«Ислъамыем» къыщежэх
Адыгэ культурэм ифестивалэу «Шапсыгъэ» инэбзыйхэр» зыфиIорэр шышъхьэIум и 23-м ТIуапсэ щыкIощт.
— Лъэпкъ фестивалыр илъэс къэс зэхащэ. ХышIуцIэ Iушъом щыпсэухэрэ къуаджэхэр зэхахьэм хэлэжьэщтых. Iофтхьабзэм тэри тырагъэблэгъагъ, — къытиIуагъ Адыгэ Республикэм и Къэралыгъо орэдыIо-къэшъокIо ансамблэу «Ислъамыем» ипащэ игуадзэу, Адыгэ Республикэм инароднэ артистэу Мышъэ Андзаур, — фестивалыр гъэшIэгъон хъущтэу тэлъытэ.
— «Ислъамыер» зэрэхэлэжьэщт шIыкIэр къытаIоба.
— Концерт хэхыгъэ пчыхьэм къэттыщт. Фестивалым хэлэжьэщтхэм осэшI купыр алъыплъэщт, анахь дэгъухэу къыхахыгъэхэр кIэух зэхахьэм къырагъэблэгъэщтых.
— ЗэхэщакIохэм пшъэры-лъэу зыфашIыжьыгъэр къышъуаIуагъа?
— Адыгабзэр, лъэпкъ шэн-хабзэхэр къызэраухъумэхэрэр фестивалым къыщагъэлъэгъощтых. ШIэжь яIэу ныбжьыкIэхэр пIугъэнхэр яIофыгъо шъхьаIэхэм ащыщ.
— Зыгъэпсэфыгъо уахътэр «Ислъамыем» ыухыгъ, IофшIэныр ригъэжьэжьыгъ. Шъуигухэлъхэр сыд фэдэха?
— Адыгэкъалэ и Мафэ Iоныгъом и 14-м агъэмэфэкIыщт. Зэхахьэм тыхэлэжьэнэу зытэгъэхьазыры. Адыгэкъалэ фэгъэхьыгъэ орэдыр мэфэкIым къыщытIощт.
— Чъэпыогъу мазэм Краснодар краим и Северскэ район шъукIощтэу зэ къысэпIогъагъ.
— Северскэ районым имэфэкI тырагъэблэгъагъ. «Ислъамыем» зэхахьэм концерт къыщитыщт. Адыгеимрэ Северскэ районымрэ язэпхыныгъэхэр гъэпытэгъэнхэм фэгъэхьыгъэ Iофыгъохэр дгъэцэкIэщтых.
Хэгъэгум къыщитыщтхэ концертхэр
— Бжыхьэм «Ислъамыем» Урысыем къыщитыщтхэ концертхэм тигъэзетеджэхэр къакIэупчIэх.
— Урысыем культурэмкIэ и Министерствэ советэу зэхищагъэм Урысые Федерацием и Правительствэ игрантхэр зыфагъэшъошэщтхэр къыхихыгъэх. 2019-рэ илъэсым телъытагъэу творческэ проект 15-мэ ацIэхэр къыраIуагъэх. Адыгэ Республикэм и Къэралыгъо филармоние ипроектэу къыхахыгъэр «Бзыикъо зау» зыфиIорэм техыгъэ апэрэ адыгэ оперэр ары.
— Урысыем инароднэ артистэу, композиторэу Нэхэе Аслъан ыусыгъэ оперэр ары тызытегущыIэрэр.
— Оперэр симфоническэ шIыкIэм тетэу къэдгъэлъэгъощт. Республикэм и Къэралыгъо филармоние и Къэралыгъо симфоническэ оркестрэ идирижерэу СтIашъу Къэплъан япащэу музыкантхэм произведениер агъэжъынчыщт.
— «Ислъамыем» иорэдыIохэм…
— Оперэр тиорэдыIохэм къаIощт.
— Адыгэ Республикэр искусствэм лъагэу «Ислъамыем» щеIэты.
— Художественнэ пащэу, композитор цIэрыIоу Нэхэе Аслъан ыусыгъэ произведениехэр Урысыем, IэкIыб къэралыгъохэм ащашIэх.
— Урысыем инароднэ артистэу, композиторэу Нэхэе Аслъан иIофшIагъэ цIыфхэм алъызыгъэIэсын зылъэкIырэ ансамблэ зэрэтиIэм тегъэгушхо. Сыдигъо концертхэр ежъугъажьэхэра?
— Iоныгъо мазэм и 23-м тыублэщтых. ШэкIогъум и 8-м нэс хэгъэгум ишъолъырхэм «Ислъамыем» концертхэр къащитыщтых.
— Къалэхэм ацIэхэр къытфеIоба.
— Ростов-на-Дону, Элиста, Астрахань, Волгоград, Москва, Казань, Ермэлхьабл, Щэрджэскъал, Налщык, Ставрополь тиконцертхэр ащыкIощтых. Краснодар пчыхьэзэхахьэ щызэхэтщагъ.
Кавказ имамыр
— Чъэпыогъум и 2 — 5-м «Кавказ имамыр» зыфиIорэ фестивалыр Мыекъуапэ щыкIощт.
— Адыгэ Республикэм имэфэкI мафэхэм атефэу фестивалыр зэхащэ. Къыблэм, Темыр Кавказым ятворческэ купхэр, шэны зэрафэхъугъэу, зэIукIэщтых. «Ислъамыер» Адыгэ Республикэм ыцIэкIэ фестивалым хэлэжьэщт.
— Андзаур, Тыркуем, Абхъазым джырэблагъэ шъуащыIагъ. Урысыем ишъолъырхэр къышъожэх.
— Концертхэм зафэтэгъэхьазыры. ХъокIо Сусанэ, Дзыбэ Руслъан, Агъыржьэнэкъо Саныет, Тыгъужъ Асыет, Къумыкъу Щамсудинэ, Шъымырзэ Казбек, Эльдарэ Айдэмыр, Нэгъой Азэ, ГуашIэ Светланэ, МэщбэшIэ Саидэ, нэмыкIхэм тилъэпкъ искусствэ ибаиныгъэ хэгъэгум къыщагъэлъэгъощт.
— Шъуигухэлъхэр къыжъудэхъунхэу шъуфэтэIо.
— Тхьауегъэпсэу.