Алинэ «Адыифым» къыхэнэжьы
Европэм гандболымкIэ изэнэкъокъу Словением щыкIуагъ. Илъэс 17-м нэс зыныбжь пшъашъэхэр медальхэм афэбэнагъэх.
Урысыем ихэшыпыкIыгъэ командэ хэтхэу гандбол клубэу «Адыифым» иешIэкIуи 7 зэIукIэгъухэм ахэлэжьагъэх. Апэрэ чIыпIэр Венгрием къыдихыгъ. Швецием тыжьыныр ыхьыгъ, джэрзыр Францием фагъэшъошагъ. Урысыем ятфэнэрэр къыдихыгъ. Юлия Баевар, Мария Кучеренкэр, Алина Морозовар, Юлия Кожубековар хэгъэгум ихэшыпыкIыгъэ командэ щешIагъэх. М. Кучеренкэр командэм икапитаныгъ.
Мыекъуапэ испорт еджапIэу Джэнчэтэ СултIан ыцIэ зыхьырэм зыщызыгъэсэгъэ Юлия Баевар Европэм иныбжьыкIэ хэшыпыкIыгъэ командэ хагъэхьагъ. Джабгъу лъэныкъомкIэ гупчэм анахь дэгъоу щешIагъэу зэхэщакIохэм къыхахыгъэ Ю. Баевар тренерэу Никита Голуб егъасэ.
— Европэм изэIукIэгъухэм ахэлэжьагъэхэ типшъашъэхэр суперлигэм щешIэнхэу «Адыифым» едгъэблэгъагъэх, — къытиIуагъ Урысыем изаслуженнэ тренерэу, тикомандэ итренер шъхьаIэу Александр Реввэ. — ТиныбжьыкIэхэм бэкIэ тагъэгугъэ. — Спорт еджапIэм къычIатIупщыгъэхэ нэмыкI ешIакIохэри «Адыифым» аштагъэх, — зэдэгущыIэгъур лъегъэкIуатэ Мыекъуапэ иадминистрацие физкультурэмкIэ ыкIи спортымкIэ и Комитет итхьаматэу Дмитрий Щербаневым. — Диана Казихановар, Ангелина Куцеваловар, фэшъхьафхэри «Адыифым» дэгъоу щешIэнхэ алъэкIыщт.
Урысыем икомандэхэу суперлигэм хэтхэр типшъашъэхэм ащыщхэм къалъэплъэх, якъалэхэм арагъэблагъэхэ ашIоигъу. IэпэIэсэныгъэ зыхэлъ ешIэкIо ныбжьыкIэхэр «Адыифым» пытэу хэуцонхэу игъо имыфэхэзэ нэмыкI командэхэм ащешIэнхэу зэрэфежьэхэрэр гухэкI.
Алина Морозовам Урысыем икомандэ анахь дэгъухэм ащыщхэр къеджагъэх нахь мышIэми, «Адыифым» къыхэнэжьыгъ. Адыгэ Республикэм икомандэ Алинэ щешIэ зэрэшIоигъор лъэшэу тигуапэ.
Сурэтым итыр: Алина Морозовар.