Адыгэ лъэпкъыр къэшъо, мэуджы…
Адыгэ лъэпкъыр зэфэзыщэрэ Дунэе зэхахьэу «Хэгъэгу джэгушхор» бэдзэогъум и 31-м Къэбэртэе-Бэлъкъар Республикэм икъэлэ шъхьаIэу Налщык щыкIуагъ. Хэгъэгу зэфэшъхьафхэм ащыпсэухэрэ тилъэпкъэгъухэр зэIукIэгъу фабэм къыщызэрэугъоигъэх, яшэн-хабзэхэр, якультурэ, ятарихъ зэрагъэлъапIэрэр къаушыхьатыгъ.
Адыгэхэр зэзыпхырэ джэгушхор мы илъэсым ящэнэрэу зэхащагъ. Апэрэр Налщык щашIыгъагъ, блэкIыгъэ илъэсым Адыгеим тилъэпкъэгъухэр къеблэгъагъэх. Мыгъэ джыри Налщык щызэIукIэжьыгъэх. Абхъазхэм ацIэкIэ щыт гупчэм щыжъотыгъ. Америкэм, Тыркуем, Израиль, Иорданием, ткъош республикэхэм ащыIэхэ адыгэхэр уджынхэу, лъэпкъ мэкъамэр чыжьэу агъэIунэу къыщызэрэугъоигъэх.
Iофтхьабзэм изэхэщакIохэм ащыщэу, Нарт-Хэку Хасэм ипащэу Ашхъот Анзор къызэриIуагъэмкIэ, ныбжьыкIэхэм ялъэпкъ шэн-хабзэхэр аIэкIэмызынхэм мыщ фэдэ зэIукIэхэр фэлажьэх.
— Хэгъэгу джэгушхор нахь гъэшIэгъонэу зэрэтшIыщтым илъэс къэс тыдэлажьэ, — къытфеIуатэ тигущыIэгъу. — Мыгъэ къэшъонымкIэ зэнэкъокъу закъоу щымытэу, ныбжьыкIэхэр щыIэныгъэм езыгъэгупшысэнхэ къэгъэлъэгъонхэр пхырыщыгъэщтых. «Ачъэм икъашъо» ахэм ащыщ. Тэрэзэу мызекIорэ цIыфым гупшысэ пхэнджхэр зэрэфэпшIырэр къыраIотыкIыщт. Къэзэрэугъоигъэхэм еплъын-хэм, тапэкIэ зэфэхьысыжьхэр ашIынхэм ар афэIорышIэщт. Джащ фэдэу анахь дэгъоу къэшъуагъэхэр зэрэхэдгъэунэфыкIыщтхэм дакIоу, адыгэ мэкъамэхэр зыгъэжъынчыхэрэ ныбжьыкIэхэри дгъэшIощтых.
ДжэгуакIохэм зэращэ
Нэфышъ Тимур, Битэкъо Науркъан, НакIэ Аслъан Хэгъэгу джэгушхор зэращэ. Адыгэ шъуашэхэр ащыгъхэу пчэгум къихьагъэх.
— Мыщ фэдэ джэгухэм яшIуагъэкIэ адыгэ лъэпкъыр зэрэлъэгъу, ныбжьыкIэхэр нахь зэрэшIэх, — къытфеIуатэ джэгуакIоу Нэфышъ Тимур. — Адыгэ Iанэр лъэкъуищ, ащ къыкIэлъыкIоу хьатыякIуищыр джэгум зафэу итымэ теплъыгъ. Тинахьыжъхэм унашъо къытфашIэу, ныбжьыкIэхэр зэкъотхэу типчыхьэзэхахьэ чэфэу редгъэкIокIын гухэлъ тиI.
Нэфышъ Тимур нысэщэ джэгухэр зэрищэхэ зыхъукIэ, хъохъу дахэхэр, гупшысэ куу зыхэлъ псалъэхэр къеIох, ау Хэгъэгу джэгушхор ахэм атекIы.
— Зинасып къэкIонэу щыт кIалэхэр, пшъашъэхэр пчэгум къыщызэрэугъоигъэх, — игущыIэ лъегъэкIуатэ Тимур. — Ащ къыхэкIэу непэ дгъэхьазырыгъэхэ хъохъухэр нахьыбэрэм тиныбжьыкIэхэм афэгъэхьыгъэщтых.
Битэкъо Науркъан къызэриIуагъэмкIэ, Хэгъэгу джэгушхор илъэсым зэ зэрашIырэр. Ащ къыхэкIэу ар зэрифэшъуашэу рекIокIыным, къекIолIагъэхэм агу къинэжьыным яшъыпкъэу пылъыгъэх.
— Сэ сишIошIкIэ, дунаим щыпсэухэрэ адыгэхэр тилъэпкъ къашъо зэрепхых, нахь зэпэблагъэ ешIых, — игупшысэхэмкIэ къыддэгуащэ Науркъан. — АщкIэ нэмыкI цIыф лъэпкъхэм татекIы.
Джэгушхор етэгъажьэ
Неущрэ мафэр зыIэ илъхэ сабыйхэр пэублэм пчэгум къырагъэблэгъагъэх. Ахэм къафагъэхьазырыгъэ джэгукIэхэмкIэ, хырыхыхьэхэмкIэ джэгушхор къызэIуахыгъ. Нэужым гъогу пхэнджыр къыхэзыхырэ цIыфым илъэпкъ зэриумысырэр къизыIотыкIырэ къэгъэлъэгъонымкIэ Iофтхьабзэр лъагъэкIотагъ.
Хэгъэгу джэгушхом къеблэгъагъэхэм шIуфэс гущыIэхэр зэхэщакIохэм къапагъохыгъэх, пшъашъэхэр къыхэзыщыщтхэр агъэнэфагъэх. ДжэгокIуищ пчэгум зэритыщтым фэдэу пшъэшъищмэ къэшъощтхэр къыхащыщтых. Къэбэртэе-Бэлъкъарым, Къэрэщэе-Щэрджэсым, Адыгэ Республикэм, Ингушетием, Темыр Осетием — Аланием янароднэ артистэу Нэфышъ Чэримэ къэзэрэугъоигъэхэм гущыIэ фабэхэр апигъохыгъэх, орэд къафиIуагъ. Нэужым къэшъоныр рагъэжьагъ. ДжэгуакIохэр пчэгум итхэу, ныбжьыкIэхэу къызэдашъохэрэр бзыум фэдэу быбатэхэзэ пчыхьэр дахэу лъыкIотагъ.
Америкэм икъалэу Нью- Джерси щыщ Пщыгъон Нур адыгабзэр тIэкIу къин къыщэхъуми, илъэпкъ игушхуагъэ зэрэхэлъыр зэхэошIэ. Илъэс 18 зыныбжь кIэлэ ныбжьыкIэр Хэгъэгу джэгушхом хэлэжьагъ, къэшъо дахэкIэ пчэгум щыуджыгъ.
— Джэгушхор зэрэщыIэщтыр сшIэщтыгъэ, ащ тефэу Налщык сыкъэкIуагъ, — къытфеIуатэ Нурэ. — Америкэм щызэхащэхэрэ джэгухэм мыр атекIы. Адыгэ лъэпкъым иIэ къашъохэр зэкIэ къыщашIых. Ащ Iофтхьабзэр нахь бай, нахь гъэшIэгъон къешIы. Адыгабзэр сшIэрэп, ау къэкIорэ илъэсым нэс зэзгъэшIэн, сыкъызэрэшъорэм фэдэу бзэри сIэкIэлъэу Хэгъэгу джэгушхом сыхэлэжьэн гухэлъ сиI.
Иорданием къикIыгъэ Къоджакъэ Фатимэ ипшъашъэ Налщык щэпсэу. Илъфыгъэ дэжь бэрэ къэкIо, ихэку гупсэ зыщигъэгъупшэрэп.
— Налщык сызыщыIэр тхьамэфэ заулэ хъугъэ. Хэгъэгу джэгушхор зэрэщыIэщтым, ащ сеплъын зэрэслъэкIыщтым сагъэгушIуагъ. Силъэпкъэгъухэм сызэраIукIэщтым, ныбжьыкIэгур къашъом зэрэзэлъиубытырэр нэрылъэгъу къызэрэсфэхъущтым сагъэгушхуагъ.
Адыгеим икIыгъэ купым щыщэу Хьаткъо Симазэ адыгэ къашъохэр лъэшэу икIасэх, джэгухэу зэхащэхэрэм ахэлэжьэ зэпыт. Ар Адыгэ кIэлэегъэджэ колледжэу Андырхъое Хъусен ыцIэ зыхьырэм щеджэ.
— Сыкъашъо зыхъукIэ щыIэныгъэр къэуцугъэ фэдэу къысщэхъу, сыгуи, спси къэсшIырэ къашъом есэпхых, — къытфеIуатэ Симазэ. — Адыгэ къэралыгъо университетым иансамблэу «Нарт» зыфиIорэм сыкъыщэшъо, тапэкIи сэнаущыгъэу схэлъым хэзгъэхъон гухэлъ сиI.
Анахь дахэу къэшъуагъэхэр къыхагъэщыгъэх
ОсэшI купэу агъэнэфагъэр пчыхьэ реным къэшъогъэ ныбжьыкIэхэм алъыплъагъэх. Ахэм ащыгъым къыщегъэжьагъэу, апкъ зэраIыгъым, къашъом икупкI къызэрэраIотыкIырэм лъыплъагъэх, шIухьафтыныр анахь зытефэхэу алъытэхэрэр къыхагъэщыгъэх. Пстэуми анахь зытефэу алъытэгъэ пшъашъэр Адыгеим зэрэщыщым тигъэгушхуагъ. Еутых Бэллэ джэгушхор зырагъажьэм апэрэу пчэгум къыращагъ.
— Пшъэшъэ пстэуми апэу пчэгум сыкъызэрэращагъэм тIэкIу сыкъигъэгумэкIыгъ, сыда пIомэ Iофтхьабзэм къекIолIагъэхэм зэкIэми янэплъэгъу оры зыфэгъэхьыгъэр, — къытфеIуатэ тын лъапIэр къызфагъэшъошэгъэ Еутых Бэллэ. – Дахэу къашъоу, шIухьафтыныр зытефэрэ пшъэшъабэ джэгум хэлэжьагъ. Пстэуми сэ сыкъызэрэхахыгъэр сигуапэ хъугъэ.
Илъэси 5 ыныбжьыгъ Бэллэ адыгэ къашъом зыфигъэсэнэу зырегъажьэм. Егъэджэн курсхэм ятэжъ ыщэщтыгъэ. Илъэс 14 хъугъэу къашъом екIурэ гъогур тигущыIэгъу щыгъупшагъэп. Исэнаущыгъэ зэрэхигъэхъощтым, ицIыкIугъом къыщегъэжьагъэу пэблэгъэ къашъохэр нахь куоу зэрэзэригъэшIэщтхэм пылъыгъ. Мы уахътэм Адыгэ Республикэм и Къэралыгъо академическэ лъэпкъ къэшъокIо ансамблэу «Налмэсым» хэт.
КIалэхэм алъэныкъокIэ пстэуми къахагъэщыгъэр чыжьэу къикIыгъэ хьакIэ лъапIэу Пщыгъон Нур. Ащ адыгэгу зэриIэр, исэнаущыгъэ джэгушхом зэкIэ къекIолIагъэхэм къыхагъэщыгъ.
Хэгъэгу джэгушхом сабый цIыкIухэми, IэкIыбым къикIыжьыгъэхэу хэкужъым къэзыгъэзэжьыгъэхэми осэшI купым ынаIэ атыригъэтыгъ. КIэлэцIыкIухэм ащыщэу анахь чанэу зыкъэзыгъэлъэгъогъэ Сэбэнэ Шъэлихьэ пчэгум къыращагъ, шIухьафтын ратыгъ. Тыркуем къикIыжьыгъэу Адыгеим щыпсэурэ Нэщ Октай лъэпкъым ыгу фэщагъэу, икъашъо пстэуми агу зэрищэфыгъэр осэшI купым игущыIэ къыщыхигъэщыгъ.
— Тыркуем ит къалэу Измир пэмычыжьэу щыс къоджэ цIыкIум сыкъыщыхъугъ, — къытфеIуатэ тын лъапIэ къызфагъэшъошэгъэ Октай. — Ащ пчыхьэрэ ныбжьыкIэхэмкIэ тыщызэхахьэщтыгъэ, тилъэпкъ орэдыжъхэр къыщытIощтыгъэх, къашъохэр къэтшIыщтыгъэх. Тинахьыжъхэм къытагъэлъэгъузэ адыгэ къашъохэр зэдгъэшIагъэх. «Тыркуем къикIыжьыгъэ тикIал» зэраIуагъэр лъэшэу сигуапэ хъугъэ. Сятэжъ пIашъэхэр зыщапIугъэхэм сыгу сыкъищэжьыгъ. Тыркуем сыкъыщыхъугъ нахь мышIэми, сихэку гупсэу Адыгеим сыщыгупсэфыгъ.
Хэгъэгу джэгушхор зэрифэшъуашэу рекIокIыным джэгуакIохэм яIахьышIу хэлъ. Ахэм ясэнаущыгъэ, жэбзэ дахэу аIулъым бэ ялъытыгъэр. Пшъашъэхэр къыхэзыщыщтыгъэхэм ащыщэу Дэлэл Марьянэ гущыIэгъу тыфэхъугъ. Ар къашъо зыхъукIэ хьарзэ фыжьэу ошъогум итэу щыбыбырэм фэогъадэ. Икъашъо зэрэдахэм фэдэу ежьыри цIыфышIу.
— Илъэсищ сыныбжьэу сыкъэшъонэу езгъэжьагъ, — къытфеIуатэ Марьянэ. – КIэлэцIыкIу IыгъыпIэм Сэралп Жаннэ къызэкIом ащ сэ гу къыслъитагъ ыкIи ансамблэм сыригъэблэгъагъ. Илъэс 15 сэхъуфэ ащ сыкъыщышъуагъ. Ащ ишIуагъэкIэ къэшъоныр къыспэблагъэ хъугъэ ыкIи сищыIэныгъэ еспхынэу сыгу исыубытагъ.
ТигущыIэгъу искусствэхэмкIэ колледжэу Налщык дэтым чIэхьэ, ар диплом плъыжькIэ къеухы. А илъэс дэдэм культурэм ыкIи искусствэм я Къэралыгъо университетэу Москва щыIэм еджэныр щыпедзэжьы. Апшъэрэ еджапIэр диплом плъыжькIэ къыухыгъ.
IофшIэпIэ чIыпIиплIымэ ащылажьэзэ Москва илъэси 6-м ехъурэ Iоф щишIагъ. Мыгъэ Налщык къэкIожьыгъ, къызщыхъугъэ республикэм икультурэ фэлэжьэн гухэлъ иI.
— Хэгъэгу джэгушхо зэрэщыIэщтыр ИнтернетымкIэ слъэгъугъэ. Ащ сыхэлэжьэн гухэлъ сшIыгъэ ыкIи зэхэщакIохэм зафэзгъэзагъ, — къытфеIуатэ Марьянэ. — Пшъэшъэхэщэу сагъэнэфагъ. Сызфэгъэзэгъэ лъэныкъор зэрэмыпсынкIэщтыр сшIагъэ, ау ащ сызэкIигъэкIуагъэп. Пшъашъэхэу къекIолIагъэхэр зэкIэ къэзгъэшъоным, агу хэсымыгъэкIыным сыпылъыгъ.
Мыщ фэдэ джэгушхохэм, зэхахьэхэм мэхьанэшхо зэрахэлъыр къыхэзгъэщы сшIоигъу. НыбжьыкIэхэр ащызэрэугъоих, лъэпкъым ихъишъэ агу къыщагъэкIыжьы, культурэр аIэты.
Гъонэжьыкъо Сэтэнай.