэмкIэ артистхэм ярольхэр къызэрашIыхэрэм мэхьанэу ептырэр къытаIоба.
— Грознэм тызыкIокIэ урысыбзэкIэ, адыгабзэкIэ, абхъазыбзэкIэ ыкIи чэчэныбзэкIэ къэгъэлъэгъоныр къэтшIыщт. Театрэм лъэпкъхэр зэрэзэфищэхэрэр, шIэжьым гупшысэ шъхьаIэу хэлъыр лъэпкъ пэпчъ игуузэу зэрэщытыр къыхэтэгъэщых. Бзэ зимыIэр лъэпкъ шъхьафэу щыIэн зэримылъэкIыщтыр, уилыуз уиныдэлъфыбзэкIэ къызыпIокIэ цIыфхэм нахьышIоу уалъыIэсын зэрэплъэкIырэр, щыIэныгъэм инэмыкIырэ лъэныкъохэр къэтэгъэлъагъох.
Имэхьанэ хэхъо
— Къэсэй, Урысыем и Президентэу Владимир Путиным иунашъокIэ театрэм и Илъэс хэгъэгум зэрэщыкIорэм гупшысэ шъхьаIэу уигъэшIыгъэр тизэдэгущыIэгъу къыщыхэгъэщба.
— Хэгъэгум итеатрэхэм яIофшIагъэ зэфэтэхьысыжьы, щысэшIухэр къыхэтэгъэщых. Театрэм и Илъэс ипычыгъохэм ахэтэлъытэ марафоныр. Театрэм иолимпиадэхэр, кIэлэцIыкIухэмрэ театрэмрэ яхьылIагъэхэр, нэмыкIхэри хэгъэгум щэкIох. Iофтхьэбзэ 2600-м нахьыбэ зэхащэщт. Социальнэ-культурнэ мэхьанэу театрэм и Илъэс иIэр къыдэтлъытэзэ, мэкъэгъэIу Iофыгъохэр зэхэтэщэх. Гъэзетхэм, телевидением, радиом зэпхыныгъэу адытиIэр щыIэныгъэм диштэу тэгъэпсы.
— Хэгъэгум итеатрэхэм яIофышIэхэм я Союз ипащэу, Урысыем инароднэ артистэу Александр Калягиным театрэм и Илъэс фэгъэхьыгъэ Iофтхьабзэхэм къариIолIагъэр гъэзетхэм къыхаутыгъ. Фестивалэу «Федерацием» нахь игъэкIотыгъэу укъытегущыIэнэу тыфай.
— Урысыем илъэпкъ театрэхэм яфестивалэу «Федерациер» хэушъхьафыкIыгъэу хэгъэгум щэкIо. Лъэпкъ театрэхэм хэхъоныгъэ ашIыным, яныдэлъфыбзэ лъэпкъхэм къаухъумэным афэшI фестивалыр зэхэщакIохэм лъагъэкIотэщт.
— Бзэм изэгъэшIэн, игъэфедэн театрэр фэлажьэ. АдыгабзэкIэ къэжъугъэлъэгъощтхэм тигъэзетеджэхэр къакIэупчIэх.
— БлэкIыгъэ илъэсым елъытыгъэмэ, адыгабзэкIэ къэдгъэлъэгъощтыр пчъагъэмкIэ нахьыб. «Сомэ мин 600» «Дэхэбаринэ ихьакIэщ», «КъокIас», «Ощхым ор еукъэбзыжьы», «Кавказский меловой круг» зыфиIохэрэр, нэмыкIхэри тирепертуар хэтых.
— КIэу жъугъэуцущтхэр…
— Тхыдэжъэу «Нартхэм ябгырыпхыр» кIэлэцIыкIухэм апай, «ШIулъэгъу къашъохэр» Нэгъой Инвер ыкIи Шъхьэтум Андзаур агъэуцух. Къэбэртэе-Бэлъкъа- рым идраматург цIэрыIоу IутIыжъ Борисэ ипьесэ адыгабзэкIэ Хьакъунэ Заремэ зэридзэкIыгъ. «Тэмэ лый» зыфиIорэ комедиер Исуп Тимур сигъусэу театрэм щыдгъэуцущт.
— Хэбзэ къулыкъушIэхэмрэ театрэмрэ Iоф зэрэзэдашIэрэм тапэкIи тытегущыIэщт. Непэ сыда ащ епхыгъэу къытэпIощтыр?
— Республикэм и ЛIышъхьэу КъумпIыл Мурат, культурэмкIэ министрэу Аулъэ Юрэ Правительствэм тырагъэблагъи, хэушъхьафыкIыгъэу тиIофыгъохэм татегущыIагъ. Артист цIэрыIохэр, ныбжьыкIэхэр, режиссерхэр тиIэх. Пресс-къулыкъум ипащэу Наталья Петренкэр дгъэнэфагъэ. ЛIэужхэм театрэм ылъапсэ зэдагъэпытэ. Iоныгъом и 6-м «ГъашIэм имэзищ» къэдгъэлъэгъощт, илъэс IофшIэгъур тыублэщт. Марафоным изэIэпахырэ тамыгъэ Iоныгъом и 26-м Владикавказ щяттыжыщт, тикъэгъэлъэгъонхэр Темыр Кавказым щыкIощтых.
— Шъуигухэлъхэр къыжъудэхъунхэу шъуфэтэIо.
— Тхьауегъэпсэу.
ЕмтIылъ Нурбый.
Сурэтхэм арытхэр: ХьакIэгъогъу Къэсэй, Наталья Петренкэр, Исуп Тимур; Астра- хань щыкIогъэ зэхахьэм хэлэжьагъэхэр.