Ижъырэ культурэм ибзый нэфхэр
Къалэу ТIуапсэ, хабзэ зэрэхъугъэу, адыгэ культурэм ия IХ-рэ фестивалэу «Шапсыгъэ ибзыйхэр» зыфиIорэр щыкIуагъ. Районым икIэлэцIыкIу коллектив ыкIи иорэдыIо анахь дэгъухэм яIэпэIэсэныгъэ сценэм къыщагъэлъэгъуагъ, мэфэкIым ихьэкIэ шъхьаIэу щытыгъ орэдымкIэ ыкIи къашъомкIэ Адыгеим и Къэралыгъо ансамблэ цIэрыIоу «Ислъамыер».
Гъэмэфэ зыгъэпсэфыгъо лъэхъаным иаужырэ мафэхэм, ТIопсэ районым, бэшIагъэу хабзэ зэрэщыхъугъэу, цIыфхэр зэрэчэфыщтхэм тегъэпсыхьагъэхэ Iофтхьэбзэ зэфэшъхьафхэр щызэхащэх. Адыгэ культурэм имэфэкIэу «Шапсыгъэ ибзыйхэр» зыфиIорэм епхыгъэ фестивалэу тхьамафэм тегъэпсыхьагъэр шышъхьэIум и 23-м ублагъэ хъугъагъэ. Ащ къыкIэлъыкIуагъэх ермэл культурэм ифестивалэу «Дышъэ зэндал», ащ нэужым «Русский каравай» зыфиIохэрэр.
…ТIуапсэ игупчэ цIыфыбэ къыщызэрэугъоигъагъ. Анахь хьакIэ лъапIэхэм ащыщыгъэх адыгэ къуаджэхэм адэсхэ анахьыжъхэр, районым ипащэу Анатолий Русиныр, къоджэ псэупIэхэм яIэшъхьэтетхэр, Адыгэ Хасэм хэтхэр. Мы фестивалыр зэхэзыщагъэхэр муниципалитетым иадминистрациерэ шапсыгъэхэм яобщественнэ парламентрэ. МылъкукIэ IэпыIэгъу къафэхъугъэх чIыпIэ предпринимательхэм ащыщхэр. Анахьэу къекIолIагъэхэм ашIогъэшIэгъоныгъэр зэлъашIэрэ дэкIо IэпэIасэу КIуращынэ Маринэ адыгэ лъэпкъ шъуашэу ышIыгъэхэм якъэгъэлъэгъон ары. иIэшIагъэхэр ащ ЦIэпс къырищыгъэх. Хы ШIуцIэ Iушъом щыпсэухэрэ шапсыгъэхэм яижъырэ культурэ фэгъэхьыгъэ къэгъэлъэгъон гъэшIэгъон къуаджэу Псыбэ культурэм и Унэу дэтым иIофышIэхэм къагъэхьазырыгъ. Джащ фэдэу къэлэ кIэлэцIыкIу художественнэ еджапIэу Киселевым ыцIэкIэ щытым чIэсхэ кIэлэцIыкIу IэпэIасэхэм яIофшIагъэхэр умыгъэшIэгъон плъэкIыщтыгъэп. Артист ныбжьыкIэхэми адыгэ джэгум ишэн-хабзэхэр къагъэлъэгъуагъэх, ащ нэужым джэгу дахэ зэхащагъ. Ахэм къакIэлъыкIуагъэх ТIопсэ районым ичIыпIэ зэфэшъхьафхэм къарыкIыгъэхэ художественнэ коллективхэмрэ орэдыIохэмрэ: «Шапсыгъэ инэфылъэхэр» ыкIи «Гунэс» зыфиIохэрэр (ахэр Агуй-Шапсыгъэ къикIыгъэх, яIэшъхьэтетыр Шъхьэлэхъо Заур), «Черкесиер» (Ныджэпсыхъо щыщых, яIэшъхьэтетыр Дэгъо Рустам), «Дышъэ къам» зыфиIорэр (ЦIэпс щыщых, пащэр КIуращынэ Марин), «Къушъхьэхэм якIэлэцIыкIухэр» (къуаджэу КодэшъхьапIэ щыщых, пащэр Даур Сарет), «Дышъэ кIэн» (Агуяпэ щыщых, пащэр Нэгъуцу Сар), «Псынэпс» (Псыбэ щыщых, пащэр Шъхьэлэхъо Мурдин), «Жъогъобын» (къуаджэр КодэшъхьапI, пащэр Тхьагъушъэ Марет), «Талисман» (къуаджэр Псыбэ, пащэр Ацумыжъ Марин), инструментальнэ купэу «Джырэ Кавказыр» (къуаджэр Агуй-Шапсыгъ, пащэр Хъунэ Марин), шоу-купэу «ASSA» (къуаджэр Ныджэпсыхъу, пащэр Дэгъо Рустам), къуаджэу КодэшъхьапIэ къикIыгъэ инструментальнэ коллективэу Тхьагъушъэ Марет зипащэр, орэдыIо купэу «Горный край», (къуаджэр Агуй-Шапсыгъ, пащэр АкIэгъу Ален), орэдыIо кружокэу «Мэкъэ чанхэр» зыфиIорэм иорэдыIоу Ирина Дементьевар (къуаджэу Агуй, пащэр Маргарита Гальцевар), орэдыIохэу Ацумыжъ Заремэрэ (Псыбэ щыщ) Бойко Мариерэ (Ныджэпсыхъо щыщ), пащэр Инна Бойко), АкIэгъу Аленэрэ Нэгъуцу Шамилэрэ къуаджэу Агуй-Шапсыгъэ къикIыгъэх.
Адыгэ культурэм имэфэкIышхоу ТIуапсэ щыкIуагъэр зэлъашIэрэ ансамблэу «Ислъамыем» иконцерткIэ ухыгъэ хъугъэ, пщынаоу Мышъэ Андзауррэ орэдыIоу Эльдар Айдэмыррэ цIыфхэр бэрэ Iэгу афытеуагъэх.
Мы фестивалым къекIолIагъэхэм ацIэкIэ рэзэныгъэ гущыIэхэр къаIуагъэх ТIопсэ районым ипащэу Анатолий Русиным, Адыгэ Хасэм итхьаматэу КIакIыхъу Мэджыдэ ыкIи ТIопсэ районымкIэ Хасэм итхьаматэ игуадзэу Шъхьэлэхъо Сэфэр.
— Тирайон цIыф лъэпкъ 50-м ехъумэ ялIыкIохэр щэпсэух, зэкIэми пшъэрылъ шъхьаIэу тиIэр мамырныгъэр, зыпкъитыныгъэр, гъунэгъушIу зэфыщытыкIэхэр тишъолъыр къыщытыухъумэнхэр ары, — къыхигъэщыгъ муниципалитетым ипащэ. — Культурэмрэ искусствэмрэ цIыфхэр зэрапхых, нахь зэгурыIо ашIых, лъэпкъ зэхэдз ямыIэу ныбжьыкIэхэр дахэу, зэгурыIохэу псэунхэм фапIух. Мыщ фэдэ Iофтхьэбзэ шIагъом изэхэщакIохэм, зишIуагъэ къэзыгъакIохэрэм лъэшэу тафэраз.
Ныбэ Анзор.