Дышъэ кIэн
Лъэпкъ Iэпэщысэхэм яшIын пылъ IэпэIасэхэм я Ассоциацие республикэм илъэситIу хъугъэу щызэхэщагъ. Ащ нэбгырипшI фэдиз хэхьэ. Ассоциацием ипащэр ПIатIэкъо Айдэмыр.
Кушъэм, Iанэм, пхъэкIычхэм, шыкIэпщынэм, адыгэ шъуашэхэм яшIын зыIэ къихьагъэхэм япчъагъэ бэп, ау мыщ фэдэ IэпэIэсэныгъэ зыхэлъхэр нахьыбэ хъуныр, ахэм IэпыIэгъу ягъэгъотыгъэныр, Iэпэщысэхэм яшIын жъугъэу цIыфхэм аIэкIэгъэхьэгъэныр ары пшъэрылъ шъхьаIэу зэхэщэгъэ купым зыфигъэуцужьырэр.
Ащ хэтхэм ащыщэу непэ нэIуасэ шъузфэтшIыщтыр ТIэшъу Нурбый. Джамбэчые къыщыхъугъ, Мыекъуапэ щэпсэу, пхъэшIэным ицIыкIугъом щегъэжьагъэу пылъ.
ТIэшъу Нурбый:
«Тятэ, тятэшхэм къаIэпытхыгъ пхъэшIэныр, чылэм щытлъэгъугъ. ЕджапIэм, труд урокхэм щытагъэшIагъэри хэт. Радиотелемеханикэр ДОСААФ курсхэм къащысыухыгъ. Ау сыгу фыщылъыгъэп, бэрэ Iоф рысшIэнэу хъугъэп. Апэрэ пкъыгъоу бзыу набгъор пхъэм хэсшIыкIыгъагъ, ар Джамбэчые еджапIэм сычIэсэу сшIыгъагъэ. Сятэшыпхъур дэгъу дэдэу дэщтыгъэ. Дэрэ машинкэу иIагъэм итепIо къысити, бзыу набгъом ыкIыб хэсыбзыкIыгъагъ. Джар еджэпIэ щагум щыпыслъхьэгъагъ. IэкIэ пшIырэм фэдэ щыIэп!»
Радиотелемеханикэм феджэгъэ ТIэшъу Нурбый АР-м и Лъэпкъ театрэ 1979 — 1982-рэ илъэсхэм звукорежиссерэу Iоф щишIагъ. Ау Тхьэм къыхилъхьэгъэ сэнаущыгъэр апшъэ хъугъэ — лъэпкъ Iэпэщысэ зэфэшъхьафхэм яшIын къызIэкIигъэхьагъ.
ТIэшъу Нурбый:
«Лесокомбинатым щезгъажьи бэ Iофэу сшIагъэр, ащ ыуж я 90-рэ илъэсхэм кооперативхэр къежьэгъагъэх, пчъэхэр сшIыхэу сыублагъ. Чэчэным, Тюмень тшIырэ пчъэхэр зэращэхэрэр кIалэу тщызыщэфыщтыгъэхэм къаIощтыгъэ. Джащ тетэу псэолъэшIынми, адыгэ Iэпэщысэхэм яшIыни ахэщагъэ сыхъугъ. КIэлэцIыкIухэм зыгорэ ядгъашIэмэ, зыгорэ ядгъэлъэгъумэ ишIуагъэ къэкIощт. ЕджапIэхэм ар ачIалъхьэмэ, IэпэIасэхэр нахьыбэ хъущтых. ЦIыфы пэпчъ зыгорэ хэлъ, ар къэбгъэущын фае. Тилъэпкъ къэзыгъэдахэрэр тиIэшIагъ, лъэпкъым зыгорэ къыфэнэн фае».
IэпэIасэ пэпчъ иунэ ныбжь иIэу, ыгъэлъэпIэрэ пкъыгъо зэрилъым мызэу, мытIоу тырихьылIагъ. ТIэшъу Нурбый фэдэ пкъыгъоу зэрыгушхорэр илъэсишъэрэ шъэныкъорэ зыныбжь адыгэ Iанэр ары.
ТIэшъу Нурбый:
«Мыр Бгъуашэхэм, тятэшым игуащэ иягъ».
Нурбый Iэнэ цIыкIур къеIэты, къызэпырегъазэ, Iэнашъхьэри, ылъакъохэри къытегъэлъэгъух. Пхъэм ышъо къыхэмыщыжьэу, ныбжь зэриIэр къэлъагъоу Iэнэ цIыкIум илъэсишъэрэ шъэныкъорэм инэпэеплъ телъ.
ТIэшъу Нурбый:
«ТыцIыкIоу яунэ бэрэ тихьэщтыгъ, слъэгъущтыгъ. Зэрэжъы дэдэр къыхэщэу бэ тещэягъэр Тхьэр зэуагъэм — ощи, сыди. Сшыпхъу ипшъэшъэжъые къыратыжьыгъагъ. БэшIагъэу мы Iэнэ цIыкIум сызэрэлъыплъэрэр ыкIи къыситыжьы зэрэсшIоигъор зесэIом, «Адэ дэгъуба, Нурбый, штэ!» ыIуи, джащ тетэу сштэжьынэу хъугъагъэ. Сыукъэбзын сIуи, етIанэ «мыщ фэдиз зыныбжьыр, мыщ фэдиз зэIагъэр сыдэущтэу зэщызгъэкъощта?» сIуи, къызэтезгъэнагъ. Ыныбжьи елъытыгъэу дахэ, хъопсагъо, зесэхьэ, хэти есэгъэлъэгъу, Iанэ зышIыхэрэмкIэ шэпхъэ техыгъошIоу щыт».
ТIэшъу Нурбый пцэжъыяшэп ыкIи шакIоп, арэу щытми, икIыщ ащ уезыгъэгуцэфэрэ пкъыгъо шIыгъэхэр щыплъэгъущтых. ПцэжъыякIэхэр гъэIагъэу пхъэ хъурэе хэгъэчъыгъэмэ атегъэпкIагъэхэу, гъэшIэгъонэу, псым хэпкIэжьырэ пцэжъыем фэдэу, къэлъагъох. Псэушъхьэ бжъакъохэм ахэшIыкIыгъэ пылъапIэхэр зэтефыгъэх. Къушъхьэ пчэн зэфэшъхьафхэм, шъыхьэхэм ябжъакъохэм ахэшIыкIыгъэхэри ахэм ахэтых. Мэзым фыкъуагъэ щыхъугъэ псэушъхьэхэм къатырахыгъэ бжъэхэр IэпэIасэм ымыгъэхьаолыехэу цIыфым къышъхьапэнэу ешIых.
ТIэшъу Нурбый:
«Упцэжъыяшэ хъумэ, уцIыф гупсэфын фае. Сэ ащ фэдэу сыщытэп. (Нурбый мэщхы.) Ренэу зыгорэм сылъэхъу, зыгорэм ыуж сит».
— Адэ плъэкъоцIэ шъып-къэ тефэу ошакIуа? — Нурбый зыщыщ шъыпкъэхэр къезгъэIуатэ сшIоигъоу упчIэр есэты.
ТIэкIуи къызэрехьылъэкIырэр къыхэщэу, IэпэIасэм илIэкъо тарихъ къэбарэу пылъым тыщигъэгъозагъ. ТIэшъу лъэкъуацIэр ахьы шъхьае, ШакIо лIакъом къыхэкIыгъэх. 1914-рэ илъэсым Чабэм щыIэгъэ ятэжъэу Азэмат, Хэгъэгу зэошхом хэлэжьэгъэ ятэу Мыхьамодэ япкъыгъохэу унэм къинагъэхэр зэрагъэлъапIэхэрэм фэдэу, яосыетхэри агъэцакIэх. Ахэм атекIыгъэ зэшиплIырэ зэшыпхъуищырэу псэухэрэм аIэ къихьашъущтыр пстэури упчIэжьэгъу зэфэхъухэзэ агъэцакIэ. Ар Нурбый къегъэшъыпкъэжьы. Заом зэрэIутыгъэм емылъытыгъэу, ятэ дэщтыгъэ ыкIи гъучI къэмланхэу дзэкIолI шхыныр зэрылъыгъэхэм лэгъупыжъыехэр ахишIыкIыщтыгъэх. Ахэр шхынкIэ зэблихъужьыщтыгъэ. «Заом уIэгъэ хьылъэ зыщэхъуми, кIуачIэкIэ зэрэфырикъугъэр Iазэхэм агъэшIагъощтыгъэ», — еIо Нурбый.
Пстэуми апшъэ кIуагъэр ежь ышъхьэ нэмыкI зыми щымыгугъэу, IэкIэлъ сэнаущыгъэр ымыгъэкIодэу, ар къызфигъэфедэн зэрилъэкIыгъэр ары.
ТIэшъу Нурбый:
«ШакIо лIакъоу тыкъызтекIыгъэр унэгъо 30-мэ къагъэпсыщтыгъэ. Тэлаум (холерэм — Т. З.) илIыкIыгъэх. Зы бзылъфыгъэ лъэрымыхьэ цIыкIум тытекIыжьыгъ, илI щымыIэжьэу, сабыир ышъо хэлъэу. ЩыIэныгъэр ащ щыухыгъэ хъурэп ныIа. ТIэшъумэ якIалэ горэм ыщэжьыгъагъ. Тятэшыпхъуи, тятэши алъэкъуацIэхэр зэблахъужьыгъагъэх, ау тятэ заом къызекIыжьым ылъэкъуацIэ зэблихъужьынэу хъугъэп. КГБ-м къыфидагъэп. Тэ ТIэшъоу тыкъэнагъ. Джамбэчые ШакIохэр тызыунагъу. Зы тэтэжъ тызтекIыгъэр».
Унэгъо пкъыгъо хьалэмэтхэр Нурбый зэриухъумэрэм фэдэу, ежьми иIэпэIэсэныгъэ къызщылъэгъорэ Iэпэщысабэ ешIы, ахэр зэрэзэбгырыкIырэм имызакъоу, тарихъым къыхэнэщтхэри ахэтых.
ТIэшъу Нурбый:
«Сыд фэдэри нахь дахэ зэрэсшIыщтым сыпылъ. ХьакIэ зиIэ щыI, хьакIэщхэри арагъэшIых, дэгъуба паIо, кIако, шхонч пыплъэщтхэмэ мыщ фэдэ пылъапIэ уиIэныр?! — Нурбый псэушъхьэ зэфэшъхьафмэ абжъэмэ ахэшIыкIыгъэ пылъапIэхэр къештэх, къытегъэлъэгъух. — Мары мыр шъыхьэм ыбжъ, тимэзхэм ахэс кавказ шъыхьэм фэд, сыда пIомэ сыбыр шъыхьэхэм абжъэхэр псыгъох. Мыдрэ бжъэкъо шIуцIэр псэушъхьэр кIэлакIэзэ тыраутыгъэгъэн фае. Ежьашъоу щытыгъ, зыгорэм сылъэхъу зэпытба, натрыф дагъэкIэ зысэлъэкIым, шIуцIэ хъужьыгъэ. Джы сщэщтэп. Бэрэ чIыопсым хэлъмэ бжъэр мачэ, унэм илъы хъумэ чэрэп».
Нурбый зэIэбэкIышъ, мэкIаим пылъагъэу къэбыжъыем хэшIыкIыгъэ остыгъэ, ыкIоцI шэко остыгъэ ибгъэуцон плъэкIынэу, къештэ. «Тиунэкъощэу ТIэшъу Руслъан «кино тетэхышъ» ыIуи, пкъыгъохэр сIихыгъагъэх агъэфедэнхэу, шъо пхъэнтIэкIури ахэтэу. Джы ахэр сэ пкъыгъо гъэшIэгъонхэу къысфэнэщтых, адыгэ кином щагъэфедэгъагъэхэу».
ИIэпэщысэхэр зыщишIырэ кIыщ шъыпкъэми Нурбый тычIищагъ. Пхъэ сапэр мэкIайхэм Iужъоу ателъ IэпэIасэр бэрэ мыщ зэрэщылажьэрэм ишыхьатэу. Пхъэ цуакъэхэр дэп-къым кIэшIагъэх, пхъэ упсэфэ хъураехэр джэхашъом алырэгъоу телъых, кушъэ лъэкъо ныкъошIхэр мэкIаим егъэкIугъэх. Пчэн лъэкъо уфагъэхэр зытелъ Iанэм Нурбый екIуалIэ, язырэр къыхехышъ, икъэбар зэфэхьысыжь къыфешIы: «1914-рэ илъэсым Чабэм щыIэгъэ сятэжъ мыщ фэдэ пылъапIэ пчэн лъакъом хэшIыкIыгъэу къыздихьыжьыгъагъ. КъыдгурыIорэ щымыIэу, тыкIалэзэ, ар сIэкIэкъутэнэу хъугъэ. Арыти, нэужым сшIыжьыгъэ. Адыгэмэ яхьакIэщхэм мыщ фэдэ пкъыгъуабэ ащагъэфедагъ. Тисабыйхэм джар ащымыгъупшэу, IэпэIэсэныгъэу пылъри зэрагъашIэзэ, ахэлъынэу сыфай!»
Лъэпкъ IэпэIасэхэм яджэмакъэ къызэхахэу лъэпкъ Iэмэ-псымэхэм яшIын еджапIэхэм зачIалъхьэкIэ, лъэпкъ сэнаущыгъэхэм зыкъызэраIэтыжьыщтым щэч хэлъэп.
Тэу Замир. Адыгеим изаслуженнэ журналист.