Лъэпкъ шIэжьыр къебэкIы
КъокIыпIэм щыпсэухэрэ лъэпкъхэм искусствэхэмкIэ я Къэралыгъо музееу Мыекъуапэ дэтым Чэчэным исурэтышI цIэрыIоу Саид Бицираевым иIофшIагъэ фэгъэхьыгъэ къэгъэлъэгъоныр къыщызэIуахыгъ.
Живописыр нахь шIогъэшIэгъонэу чэчэн лъэпкъым игушъхьэ культурэ, итарихъ С. Бицираевым сурэтхэмкIэ къыреIотыкIы. Нэжъ-Iужъхэр гущыIэгъу зэрэзэфэхъугъэхэр, натрыфыр зэрэ- Iуахыжьырэр, фэIо-фашIэхэм ягъэцэкIэн, нэмыкIхэм яхьылIэгъэ сурэтхэр лъэпкъ шIэжьым епхыгъэх.
ИIофшIагъэ анахьэу къыщыхигъэщырэмэ ащыщых кIэлэцIыкIугъор, 1994 — 1996-рэ илъэсхэм Чэчэным щыкIогъэ заор, мамыр псэукIэр. Испанием, Грецием, Италием, нэмыкI къэралыгъохэм сурэтышIыр ащыIагъ. Дунаим къыщилъэгъугъэр исурэтхэмкIэ цIыфмэ алъигъэIэсыным пылъ.
1954-рэ илъэсым Киргизием икъалэу Фрунзе Саид Бицираевыр къыщыхъугъ. Илъэсищым итэу иIахьылхэм Чэчэным къагъэзэжьыгъ. ЖивописымкIэ, скульптурэмкIэ, архитектурэмкIэ апшъэрэ еджапIэу И. Е. Репиным ыцIэ зыхьырэр, нэмыкI еджапIэхэр къыухыгъэх. Урысыем изаслуженнэ сурэтышI, Чэчэным инароднэ сурэтышI, Санкт-Петербург исурэтышIхэм я Союз хэт, а къалэм дэт Къэралыгъо художественнэ-промышленнэ академиеу А. А. Штиглиц ыцIэ зыхьырэм ипрофессор.
Къэгъэлъэгъоным икъызэIухын фэгъэхьыгъэ зэхахьэм къыщыгущыIагъэх музеим ипащэ игуадзэхэу ТхьакIущынэ Арсен, Сулейманова Фатимэ, зэлъашIэрэ сурэтышIэу, архитекторэу Бырсыр Абдулахь, Адыгэ Республикэм исурэтышIхэм я Союз итхьаматэу Елена Абакумовар, Чэчэным и Лъэпкъ музей иIофышIэу Элиса Гелагаевар.
— Мыекъуапэ къыщыдгъэлъагъохэрэ сурэтхэр Саид Бицираевым тимузей къыритыгъэх, — къытиIуагъ Элиса Гелагаевам. — Адыгэ Республикэм икъэлэ шъхьаIэ сыкъэкIуагъэу сурэтышI цIэрыIом иIофшIагъэ икъэгъэлъэгъон сызэрэхэлажьэрэм гушIуагъо хэсэгъуатэ. Искусствэр зышIогъэшIэгъон нэбгырабэ зэIукIэм къэкIуагъ, упчIэу къысатыхэрэр сэри сшIогъэшIэгъоных. ЩыIэныгъэр
куоу къызэлъиубытызэ Саид Бицираевым сурэтхэр зэришIыхэрэр цIыфхэм ягуап. Хъуажъ Рэмэзанэ, Эдуард Овчаренкэр, СтIашъу Юрэ, нэмыкI сурэтышI цIэрыIохэр къэгъэлъэгъоным еплъыгъэх. Чъэпыогъум и 1-м нэс музеим сурэтхэр къыщагъэлъэгъощтых.
ЕмтIылъ Нурбый.