Хэгъэгум футболымкIэ иапшъэрэ куп хэт командэхэми яплIэнэрэ ешIэгъухэр шышъхьэIум и 10 – 12-м яIагъэх.

Зэфэхьысыжьхэр

«Оренбург» — «Тамбов» — 2:2, «Краснодар» — «Рубин» — 1:0, «Динамо» — «Зенит» — 0:2, «Арсенал» — «Уфа» — 1:0, «Локомотив» — «Урал» — 4:0, ЦСКА – «Сочи» — 0:0, «Ахмат» — «Спартак» — 1:3, «Ростов» — «Крылья Советов» — 1:0.

Къэбэртэе-Бэлъкъарым щапIугъэ Р. Мырзэр блэкIыгъэ илъэс зэнэкъокъум «Арсенал» Тула щешIагъ. Нарт шъаор иIэпэIэсэныгъэкIэ къахэщыгъ, Урысыем ихэшыпыкIыгъэ командэ рагъэ­блэгъагъ. 2019 – 2020-рэ илъэс зэнэкъокъум Р. Мырзэр командэ цIэрыIоу «Спартак» Москва щешIэ. Тренер шъхьаIэу Олег Кононовыр бэкIэ къыщэгугъы.

«Зенит», «Ростов», ЦСКА, «Краснодар», «Спартак», «Локомотив», «Арсенал», нэмыкI командэхэр апэрэ чIыпIэхэм афэбанэх. Урысыем имедальхэр къызэрэдахыщтхэм дакIоу, Европэм икубокхэм афэгъэхьыгъэ зэIукIэгъухэм ахэлажьэхэ ашIоигъу.

«Краснодар» лъэ­кIуатэ

Гъунэгъу кра­им икомандэу «Краснодар» Европэм ичемпионхэм я Кубок икъыдэ­хын апэрэу хэлажьэ. ПэшIорыгъэшъ ешIэгъоу Краснодар щыкIуагъэм Пор­тугалием икомандэу «Порту» 1:0-у къыщытекIуагъ. ЯтIонэрэ зэIукIэгъоу Португалием щызэхащагъэм «Краснодар» 3:2-у текIоныгъэр къыщихьыгъ.

Я 3-рэ такъикъым «Краснодар» бысымхэм якомандэ икъэлапчъэ Iэгуаор дидзагъ. ЕшIэкIо ныбжьыкIэу М. Сулеймановыр ошIэ-дэмышIэу ыпэкIэ илъызэ, «Порту» икъэлапчъэ гъогогъуитIо Iэгуаор дидзагъ. Пчъагъэр 3:0-у «Краснодар» къыхьызэ, М. Сафоновым къыухъумэрэ къэлапчъэм тIогъогогъо Iэгуаор «Порту» къыди­дзагъ. «Краснодар» 3:2-у текIоны­гъэр къыдихыгъ.

«Краснодар» зэнэкъокъум щы­лъэкIуатэ, зичэзыу ешIэгъум Грецием икомандэу «Олимпиакосым» щыIукIэщт.