Шъолъыр 80 хэлэжьагъ
Урысыем исурэт къэгъэлъэгъонэу «Нэпкъхэр» зыфиIорэр Мыекъуапэ щыкIуагъ.
Хэгъэгум культурэмкIэ и Министерствэ, Рязанскэ хэкум и Правительствэ, сурэттеххэм язэхэт IофшIапIэу «Нэпкъхэр», Адыгэ Республикэм культурэмкIэ и Министерствэ, Урысыем ифотосурэтышIхэм яшъолъыр къутамэу Адыгеим щыIэр, Мыекъуапэ икъэлэ сурэттех клубэу «Лэгъо— Накъэр» къэгъэлъэгъоным зэхэщакIо фэхъугъэх.
Сурэттеххэм яIофшIэгъи 10 къагъэлъэгъуагъ. Совет хабзэм илъэхъан ащ фэдэ Iофтхьабзэхэр зэхащэщтыгъэх. ПэшIорыгъэшъ къэгъэлъэгъонхэр шъолъырхэм ащыкIощтыгъэх, текIоныгъэр къыдэзыхыхэрэр хэгъэгум икIэух зэIукIэгъухэм ахагъэлажьэщтыгъэх.
Урысыем ишъолъыр 80-мэ ясурэттеххэм яIофшIагъэ зэфахьысыжьыгъ. Дэгъухэм анахь дэгъужьхэр Урысыем икъэгъэлъэгъон шъхьаIэ къырахьылIагъэх. Мыекъуапэ исурэттех клубэу «Лэгъо-Накъэм» опыт ин зиIэхэр хэтых. Хэгъэгу, дунэе зэIукIэгъухэм хагъэунэфыкIырэ чIыпIэхэр къащыдэзыхыгъэхэр клубым щагъэсагъэх.
— Дунаим ихэгъэгу 50 фэдизмэ ащыкIогъэ къэгъэлъэгъонхэм тахэлэжьагъ, — къытиIуагъ Адыгэ Республикэм исурэттеххэм я Союз ипащэу, Адыгэ Республикэм изаслуженнэ журналистэу Аркадий Кирнос. — ХагъэунэфыкIырэ чIыпIэхэр къыдэзыхыгъэхэр бэ мэхъух. Клубым нэбгырэ 30 хэт. ЕджапIэу къызэIутхыгъэм зыщызыгъасэ зышIоигъохэм IэпыIэгъу тафэхъу.
ТшIогъэшIэгъоных
Сурэтхэр щыIэныгъэм къыхэхыгъэх, уяплъызэ уадэгущыIэ пшIоигъоу зы чIыпIэм такъикъ заулэрэ ущытэу къыхэкIы. Рязань исурэттехэу Андрей Каревым «Къоджэ мэфэкIыр» тырихыгъ. ЦIыфхэр нэгушIох, мэфэкIыр зэдагощы. Мурманскэ щыщэу Виталий Новиковым Iугъор цIыфым шъхьарытэу къегъэлъагъо. ПсэупIэм изытет ащ къыщыхэогъэщы. Хьалыгъу фыжьыр кIэлэцIыкIум зэришхырэр Краснодар краим къыщытырахыгъ. Владимир Циммерлинг исурэт узыIэпещэ, цIыфхэм яIофшIагъэ уасэ фэошIы.
Унэм псэукIэу щыуиIэр сурэтым къыщыбгъэлъэгъон плъэкIыщт. Къалэу Тулэ исурэттехэу Алексей Макеевым тырихыгъэ сурэтымкIэ щагум дэт шыр, шхомлакIэр зыIыгъ нэнэжъыр зэдиштэхэу къегъэлъагъох. Шыр цIыфым иныбджэгъушIу, епIорэр зэхехы, нэшIукIэ къыоплъы…
Нижний Новгород щыщэу Игорь Ушаковым футбол ешIэрэ кIэлэцIыкIум сурэт тырихыгъ. КъэлэпчъэIутым сыда ыгу ихъыкIырэр? Командэр ащ къыщэгугъы. Челябинскэ, Санкт-Петербург, Тверь, фэшъхьафхэм ясурэтхэм гъэпсыкIэу яIэр гъэшIэгъон къэзышIырэр щыIэныгъэм къыхэхыгъэ едзыгъохэм сурэттехыр ахэлэжьэн зэрилъэкIырэр ары.
ЧIыпIэхэр
ЗэхэщакIохэм къэгъэлъэгъоным уасэ фашIыгъ. Челябинскэ хэкум апэрэ чIыпIэр къыдихыгъ. Адыгэ Республикэм ятIонэрэ чIыпIэр къыфагъэшъошагъ. Тверскэ хэкум ящэнэрэ чIыпIэр ыхьыгъ.
Аркадий Кирнос къызэрэтиIуагъэу, зэхэщакIохэм сурэт 5500-рэ къафагъэхьыгъ. Архангельскэ хэкур, Камчатскэ, Краснодар, Ставрополь крайхэр, Мурманскэ, Пензенскэ, Рязанскэ, Тверскэ, Челябинскэ хэкухэр, Адыгэ Республикэр анахь дэгъуи 10-мэ ащыщых.
Дышъэ медалыр Челябинскэ иклубэу «Мыжъо бгырыпхым» фагъэшъошагъ. Тыжьыныр Мыекъуапэ иклубэу «Лэгъо-Накъэм» къыдихыгъ. «Купым ипэщэ анахь дэгъу» зыфиIорэ щытхъуцIэр Аркадий Кирнос фагъэшъошагъ. Клубым хэтхэр: Наиль Баталов, Светлана Денисова, Артем Картавкин, Виктор Лутай, Марина Орлова, Олег Сивовалов, Виктория Сысоева, Татьяна Чипига.
«Нэпкъхэр» зыфиIорэ къэгъэлъэгъоныр финалым хэфэгъэ шъолъырхэм ащызэхащэнэу фитыныгъэ къыдахыгъ. Мыекъуапэ иадминистрацие культурэмкIэ и ГъэIорышIапIэ ипащэу Цэй Розэ къэгъэлъэгъоным игуапэу еплъыгъ. Адыгэ Республикэр искусствэм шIукIэ зэрэщашIэрэр тизэдэгущыIэгъу щыхигъэунэфыкIыгъ.
Сурэтхэм арытхэр: клубэу «Лэгъо-Накъэм» хэтхэр; Цэй Розэрэ Аркадий Кирносрэ къэгъэлъэгъоным гущыIэгъу щызэфэхъугъэх.