Театрэм и Илъэс Урысыем щэкIо. Къэгъэлъэгъонхэм язэхэщэн шIыкIэшIухэр къы­фэгъотыгъэныр Iофыгъо шъхьаIэхэм ащыщ.

Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм Iоныгъо мазэм и 3 – 10-м комедием итхьамафэ щырекIокIыщт.

— Урысыемрэ Адыгеимрэ культурэмкIэ яминистерствэхэр, Урысыем итеатрэхэм яIофышIэхэм я Союз икъутамэу Адыгэ Респуб­ликэм щыIэр, Адыгэ Республикэм и Лъэпкъ театрэу Цэй Ибрахьимэ ыцIэ зыхьырэр, театрэр зышIогъэ­шIэгъонхэр гъусэ зэфэхъухи, «Ко­медием итхьа­-маф» зыфиIорэр зэхащагъ, — къытиIуагъ Лъэпкъ театрэм иху­дожественнэ пащэу ХьакIэ­гъо­гъу Къэсэй. — Спектакли 3 къэд­гъэлъэгъощт. Илъэс IофшIэгъур зедгъажьэкIэ, нэмыкI темэхэм яхьылIагъэхэ къэгъэлъэгъонхэр Мыекъуапэ, республикэм ирайон гупчэхэм, къуаджэхэм ащяплъыщтых.

«Ощхым ор еукъэбзыжьы»

Урысыем изаслуженнэ арти­стэу, Адыгеим инароднэ артистэу, тхакIоу, драматургэу Мурэтэ Чэпай ипьесэу «IэнатIэм игъэр­хэр» зыфиIорэм техыгъэу режиссерэу Нэгъой Инвер спектаклэу «Ощхым ор еукъэбзыжьы» ыгъэ­уцугъ. Су­рэтышIыр – Р. Сихъу, щыгъынхэмкIэ сурэтышIыр – Л. Даур.

Ущытхъунэу, «изекIокIэ-шIыкIэхэр тэрэзых, сыгу рехьых» епIолIэнэу зы нэбгыри ахэтэп. Артистхэм къашIырэ рольхэр арэущтэу гъэпсыгъэх. Гоголым и «Ревизор» фэдэу драматургым адыгэ пьесэр ытхыгъ. ГъэшIэгъо­ныр къэгъэлъэгъоныр щыIэныгъэм къыхэхыгъэу зэрэщытыр, рольхэмкIэ цIыф хэхыгъэхэр къэп­шIэжьынхэу спектаклэр зэрэгъэ­псыгъэр ары.

Ч. Муратэр дунаим псаоу тетыгъэмэ, мыгъэ ыныбжь илъэс 80 хъущтыгъэ. Артист, драматург цIэрыIом иIофшIагъэ тэгъэлъапIэ. Мыхъо-мышIагъэхэр зезыхьэхэрэр зэриумысхэрэр, IэнатIэм кIэлъэ­Iухэзэ зекIокIэ дэйхэр къызыха­фэхэрэр театрэм щытлъэгъущтых.

«ГъашIэм имэзищ»

Лъэпкъ драматургием иклассикэу Мамый Ерэджыбэ ытхыгъэ «Псэлъыхъохэр», «Дэхэбаринэ ихьакIэщ», «Привет, Мыхьамчэрыекъор!», фэшъхьафхэри лъэпкъ театральнэ искусствэм пытэу хэуцуагъэх.

«ГъашIэм имэзищыр» режиссерэу Хьакъуй Аслъан ыгъэуцугъ. СурэтышIыр — Р. Сихъу, щы­гъынхэмкIэ сурэтышIыр – Р. Iэшъ­хьэмаф. Спектаклэр Iоныгъо мазэм и 6-м республикэ театрэм къыщагъэлъэгъощт.

Мэзищ нахь умыгъэшIэжьыщтэу къызыуаIокIэ сыда пшIэщтыр? Къэбарыр зэхэзыхыгъэхэм сыда къыуаIорэр?

Роль шъхьаIэр артистэу Болэкъо Адамэ къешIы. Къэгъэлъэгъоным хэлажьэх артистхэу Джолэкъо Рэщыдэ, Хьакъуй Андзаур, Даур Жаннэ, КIэмэщ Разыет.

Къэгъэлъэгъоныр цIыф зэфыщытыкIэхэм яхьылIагъ, щыIэны­гъэм илъэныкъо зэфэшъхьафхэм гукIэ уяплъыныр нахьышIоу зэрэщытыр драматургым къыхегъэщы.

«Гум зэрихьэрэ шъэф»

Г. Хугаевым ипьесэ Нэгъой Инвер зэридзэкIыжьыгъ, тиныдэлъфыбзэкIэ къагъэлъагъо. Режиссерыр – И. Нэгъой, сурэтышIыр – С. Ловченко, щыгъынхэмкIэ сурэтышIыр – Л. Даур.

Артистхэу КIыкI Юрэ, Зыхьэ Мэлайчэт, Кушъу Светланэ, Ацумыжъ Нурбый, ХьатхьакIумэ Аскэрбый, Къэбэхьэ Анзор рольхэр къашIых. ШIулъэгъум, ныбджэгъуныгъэм, заор зыпэкIэкIыгъэ ветеранхэм, гугъэр чIэзымынэ­хэрэм къэгъэлъэгъоныр афэгъэ­хьыгъ.

Театрэм и Илъэс IофшIэгъэ дэгъухэмкIэ республикэм щыхагъэунэфыкIы. Адыгабзэм изэгъэшIэн, игъэфедэн Лъэпкъ театрэр чанэу зэрэхэлажьэрэр спектак­лэхэм ащытлъэгъущт.