КъумпIыл Къадырбэч къызыхъугъэр илъэс 85-рэ хъугъэ
«ЦIыфэу ущыIэным къикIырэр…»
Лъэпкъ художественнэ псалъэм гъэхъэгъэ гъэнэфагъэ щызышIыгъэ КъумпIыл Къадырбэч шышъхьэIу мазэм ыкIэм Улапэ къыщыхъугъ, щапIугъ. Апэрэ хьарыфхэр зыщызэригъэшIагъэри, иапэрэ усэ сатырхэр зыщитхыгъэри икъоджэ гупс ары. Мыры щысэтехыпIэ фэхъугъэ орэдыжъхэр, жэрыIо усэхэр апэу зыщызэхихыгъэри опсэуфэкIэ гуIэтныгъэ ин къыритэу игъусагъэри.
УсакIом итворчествэ уасэ фэзышIырэ шIэныгъэлэжьхэмрэ тхакIохэмрэ зэгупшысэхэрэр ащ къэкIуапIэ фэхъугъэр ары. Ар къыбгурыIонэуи щыт, сыда пIомэ поэтым иапэрэ тхылъэу 1964-рэ илъэсым Адыгэ тхылъ тедзапIэм къыдигъэкIыгъэм шъхьэу фишIыгъэр «ПсынэкIэчъ». Ащ имэхьанэ гурыIогъуаеп: мэзым ичIыпIэ Iудзыгъэ, чIыпIэ рэхьат горэм мэкъэшхуи пымыIукIэу, Iушъашъэу, гъогу бырсырхэми апэчыжьэу псынэкIэчъ цIыкIу хэт. Ар зыдэщыIэр зымышIэрэ- мэ уарихьылIэнкIи хъун, ау ар цIыфхэм ящыкIагъ, ар дунаим ищыкIагъ, сыда пIомэ ар ти Дунэешхо изы Iахьэу щыт. Джащ фэдэу гъэпсыгъэ КъумпIылым ипоэзие. Мы тхылъыр ары щыIэныгъэм ипсынэкIэчъышхо къыгъоти, нэужым тенджыз псышхом фэдэу итворчествэ зыщызыушъомбгъугъэр. Ахэр зэфэшъхьаф шIыкIэхэу ащ итворчествэ къыщылъэгъуагъэх — зэм философие зэфэхьысыжьхэмкIэ, зэм — гузэхэшIэ куухэмкIэ, тарихъ екIолIэкIэ-шапхъэхэмкIэ.
«Бэрэтэрэ Хьамидэрэ МэщбэшIэ Исхьакърэ афэдэу, я 60-рэ илъэсхэм къащегъэжьагъэу адыгэ стихым «ыпсэ» аIэ къырагъэхьагъэу, философие гупшысэхэмкIэ, лъэхъанымрэ цIыфым игумэкIхэмрэ афэгъэхьыгъэ зэфэхьысыжьхэмкIэ ар «аушъэу» езыгъэжьэгъагъэхэм усакIоу КъумпIыл Къадырбэчи ащыщыгъ. ШъыпкъэмкIэ, щыIэкIакIэм ехьылIэгъэ гущыIэхэри ащ иусэхэм къахэбгъотэн плъэкIыщтыгъ, ау «лъэшэу, теубытагъэкIэ» къэIогъэ гущыIэхэу ащ лъыпытэу нэм къыкIидзэхэрэр ащ икIэсагъэхэп, — етхы шIэныгъэлэжьэу Цуамыкъо Тыркубый. — А лъэхъаным поэзием щагъэфедэщтыгъэ шIыкIэ-амалхэм ачIыпIэкIэ ежь ыгъэфедэщтыгъэр ышъхьэкIэ «ыгъэпсыгъэ» поэтическэ, художественнэ дунаир ары. НахьыбэрэмкIэ ащ итворчествэ зэпхыгъагъэр, къыгъэлъагъощтыгъэхэр цIыфыр къэзыуцухьэрэ дунаир, чIыопсыр, псыхъохэр, шъофыр, къушъхьэхэр, нэмыкIхэр ары».
Къызщыхъугъэ чIыпIэр, къуаджэр, къызхэхъухьэгъэ чIыопсыр — зэкIэ ахэр поэтымкIэ дунай псау ыкIи илирикэ ин игупчэ итых. Къызэрыхъухьэгъэ-зыщапIугъэ унэм ипчъэшъхьаIу къыщежьагъ ащ шIулъэгъушхоу и Хэгъэгу ыкIи зэкIэ дунаим афыриIэр. Икъуаджэ и Лэбэ мэз шхъуантIэу нэр пIэпызыхырэмрэ ихэгъошъхьаIу Iут ижъырэ Iуашъхьэмрэ и Хэгъэгушхо иобраз шIагъоу ишIэжь къыхэнэх. Ащ игупсэ чIыпIэр мэзым пхырычъырэ псы цIыкIоу Улэ кIэлъырыс къуаджэу Улап ары. А чIыпIэр ары ащ ныбджэгъуныгъэ шъыпкъэр ыкIи шIулъэгъуныгъэ къабзэр зыщызэхишIагъэр. «Ныбджэгъур зыщысшIагъэр, шIулъэгъур къызщыущыгъэр сикъуадж» — етхы усакIом. Пстэуми ар къахигъэщын елъэкIы:
Дунаим чIыпIэ дэхабэ, Сэ сэшIэ, хъопсагъоу тет, Ау щыIэп фэдэ Улапэ, Улапэ — сэ сиорэд.
ШIулъэгъум фэгъэхьыгъэ усэхэр IэпэIэсэныгъэ хэлъэу нэплъэгъу дахэкIэ, зы жьыкъэщэгъукIэ усакIом къызэIуехы. Ащ ехьылIагъ «Тарсина, о си Тарсина» зыцIэр. Мыщ угу къегъэкIы Сергей Есениным итхыгъэу «Шаганэ, ты моя Шаганэ» зыфиIорэр.
КъумпIыл Къадырбэч иусэхэм гупшысэ куу зэрахэлъыр, шIулъэгъур къабзэу къызэригъэлъагъорэр, метафорэр фэкъулаеу ыгъэфедэзэ, поэтическэ образхэр икъоу къытынхэ зэрилъэкIырэр тхылъеджэхэм апашъхьэ Бэрэтэрэ Хьамидэ щыкIигъэтхъэу къыхэкIыгъ.
«Къадырбэч тхылъеджэхэм апашъхьэ усэхэм къащеджэ зыхъукIэ, — етхы Урысыем ипрофессиональнэ литераторхэм я Союз хэтэу Хьаудэкъо Шыхьамызэ, — ежь ицIыфшIыкIэ шъэбэныгъэу хэлъым диштэу, усэу къызаджэрэм гупшысэу хэлъым тегъэпсыкIыгъэу ымакъэ ыгъэпсыщтыгъ: зэм лъхъанчэу, зэм нахь Iэтыгъэу, зэм пхъэшагъэ горэ хэлъэу. А шIыкIэм тетэу зэо мэхъаджэм цIыфхэм пщэIэн умылъэкIын хьэзабэу къафихьыгъэм, ащ лажьэ зимыIэу цIыфыбэу хэкIодагъэхэм, а зы унагъом кIэлибгъу-кIэлипшIыр икIыхи, къызэрамыгъэзэжьыгъэм афэгъэхьыгъэ усэхэм къяджэ зыхъукIэ, тхылъеджэхэр рэхьатэу щысынхэ алъэкIыщтыгъэп, зыныбжь хэкIотагъэхэм анэпс къашIуакIощтыгъэ.
Ащ фэдэ пчыхьэзэхахьэ горэм тыкъикIыжьызэ Бэрэтэрэ Хьамидэ зигъэсэмэркъэузэ къеIо: «Къадырбэч, джащ нахьыбэрэ тхылъеджэмэ адэжь уздэтщэжьыщтэп. Тэ ахэр дгъэгушIоных, дгъэчэфыных, агу къэтIэтын тэIошъ тахэхьэ, о ахэр къэогъэгъыхэшъ такъыхэогъэкIыжьы». Мыдрэми (Къадырбэчи) сэмэркъэум къырегъэгъэзэжьы: «Тхылъеджэм ыгучIэ шъыпкъэ унэсын амали пхэлъын фае».
КъумпIыл Къадырбэч бзылъфыгъэм, шIулъэгъум, ичIыгу афэгъэхьыгъэу ытхыгъэ усэхэр удэзыхьыхырэ гущыIэхэу гучIэм къикIыпагъэхэу зэрэщытхэр ары зэ нахь уямыджагъэми, бэрэ гум къызкIинэжьхэрэр.
1976-рэ илъэсым журналэу «Зэкъошныгъэм» «ГъэшIэ напэр къабзэмэ» зыфиIоу Хъут Казбек къыдигъэхьагъэм щыхегъэунэфыкIы: «КъумпIылыр къызтегущыIэрэ бзылъфыгъэхэр IэпэпцIыйхэп, шъорышIхэп, ахэр лэжьакIох, щыIэныгъэм ылъапсэ аIашъхьэкIэ агъэчъы, шIулъэгъукIэ дунаир къагъэкIэракIэ».
ТхакIом къыгурыIощтыгъ гъашIэр шъоупс закIэу зэрэзэхэмылъыр, цIыфым зыгорэм ыгу хигъэкIын, хэукъон зэрилъэкIыщтыр. Ащ илирическэ герой рэхьатыгъор зыфэдэр ышIэрэп, зэфагъэр, шъыпкъагъэр икъукIэ зэригъашIэ шIоигъу, ныбджэгъоу заом имашIо щимыухъумэшъугъэм игумэкI хэмыкIэу упчIабэм яджэуап лъэхъу. УсакIом лIыхъужъныгъэм еплъыкIэ гъэнэфагъэ фыриI, чаныгъэ-блэнагъэр цIыф пэпчъ къызэрэщежьэрэр, ыгукIэ къызэрэхихырэр итхыгъэмэ къащеIо. Усэу «Тарихъ лъыхъум сыфэд» зыфиIорэм щыхегъэунэфыкIы чIы къатхэм, мыжъобгъухэм уахътэр къызэрэтфаIуатэрэр. Ежь блэкIыгъэ уахътэм зэрепхыгъэр ыушъэфырэп, пылъ ар зы гъэшIэгъон горэ къыгъотынэу, шIоигъу иошъогу дахэ бзыоу щыбыбынэу, ылъэкIырэр зэкIэ илъэпкъ фишIэнэу. Фаеп ыкIи лъыхъурэп ар щытхъу лъагэм, ау икIас ащ имэз кIырхэр, икъушъхьэ зэкIужьхэр, лъэбэкъу пэпчъ ышызэ, тарихъым лъыхъурэм фэдэу екIу идунай. ТхакIом шIоигъу иуахътэу тарихъ хъущтыр гъэшIэгъонынэу. ЩыIэныгъэм лъэбэкъоу щыбдзырэм, Iуагъэу щыпшIырэм, узытет, узыхэт дунаим псэукIэ шъошэ тэрэз зэрэщыуиIэн фаем уарегъэгупшысэ. Ащ цIыфыр егъашIо, елъытэ, еIэты. Ащ ишыхьатышIу зэлъашIэрэ цIыфхэм афитхыгъэ усэхэр: «Гъогу» зыфиIоу Долэ Махьмудэ фэгъэхьыгъэр, «Ныбджэгъум дэжь» ыцIэу Къыздырмыш Казбек фитхы-гъэр, джащ фэдэу Маяковскэм, Межелайтис, дирижерэу Темыркъан Юрэ, Бетховен ыкIи «О ухэт, цIыфыр?» зыфиIорэ поэмэу ыкъоу Марат афитхыгъэр.
УцIыфмэ гъашIэм пшъэрылъ зэрэщыуиIэн фаер, уичIыгу уригъупчъэу узэрэлэжьэн, ар пщымыгъупшэу къызэрэбгъэгъунэн, нахьышIу хъуным узэрэпылъын фаер етхы усакIом. ЦIыфыгъэ пхэлъэу узекIоныр, уишIушIагъэкIэ хэтрэ цIыфи ыгу къыдэпщэеныр, къин зытелъым IэпыIэгъу уфэхъуныр зэмыокIыжьырэ шапхъэу, бзыпхъэу щытынхэ фаехэу егъэунэфы. Ежь тхакIор зыхэт щыIэныгъэ къызэрыкIор зэмкIэ рэхьатэу, шъабэу, етIанэ ыгукIэ гумэкIэу, гупшысэныр нахь къытекIоу, псынэкIэчъ макъэу ары къызэритырэр. ЦIыфым ыгу къужъIэрысэм фэдизэу eIo, ay ащ ыкIуачIэ хышхом регъапшэ, гур цIыф бгъэгум елъыфэ, къыщытеофэ цIыфым зэфагъэрэ теубытагъэрэ бгъодэлъхэу шIум фэлэжьэн фаеу къыдгурегъаIо.
ЩыIэныгъэм мытэрэзныгъэу хэхъухьэхэрэм янахьыбэр цIыфым къызэрэщежьэрэр, неущ тищыIэныгъэ зыфэдэщтыр тэ къызэрэтэпхыгъэр ыкIи тIэ зэрилъыр усакIом тыгу къегъэкIыжьы. ЗэхэшIыкIыр, гукIэгъур зыхэплъагъорэр цIыфыр ары. «Ар бзаджэу хэт къыозыIуагъэр?» — еIошъ къэупчIэ.
«Къадырбэч адыгэ литературэм къызыхахьэм, — етхы шIэныгъэлэжьэу ХьакIэмыз Мирэ, — иакъылрэ ишэнрэ зэтеуцуагъэу, игущыIэ зынэсрэр ышIэу ипоэзие чъэпхъыгъэкIэ лъэпкъ культурэр къыгъэбаигъ. УсакIом гухэлъ шъхьаIэу зыдиIыгъыгъэр цIыфыр гукIэгъум, дэхагъэм, хьэлэлныгъэм, къэбзагъэм, лъэгагъэм афэщэгъэныр арыгъэ…
Уахътэр зэхэфыгъуай ыкIи къэубытыгъуай. БлэкIыгъэр бгъэмысэкIэ зи къикIыщтэп: «БлэкIыгъэр къинэп о бгъэмысэн», — еIо усакIом. Ау уцIыфмэ, блэкIыгъэм акъыл хэпхыныр уипшъэрылъ. БлэкIыгъэмрэ къэкIощтымрэ зэзыпхырэ акъылыр ЩыIэныгъэм илъэмыджэу зэрэхъун фаер къырегъаIо:
Сежэ, синепэ джа лъэхъанитIур Насып лъэмыджкIэ зэрипх сшIоигъу.
Социологие шIэныгъэхэмкIэ докторэу, профессорэу АфэшIыжь Тыркубый усакIом фэгъэхьыгъэ игукъэкIыжьхэр IэубытыпIэшIухэу къысщэхъу КъумпIыл Къадырбэч ицIыф шIыкIагъэр, къэзыуцухьэрэ дунаир къызэрэгурыIощтыгъэр нахьышIоу зэхэпшIэнхэмкIэ.
«КъумпIыл Къадырбэч икIуакIэ, — еIо Тыркубый, — хэти ием емыхьыщырэу гъэпсыгъагъэ: бзэпсым тетым фэдэу шъабэу кIощтыгъ, ишэн-гъэпсыкIэкIэ рэхьатэу щытыгъ. НахьыбэрэмкIэ гупшысэ горэм зыIэкIиубытагъэу къыпшIошIыщтыгъэ. Зэщыхьагъу горэм хэлэжьагъэу сыгу къэкIыжьырэп».
Илъэсхэм хэтырэ цIыфи зэблахъу, Къадырбэчи щыIэныгъэм зэрипсыхьагъэр, лъэбэкъу пэпчъ ушэтыпIэ гъэнэфагъэ зэрэфэхьущтыгъэр, еджапIэр, педучилищыр, дзэ къулыкъур — зэкIэ ахэр гъашIэм гъозэпIэшIоу зэрэщыриIагъэхэр пкIэнчъэ хъугъэп. Ар дэгъоу нэужкIэ иусэхэм къащиушыхьатыжьыгъ.
«Къадырбэч еджапIэм щеджэщтыгъ усэ зэхэлъхьанымкIэ зиушэтэу зырегъажьэм, — еIо АфэшIыжьым. — КъуаджэмкIэ игъунэгъоу, илъэситIу горэмкIэ ежь нахьыкIэу Къыздырмыш Казбек а уахътэм «усэкIо ныбжьыкIэкIэ» алъытэщтыгъ. Джарэущтэу литературэм пыщэгъэ кIэлэкIитIум поэзиер шIу зэралъэгъурэм зэныбджэгъу ышIыгъэх. А нэбгыритIур емыджагъэу усэхэр зыдэт тхылъ гори библиотекэм къычIэмынэгъагъэу ары сызэреплъырэр. Ащ ишIуагъэкIэ ахэм Пушкиным, Лермонтовым, Есениным, Маяковскэм ыкIи нэмыкIхэм щыIэныгъэ гъогоу къакIугъэр игъэкIотыгъэу ашIэщтыгъ, яусаби езбырэу къаIон алъэкIыщтыгъ».
БэшIагъэу гу лъатагъэу щыт поэзием фэщэгъэ цIыфхэр чIыопсым агукIэ зэрэпэблагъэхэм. КъумпIыл Къадырбэчи джащ фэдагъ. Ащ бэрэ икIопIагъэх псыхъохэу Лабэ, Улэ, СултIан Къалыщджэрые ищагушхо къыгъэгъунэщтыгъэ чIыпIэм итыгъэ Iошъхьэ цIэрыIоу къоджэдэсхэр зэрыгушхощтыгъэхэр. Ахэр шIу зэрилъэгъущтыгъэхэм ишыхьат иусэхэм ащыщхэм а чIыпIэхэм псэ къазэращыпигъакIэщтыгъэр. Уахътэ иIэу къызыщыхэкIырэм Улэпэ Iуашъхъэм тетэу сыхьат пчъагъэрэ къуаджэм ихьанэ-гъунэхэр къыплъыхьаныр Къадырбэч икIэсагъ. Ахэм инэплъэгъу къащыридзэрэ чIыпIэ дахэхэр, къоджэдэс чанэу ащылажьэхэрэр ары идунэезэхашIэ, ифилософие лъапсэ афэхъугъэхэр. НэмыкIэу къэпIон хъумэ, къызщыхъугъэ ихэгъэгу цIыкIу къыхилъхьэгъэ къарыур ары итворчествэ ылъэ тезыгъэуцуагъэр. Шъэбагъэ зыхэлъ лиризмэр, игупсэ къуаджэ — зихэгъэгу (республикэм) фэшъыпкъэ цIыфэу ыпкъ зыщиуцуагъэм афыриIэ шIулъэгъоу сыдигъокIи мыупабжьэщтыгъэр, шIулъэгъу хэушъхьафыкIыгъэу къэзылъфыгъэ янэ фыриIэр... бэ зигугъу къэпшIынэу щыIэр. Джащ фэдэ цIыфыр ары зикъуаджэ Париж фэзыгъэдэн зылъэкIыщтыри.
Къадырбэч изы нэшанэ горэм иныбджэгъухэм анаIэ тырадзагъэу щытыгъ. Къалэм дэсмэ зэрэщытым фэмыдэу Улапэ щыIэ зыхъукIэ ар нахь Iупэ-бзэпагъ, нахь чэфыгъ, ыгу тIупщыгъэ хъущтыгъ, зыIукIэрэ цIыфхэм сэмэркъэу дахэ адишIыщтыгъ.
Къадырбэч зышIэщтыгъэ пстэуми зэрэхагъэунэфыкIырэмкIэ, ыIуагъэм ныбжьи епцIыжьыгъэп. ИгущыIэ ар сыдигъуи фэшъыпкъагъ. ЦIыфкIэ зызылъытэжьырэ пстэури ащ фэдэу щытын фаеу шIошъхъуныгъэ иIагъ.
Ятэ заом зэрэхэкIодагъэр усакIом лъэшэу къин къыщыхъущтыгъ. Ар ренэу зэхишIэрэ гуузэу къыздырихьакIыщтыгъ. ДзэкIолI ныбжьыкIэу, лIыхъужъ фэхыкIэу, игъонэмысэу заом хэкIодагъэхэм ацIэкIэ ащ ытхыгъ поэмэу «Гугъэ» зыфиIорэр. Фэхыгъэ дзэкIолIым ихьадэ чIым чIэлъ, ау ащ ыпсэ иIахьыл-благъэхэм, янэ ягъусэу къадекIокIы. УсакIор ренэу фэзэщы ятэжъ ышIыгъэгъэ чэлым, ащ чIэлъэу гъэмэфэ чэщ жъоркъым хьантIаркъохэм якъэкъэ макъэ ыгъэшъхьаукъэзэ хэчъыежьыщтыгъ. Ары анахь кIуачIэ зиIэу къытлъигъэIэсын ылъэкIыгъэмэ ащыщэу плъытэмэ хъущт усэхэу «Сятэ исурэт», «Тятэ фэсэтхы» зыфиIохэрэр.
Ятэ имыIэжьэу къэнэгъагъэти, ицIыкIугъом къыщегъэжьагъэу ныр усакIомкIэ янэ къодыягъэп, ар ятэуи къэтэджыгъ, ащ ыпIугъ, ылэжьыгъ, ылъэ тыригъэуцуагъ. Ным ехьылIэгъэ усэу ытхыгъэхэм гум куоу къынэмысэу зыгори ахэтэу пфэIощтэп. «Ным ыIэхэр», «Ным иорэдхэр», «Ным ишIулъэгъу», «Ныр опсэуфэ», «Ныхэм яхьылIагъ» ыкIи нэмыкIхэми тхылъеджэхэр ащыгъуазэх. Ары, КъумпIылым ипоэтическэ гупшысакIэ икъэкIопIэ шъхьаIэхэм ащыщ ным иобраз. Зэпымыужьэу ащ ымыгъэшIэгъон ылъэкIыщтыгъэп щэIагъэу ным хэлъыр, шIушIэным ыгукIэ зэрэфэщэгъагъэр, ыIэхэр IофшIэн горэм ренэу зэрэпылъыгъэхэр. Ныр усакIомкIэ гуфэбэныгъэ гъунэнчъэм икъэкIуапI, егъэшIэрэу ыгу къинэжьыщт шIэжь.
УсакIоу Ожъ Аскэрбый итхыгъэ зэрэщыхигъэунэфыкIырэмкIэ, «Къадырбэч икъуаджэ бэрэ кIоныр икIэсагъ, ащ дэс нэжъ-Iужъхэм, кIэлакIэхэм, кIэлэеджакIохэм заIуигъакIэщтыгъэ». ШIулъэгъоу икъуаджэ фыриIагъэм ишыхьат «Къалэм сыдэсми, сыгурэ сыпсэрэ чылэжъым дэлъ» мызэу, мытIоу ащ Ожъым зэрэриIощтыгъэр.
Хэтрэ цIыфи опсэуфэкIэ насыпыгъэу зыфилъэгъужьырэр шIугъэу, дэхагъэу зыфэлэжьагъэр хьаулые мыхъугъэу, ащ гъэбэжъу чылапхъэ къызэритыгъэр ышIэ зыхъукIэ ары. Къадырбэч фэгъэхьыгъэу мы гупшысэм укъекIолIэн зыхъукIэ, ар цIыф насыпышIомэ зэращыщыгъэм уеджэнджэшыжьынэу щытэп. Ащ иусэ сатырхэм уяджэ зыхъукIэ, зэман чыжьэхэр нэгум къыкIэтаджэх, ижъыкIэ щыIэгъэ адыгэхэм зэхэтыкIэу яIагъэр, ахэр зыфэдагъэхэр, япсэукIагъэ, цIыфыгъэ дахэу адыгэ лъэпкъым хэлъыгъэр, шIэныгъэм зэрэфэбанэщтыгъэхэр къыриIотыкIынхэр фызэшIокIыгъ.
Адыгэ усэкIо чъэпхъыгъэу КъумпIыл Къадырбэч иусэхэмрэ ипоэмэхэмрэ зыдэт тхылъ пчъагъэ Адыгэ Республикэм итхылъ тедзапIэ къыщыдэкIыгъ. Къызыхъугъэр илъэс 75-рэ зэрэхъугъэм епхыгъэу изэхэугъоегъэ тхыгъэхэр зыдэт тхылъитIу къыхаутыгъ. Апэрэ тхылъыр 2009-рэ илъэсым, ятIонэрэр 2011-м. Апэрэ тхылъыр — «Усэхэмрэ орэдхэмрэ», ятIонэрэр — «Усэхэмрэ поэмэхэмрэ».
УсакIом ытхыгъэхэм художественнэгъэ ин, гупшысэ куу зэрахэлъым, бзэ къэбзэ дахэу удэзыхьыхырэмкIэ зэрэтхыгъэм, рифмэрэ ритмэрэкIэ зэгъэпэшыгъэхэу зэрэщытхэм яшыхьат тикомпозиторхэм ахэр мэкъамэм зэрэрагъэкIухэрэр. Ипоэзие къыщыхэщырэ нэнашэу щытыр ар лиричнэу зэрэгъэпсыгъэр, гражданственнагъэ зэрэхэлъыр ары.
КъумпIыл Къадырбэч къызхэкIыгъэ лIакъом, лъэпкъым, икъоджэгъухэм лъэшэу агъашIо, осэшхо фашIы. Сыда зыпIокIэ, ар зэрэусэкIо дэгъум нэмыкIэу, ицIыф гъэпсыкIэкIэ, изекIо-кIэ-шIыкIэхэмкIэ, ыпкъышъол игъэпытэнкIэ зыфэдэ къэмыхъугъэ лIэблэнагъэрэ акъылрэ хэлъыгъэх. Ащ гъогу удытехьанкIэ, укIыгъоу цIыфхэм уахэхьанкIэ фэдэу шъуашэу, ынаIэ къыптыригъэтынэу, уигъэшIонэу бгъотыщтыгъэп. ИIофшIэгъухэмкIэ, иныбджэгъухэмкIэ, иIахьылхэмкIэ гукIэгъушхо хэлъыгъ, ащ ицIыфыгъэкIэ агу къыщэфын ылъэкIыщтыгъ, арэуи къысшIошIы лъытэныгъэ ин зыкIыфашIыщтыгъэр. Ар Улапэ узыдахьэкIэ псынкIэу нафэ къыпфэхъу. ЗыфатIорэр икIэлэгъу зыщыкIогъэ урамым усакIом ыцIэкIэ зэреджагъэхэр ары. Джащ фэдэу щысэу къэпхьын плъэкIыщт къоджэ еджапIэм ыцIэ зэрихьырэр. Мыщ дэжьым къыщыхэзгъэщы сшIоигъу илъэс къэс игъэкIотыгъэу итворчествэ фэгъэхьыгъэ Iофыгъохэр Улапэ игурыт еджапIэ зэрэщызэхащэхэрэр. Мыщ къыщызэIуахыгъ литературэмкIэ музееу усакIом ищыIэныгъэ гъогу къэзыIотэрэ тхыгъэхэр, ыгъэфедэщтыгъэ пкъыгъохэр, итхылъхэр зычIэлъхэр.
Теубытэгъэ ин хэлъэу къэтIон тлъэкIыщт КъумпIыл Къадырбэч ипоэзие имэхьанэкIэ непэрэ уахътэм диштэу зэрэгъэпсыгъэр. Непэ къэралыгъор нахь зыфэгумэкIэу, ынаIэ нахь зытыригъэтыхэрэр мылъкурэ лъэкIрэ цIыфхэм яIэныр ары. Ау сыд фэдиз мылъку зэхиугъоягъэми, цIыфымкIэ анахь мэхьанэшхо зиIэу Къадырбэч ылъытэрэр моральнэ пытагъэрэ цIыфыгъэрэ хэлъынхэр ары. УсакIом анахь шIогъэ инкIэ хэти фиушIошIырэр цIыфхэр шIу плъэгъунхэр, ахэм пфэлъэкIырэмкIэ цIыфыгъэ адызепхьаныр ары, обществэми, къэралыгъоми акIуачIэу, алъапсэу ары хъурэри.
УсакIор итворческэ кIуачIэ нахь зыкъызыщызэIуихыгъэ уахътэм, 1990-рэ илъэсым ишышъхьэIу мазэ дунаим ехыжьыгъ. Ауми, ащ ышIэнэу игъо зыфифагъэмкIэ я XX-рэ лIэшIэгъумкIэ адыгэ поэзием чIыпIэ гъэнэфагъэ щиубытыгъ. «ЦIыфэу ущыIэным къикIырэр: Пхэлъыныр ары цIыфыгъэ».
ШэкIо Мир. ШIэныгъэлэжь.