Адыгэ Республикэм и Лъэпкъ музей тыгъуасэ къыщызэIуахыгъэ къэгъэлъэ­гъо­ныр археологэу Алексей Резепкиным иIофшIагъэ фэгъэхьыгъ.

Тарихъ шIэныгъэхэмкIэ кандидатэу, археологэу А. Резепкиныр Челябинскэ хэкум къыщыхъугъ. Ленинград, нэмыкI къалэхэм ишIэныгъэхэм ащыхи­гъэ­хъуагъ. 1979-рэ илъэсым къы­щыублагъэу тарихъ пкъыгъо­хэр зычIэлъхэ Iуашъх­ьэхэм ятIэ. Те­мыр Кавказым, Адыгеим, Краснодар краим, Къэрэщэе-Щэр­джэсым, Абхъазым, нэмыкI­хэм къащигъотыгъэхэр музейхэм къащагъэлъагъох.

Алексей Резепкиным ыныбжь илъэс 70-рэ зэрэхъугъэм, археологым и Мафэ афэгъэхьыгъэ къэгъэлъэгъонэу Лъэпкъ музеим къыщызэIуахыгъэм шIэныгъэлэжьхэр, культурэм иIофышIэхэр, Тыркуем ыкIи Иорданием къарыкIыгъэ тилъэпкъэгъухэр хэлэжьагъэх.

Музеим ипащэу Джыгунэ Фатимэ пэублэ гущыIэкIэ зэхахьэр къызэIуихыгъ. Культурэм иIофышIэхэу Владимир Эрлих, ЦIыпIынэ Рустем, нэмыкIхэри зэIукIэгъум къыщыгущыIагъэх. Дискым тыратхагъэхэ тарихъ хъугъэ-шIагъэхэр, А. Резепкиным фэгъэхьыгъэхэр телевизорымкIэ къагъэлъэгъуагъэх.

Музеим археологиемкIэ иотдел ипащэу Елена Черных археологэу А. Резепкиным ищыIэныгъэ гъогу къытегущыIагъ, къэгъэ­лъэ­гъоным ехьылIэгъэ къэбархэм ащигъэгъозагъэх.

Ижъырэ пкъыгъохэу къошынхэр, гъучIым хэшIыкIыгъэхэр музеим къыщагъэлъагъох. Ды­шъэм хэшIыкIыгъэхэ тхыпхъэ­хэр, хьэ цIыкIу­хэм ясурэтхэр гъэшIэгъоных, да­хэх. Тиреспубликэ ипсэупIэу Ново­свободнэм ахэр къыщигъотыгъэх.

— Алексей Резепкиным археологиер ищыIэныгъ, — къыти­Iуагъ тарихъ шIэныгъэхэмкIэ докторэу Владимир Эрлих. — Адыгеим итарихъ, икультурэ нахьышIоу зэгъэшIэгъэнхэм иIахьышIу хи­шIыхьагъ. ЧIым чIэлъыр къэбгъотыныр, цIыфхэм ар алъыбгъэ­Iэсыныр гъэшIэгъоны.

Сурэтхэм арытхэр: къэгъэлъэ­гъоным щыщхэр; Елена Черных къэгъэлъэгъоным къытегущыIэ.

ЕМТIЫЛЪ Нурбый.