ЩыIэныгъэр къэгъэлъэгъонхэм ахэтэлъагъо
Адыгэ Республикэм и Камернэ музыкальнэ театрэу Хьанэхъу Адамэ ыцIэ зыхьырэм ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс илъэс IофшIэгъур зэраухыгъэм, пшъэрылъэу зыфашIыжьыгъэм къатегущыIэнэу телъэIугъ.
— Театрэм и Илъэс хэгъэгум щэкIо. Фестиваль-зэнэкъокъухэм, пчыхьэзэхахьэхэм тахэлажьэ. ТапэкIэ тызэрэлъыкIуатэрэр IофшIагъэу щыIэм къыхэщы, — къеIуатэ Сулейманов Юныс.
— Илъэс IофшIэгъум изэфэшIыжьын фэгъэхьыгъэ зэхахьэм тигуапэу тыхэлэжьагъ. УпчIэ гъэшIэгъонхэр театрэм къэкIуагъэхэм къяшъутыгъэх.
— Спектаклэу зэплъыгъэхэм, рольхэр къэзышIыхэрэ артистхэм, къэгъэлъэгъонхэр зыщызэхэтщагъэхэ къалэхэм, районхэм, нэмыкIхэм афэгъэхьыгъэ упчIэхэр зэхахьэм хэлэжьагъэхэм агу рихьыгъэх. Джэуапхэр анахь дэгъоу къэзытыжьыгъэхэм шIухьафтынхэр афэтшIыгъэх.
Зэфэхьысыжьхэр
— Илъэс IофшIэгъум изэфэхьысыжь фэгъэхьыгъэ зэхахьэм культурэм иIофышIэхэр къыщыгущыIагъэх.
— Адыгэ Республикэм культурэмкIэ иминистрэу Аулъэ Юрэ театрэм икъэгъэлъэгъонхэм цIыфыбэ зэряплъырэр хигъэунэфыкIыгъ.
— Камернэ музыкальнэ театрэм икъэгъэлъэгъонхэм яплъыщтхэ цIыфхэр иIэх. Адыгеим имызакъоу, Краснодар краим ирайонхэм къарыкIырэр макIэп. Культурэм пыщагъэхэм театрэр ашIогъэшIэгъон, — Аулъэ Юрэ къыIуагъ.
— Театрэм иныбджэгъухэм япчъагъэ зэрэхахъорэр министрэм хигъэунэфыкIыгъ.
— Урысыем, Абхъазым, Къэбэртэе-Бэлъкъарым, Пшызэ язаслуженнэ артистэу, Адыгеим инароднэ артистэу Зыхьэ Заурбый репертуарым, артиcтхэм афэгъэхьыгъэу къыIуагъэм тигъэгушIуагъ.
— Урысыем итеатрэхэм яIофышIэхэм я Союз икъутамэу Адыгэ Республикэм щыIэм ипащэу Зыхьэ Заурбый бэрэ IэпыIэгъу къытфэхъу. Спектаклэхэм якъыхэхын, якъэгъэлъэгъон, артистхэм Iоф зэрадэтшIэщтым, фэшъхьафхэм афэгъэхьыгъэу Зыхьэ Заурбый упчIэжьэгъу тэшIы. Театрэр шIу зыщалъэгъурэ унагъом ар щэпсэу. ЦIыф цIэрыIоу щыт.
— Адыгэ-Абхъаз Дунэе фестивалэу «Кавказский меловой кругым» Зыхьэ Заурбый нэбгырабэмэ ащыIукIагъ.
— Псэ зыпытхэ зэдэгущыIэгъухэр зэхэзыщэхэрэр культурэм щагъэлъапIэх. Аулъэ Юрэ, Зыхьэ Заурбый щытхъоу къытфаIуагъэм дакIоу, тапэкIэ тызэрэлъыкIотэщтым еплъыкIэу фыряIэр къыхагъэщыгъ.
— Сыда анахьэу шъунаIэ зытешъудзагъэр?
— Уахътэм диштэу репертуарыр къыхэтхыщт, цIыфхэм талъыIэсыщт.
— Щысэ къытфэпхьыгъэмэ дэгъугъэ.
— Репертуарым спектаклэхэу хэтхэр мазэ къэс зэ къэтэгъэлъагъох. Кощхьэблэ, Тэхъутэмыкъое районхэм, нэмыкIхэм тикъэгъэлъэгъонхэр ащыкIуагъэх. Районхэм нахьыбэрэ талъыIэсын фае.
— Краснодар щызэхащэгъэ фестивальхэм щытхъуцIэхэр къащыдэшъухыгъэх. Зэфэхьысыжьхэр тигъэзет къыщыхэтыутыгъэх. ШъуапэкIэ шъузэрэлъыкIотэщтым тытегъэгущыI.
— Композиторэу Тхьабысым Умарэ, тхакIоу Жэнэ Къырымызэ илъэси 100 зэрэхъухэрэр мыгъэ игъэкIотыгъэу хэтэгъэунэфыкIых. КIэрэщэ Тембот ытхыгъэм техыгъэу «Шахъомрэ пшъэшъэ пагэмрэ» зыфиIорэ къэгъэлъэгъоным музыкэу щыIурэр Тхьабысым Умарэ ыусыгъ. Фестивалэу «Пшызэ театральнэм» музыкэр зэрэщыдгъэфедэгъэ шIыкIэр зэхэщакIохэм къыхагъэщыгъ, шIухьафтын титеатрэ къыфагъэшъошагъ.
— Спектаклэм артистхэм ярольхэр дэгъоу къыщашIыгъэх.
— Iэбэнэкъо Рустам, Ирина Кириченкэм, Бэгъ Алкъэс, Елена Лепиховам, Виктор Серебрянскэм, ЛIый Беллэ, Александр Степановым, нэмыкIхэм сакъыщытхъу сшIоигъу. Дирижерэу Аркадий Хуснияровыр, къэшъуакIохэм япащэу Исуп Аслъан, орэдыIохэм Iоф адэзышIэрэ Михаил Арзумановыр, фэшъхьафхэри къыхэзгъэщынхэу сыфай. Композиторэу Андрей Семеновым лъэшэу тыфэраз.
Уахътэм телъытагъэу
— ШIэжьым, лIыхъужъныгъэм, комедием афэгъэхьыгъэхэ къэгъэлъэгъонхэм тяплъы. АдыгабзэкIэ къэшъушIырэр макIэба?
— Ар тэрэз. Цэй Ерстэм ытхыгъэу «Угощэ дэгъумэ, урихьылIагъ» зыфиIорэр икIэрыкIэу дгъэуцужьыщт. Къуекъо Налбый ытхыгъэхэм ащыщэу «ЦэIунэжърэ шъэожъыемрэ» къэдгъэлъэгъощт. «ШIулъэгъуныгъэр мэшIошху» зыфиIорэм, нэмыкIхэм Iоф адэтэшIэ. Къэбэртэе-Бэлъкъарым итхэкIо цIэрыIоу IутIыжъ Борис ипьесэу «Тыргъэтаор» шIэхэу дгъэуцущт. УрысыбзэкIи къэдгъэлъагъохэрэм адыгэ лъэпкъ гупшысэр ахэлъэу дгъэпсыщтых.
— Натхъо Джанхъот иорэдышъохэр, Мурэтэ Чэпай ытхыгъэхэм ащыщхэр, фэшъхьафхэри спектаклэхэм ахэжъугъэхьащтхэу зэ къысэпIогъагъ.
— Театрэм зедгъэушъом- бгъущт. Къырым щыкIогъэ фестивалым тыхэлэжьагъ, зэфэхьысыжьхэм такъыпкъырыкIызэ уахътэм диштэхэрэ къэгъэлъэгъонхэр тэгъэхьазырых.
— Юныс, театрэм и Илъэс чанэу шъухэлажьэ. 2020-рэ илъэсыр къызэрыкIоу щытыщтэп. ТекIоныгъэм ия 75-рэ илъэс дгъэмэфэкIыщт. Олимпиадэ джэгунхэр щыIэщтых.
— IофшIэнэу тиIэр бэ. ТищыкIэгъэ артистхэм якъыхэхын, репертуарым, нэмыкIхэм яхьылIэгъэ гупшысэхэм гумэкIыгъо ахэмылъэу къыуасIорэп. КультурэмкIэ Министерствэм пшъэрылъэу къытфишIыхэрэр дгъэцэкIэщтых. Къэбэртэе-Бэлъкъарым, Краснодар краим, фэшъхьафхэм тикъэгъэлъэгъонхэр ащыкIощтых.
— IофшIагъэу шъуиIэм хэжъугъэхъонэу шъуфэтэIо.
— Тхьауегъэпсэу.
ЕмтIылъ Нурбый. Сурэтхэр пчыхьэзэхахьэм къыщытетхыгъэх.