И 13-м къызэIуахы
Адыгэ Республикэм и Камернэ музыкальнэ театрэу Хьанэхъу Адамэ ыцIэ зыхьырэм илъэсыкIэ IофшIэгъур Iоныгъом и 13-м ригъэжьэщт.
— «Опереттэр сишIулъэгъу» зыфиIорэ къэгъэлъэгъонымкIэ илъэс IофшIэгъур тыублэщт, — къытиIуагъ Камернэ музыкальнэ театрэу А. Хьанэхъум ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — Опереттэр цIыфхэм ашIогъэшIэгъон. Искусствэм ыбзэ гурыIогъошIоу зэрэщытыр зэхахьэм къыщыдгъэлъэгъощт.
Галина Лодяновам ытхыгъэм техыгъэхэу классикэм хэхьагъэхэ произведениехэр зэхахьэм къыщаIощтых. И. Кальман, И. Штраус, Ф. Лоу, Ж. Оффенбах, фэшъхьафхэм яопереттэхэм къахахыгъэхэ ариехэр артистхэм къаIощтых, къашъохэр къагъэлъэгъощтых. Опереттэр музыкальнэ жанрэм щагъэлъапIэ, сэмэркъэу зыхэлъ едзыгъохэр театрэр зышIогъэшIэгъонхэм псынкIэу къагурэIо.
Камернэ музыкальнэ театрэм шэнышIу зэрэфэхъугъэу, Iоныгъо мазэм и 13-м пчыхьэзэхахьэу щыIэщтыр рагъэжьэным ыпэкIэ зэнэкъокъухэр яIэщтых. Культурэм, искусствэм афэгъэхьыгъэхэ упчIэхэр зэхэщакIохэм къатыщтых, джэуапхэр анахь дэгъоу къэзытыжьыхэрэм шIухьафтынхэр афашIыщтых. Театрэм и Илъэс Камернэ музыкальнэ театрэм IофшIэн дэгъухэмкIэ хигъэунэфыкIыщт.
Сурэтхэм арыхэр: Камернэ музыкальнэ театрэм иартистхэр.