Тыркуемрэ Адыгэ Республикэмрэ язэпхыныгъэхэр культурэм щагъэпы­тэ­ным фэшI зэзэгъыныгъэу зэдашIыгъэхэм ахэхьэхэрэ Iофтхьабзэхэр зэхащэх.

Адыгэ культурэм ифестиваль шышъхьэIум и 15 – 19-м Тыркуем икъуаджэу Хаусай щыкIощт. Зэлъэпкъэгъухэм язэхахьэ хэлажьэх Адыгеим илIыкIохэр. КIэ­лэцIыкIу театральнэ зыгъэсапIэу «Щыгъыжъыер», орэдыIоу Цышэ Зарет, Тэхъутэмыкъое районым иансамблэу «Уджыр», нэмыкI­хэри.

Республикэ общественнэ движениеу «Адыгэ Хасэм» итхьаматэ игуадзэу Бэгъушъэ Алый купым ипащ. Ащ къызэрэтиIуагъэу, адыгэ культурэм и Дунэе фестиваль тиныбжьыкIэхэм дэгъоу зыфагъэ­хьазырыгъ.

— Адыгабзэр нахьыбэрэ зэхахы, нахьышIоу зэрагъашIэ ашIоигъоу Тыркуем тилъэпкъэгъу­хэу исхэм тырагъэблэгъагъ, — къеIуатэ «Щыгъыжъыем» ихудожественнэ пащэу, Урысыем иза­служеннэ артисткэу, Адыгэ Республикэм инароднэ артисткэу, медалэу «Адыгеим и Щытхъузехьэр» къызыфагъэшъошагъэу Уджыхъу Марыет. — Фестивалым ыуж «Щыгъыжъыем» ипчыхьэзэхахьэхэр къалэхэм, къуаджэхэм ащыкIощтых.

ЗэлъашIэрэ археологэу, Адыгэ Республикэм культурэмкIэ изаслуженнэ IофышIэу, зихэку къэ­зыгъэзэжьыгъэхэр хэзыгъэгъозэ­жьырэ Унэм — ДАР-м ипащэу, Урысыем ижурналистхэм я Союз хэтэу Тэу Аслъан фестивалым рагъэблэгъагъ.

— Зэлъэпкъэгъухэм язэIукIэ сигуапэу сыхэлэжьэщт, ащ фэдэ зэхахьэхэу псэ зыпытхэр лъэшэу тищыкIагъэх, — къытиIуагъ Тэу Аслъан.

«Щыгъыжъыем» хэтхэ Беданыкъо Тембот, Цопсынэхэу Эльбрузрэ Налбекрэ, пшъэшъэжъыехэм фестивалым мэхьэнэ ин раты. Ащ дакIоу къуаджэхэм зэращыIэщтхэм фэшI мэгушIох. Тилъэпкъэгъухэм нэIуасэ афэ­хъущтых, ныбджэгъуныгъэ зэда­шIыщт.

— Сигуапэу адыгэ орэдхэр къафэсIощтых, адыгабзэм Тыркуем щыфэныкъох, — игупшысэхэм тащегъэгъуазэ Къэралыгъо телерадиокомпаниеу «Адыгеим» ижурналистэу, орэдыIоу Беданыкъо Замирэ.

ТелефонкIэ къатыгъ: — Ти ЛIышъхьэу КъумпIыл Мурат Тыр­куем зэкIом къэралыгъом ипащэхэм зэзэгъыныгъэу адишIыгъэхэр щыIэныгъэм щыпхырытэщых. Культурэм, искусствэм яамалхэр нахьышIоу зэрэдгъэфедэщтхэм тыпылъ. Адыгеим икIыгъэ творческэ купыр Тыркуем нэсыгъ. Къайсэр дэт хьакIэщым тилIыкIохэр къыщыуцугъэхэу гущыIэгъу сафэхъугъ. Сэлам фабэ къытахыжьыгъ. Фестивалым, зэIукIэгъухэм, къэгъэлъэгъонхэм ахэлэжьэнхэу загъэхьазыры, — къы­ти­Iуагъ республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзанэ.

Сурэтым итхэр: «Щыгъыжъы­ем» хэтхэр, творческэ купыр зыгъэкIотэжьыгъэхэр.

ЕМТIЫЛЪ Нурбый.