Тхылъэу «Джыри си Едэпсыкъоешхо сыдэт» зыфиIорэм пае гъэзетэу «Адыгэ макъэм» сыфэтхэ.

Дэгъу дэдэу ытхыгъ. Хъот Замрэт иадыгабзэ дахэ, жэбзэ дэгъу дэдэ Iулъ. Ежь ицIыф шIыкIи, ишэн-зекIуакIи, адыгэпкъыр къахэщы. Уеджэ зыхъукIэ гур ыгъэузэу, гур ыгъэбырсырэу зэкIэри къэошIэжьы. Къоджэ 12-у псым ычIэгъ хъугъэр, ар лъэпкъымкIэ зэрэтхьамыкIэгъо­шхор дэгъу дэдэу къыхэщых.

Едэпсыкъуае сэри сыщыщ. А тхьамыкIагъор сыгу къыгъэ­кIыжьызэ тхылъым седжагъ. Чылэм гъы макъэу дэIукIыщтыгъэр непи стхьакIумэ икIырэп. Сянэжъ тхьамыкIэм икъэ къызэрэдэтынагъэр гум икIыжьырэп, ренэу чылэр сынэгу кIэт.

Мэзхэр, тичIыгу бэгъуагъэ, тиеджапIэ, кIэлэцIыкIу куо ма­къэу урамым щыIущтыгъэр сщыгъупшэхэрэп. Мафэ горэм сурэт сшIыгъэ. Тиунэ, тиурам, тикъэлапчъэ, тигъунэгъумэ яунэ­хэр — зэкIэри сынэгу кIэтых. Ахэм сяплъызэ сыгу жьы дэзгъэкIэу бэрэ уахътэ къысэкIугъ.

Къэралыгъо телерадиокомпаниеу «Адыгеим» фильмэу сэ сфишIыгъэм бэмэ саригъэгупшысагъ. Адыгэкъалэ тыщыIэу хы шIоркъым инэпкъ сыIутэу едзыгъоу тырахыгъэм сыгукIэ зэхысигъэшIагъэр гъашIэм щысщыгъупшэщтэп. Хъугъэ-шIагъэхэр сынэгу кIэтхэу нэпсыр къысэхыгъ, сыгъыгъ…

ЗэлъашIэрэ тхакIоу, драматургэу Къуекъо Налбый ипьесэу «Псым ыхьырэ Iуашъхьэр» зыфиIорэм фэдэу Хъот Замрэт икъуаджэ къырыкIуагъэр тапашъхьэ къырегъэуцо. Замрэт «тхьауегъэпсэушхо» есэIо. Къыз­тегущыIэрэ лъэхъаным псэукIэу тиIагъэм, цIыфхэм саугъэт афигъэуцугъ.

Хъот Замрэт Адыгэ Респуб­ликэм и Къэралыгъо премие фагъэшъошэныр тефэ, къылэ­жьыгъ.

Жэнэ Нэфсэт. Урысыем изаслуженнэ артистк, Адыгэ Республикэм инароднэ артистк, медалэу «Адыгеим и Щытхъузехьэр» къыфагъэшъошагъ.