ЩыIэныгъэр — иорэд
Адыгэ лъэпкъым икомпозитор цIэрыIоу Тхьабысымэ Умарэ къызыхъугъэр илъэси 100 зэрэхъугъэм ехьылIэгъэ къэгъэлъэгъоныр республикэм и Лъэпкъ тхылъеджапIэ щыкIуагъ.
Лъэпкъ литературэм, краеведением яотдел ыгъэхьазырыгъэ къэгъэлъэгъоным композиторым ехьылIэгъэ тхылъхэр, журналхэмрэ гъэзетхэмрэ къащыхаутыгъэ тхыгъэхэр гъэшIэгъонэу щызэрагъэфэгъагъэх. У. Тхьабысымэм ипроизведениехэри чIыпIэ хэхыгъэхэм ащыплъэгъунхэу щытыгъэх.
ШIэныгъэлэжьхэм, искусствэм иIофышIэхэм, кIэлэегъаджэхэм, студентхэм ящыкIэгъэ литературэр къыхахынымкIэ, композиторым ищыIэныгъэ гъогу нахьышIоу зыщагъэгъозэнымкIэ къэгъэлъэгъоныр IэпыIэгъушIу афэхъугъ.
Орэд 600 фэдиз композиторым ыусыгъ. ШIулъэгъум, къуаджэхэм, ныбджэгъухэм, щыIэкIэ-псэукIэм, нэмыкIхэм афэгъэхьыгъэхэр цIыфхэм агу рехьых, къаIох. Искусствэм хэшIыкI фызиIэхэм анахьэу къыхагъэщырэр У. Тхьабысымэм иорэдхэр лъэпкъ орэдхэу, цIыф къызэрыкIохэм зэхалъхьагъэхэу къащыхъоу бэрэ къызэрэхэкIырэр ары.
— «Пшъэшъэуджыр» нахьыпэкIи зэхэсхыщтыгъ, лъэшэу сыгу зэрэрихьырэм фэшI сэри къасIо сшIоигъуагъ, — къеIуатэ Урысыем, Абхъазым язаслуженнэ артисткэу, Адыгеим инароднэ артисткэу Нэхэе Тэмарэ. — Орэдыр зэзгъэшIэнэу сызыфежьэм, Тхьабысымэ Умарэ зэриусыгъэр тхылъымкIэ сшIагъэ.
— Эстрадэм нахь куоу сыхэхьанымкIэ Тхьабысымэ Умарэ иорэдхэр лъэпэмафэ сфэхъугъэх. «О унитIу» зыфиIорэмкIэ эстрадэм сыщашIагъ, — къытиIуагъ Урысыем изаслуженнэ артисткэу, Адыгеим инароднэ артисткэу Шъэожъ Розэ.
«Орэдыр о зигъэгъус», «О унитIу», «Адыгэ къуаджэхэр», «Сыфаеп уи «Волгэ» фыжьи», «Сикъуадж», «Синан», нэмыкI орэдхэр Жэнэ Къырымызэ игущыIэхэм атехыгъэх. Поэтыр къытхэтыгъэмэ, мыгъэ ыныбжь илъэси 100 хъущтыгъэ.
Адыгэ литературэмрэ музыкальнэ искусствэмрэ уатегущыIэ зыхъукIэ, 2019-рэ илъэсыр Тхьабысымэ Умарэрэ Жэнэ Къырымызэрэ я Илъэсэу плъытэ хъущт.
2019-рэ илъэсыр шIукIэ зыгу къэкIыжьыщтхэм ащыщ адыгэ лъэпкъым итхэкIо цIэрыIоу МэщбэшIэ Исхьакъ. «Урысыем IофшIэнымкIэ и ЛIыхъужъ» зыфиIорэ щытхъуцIэр ащ къыфаусыгъ.
«Сишъэогъу», «СшIэщтыгъэр сшIэрэп усимыIагъэмэ», фэшъхьаф орэдхэу У. Тхьабысымэм ыусыгъэхэр МэщбэшIэ Исхьакъ игущыIэхэм атехыгъэх. ТхакIомрэ композиторымрэ зэгъусэхэу Адыгэ Республикэм и Гимн зэрэзэдаусыгъэм ятворческэ IофшIагъэ лъэпсэ шъхьаф фишIыгъ.
Адыгэ Республикэр пытэу ылъэ теуцуагъ, къэралыгъо гъэпсыкIэм тетэу мэпсэу. Конституциер, Гербыр, Гимныр, быракъыр иIэх. Хэбзэ къулыкъушIэхэм язэхахьэхэм, спорт зэнэкъокъухэм, нэмыкIхэм Адыгэ Республикэм и Гимн ащэжъынчы.
Композиторэу Тхьабысымэ Умарэ Хэгъэгу зэошхом лIыхъужъэу хэлэжьагъ, изэо гъогухэр Германием нэсыгъэх. Фашист техакIохэм язэхэкъутэн лIыгъэу щызэрихьагъэмкIи, лъэпкъ музыкальнэ искусствэм хэхъоныгъэу ригъэшIыгъэмкIи тэгъэлъапIэ.