Лъэпкъ чIыпIэрысым тыдэгумэкIы
КъокIыпIэм щыпсэурэ лъэпкъхэм яискусствэкIэ Къэралыгъо музееу Мыекъуапэ дэтым къэгъэлъэгъонэу къыщызэIуахыгъэр лъэпкъ шэн-хабзэхэм, шIэжьым афэгъэхьыгъ.
ХыIушIом щыпсэухэрэ адыгэхэм яшэн-хабзэхэм, яныдэлъфыбзэ, къушъхьэхэмрэ цIыфхэмрэ афэгъэхьыгъэ къэгъэлъэгъоныр гум къегущыIыкIы. Журналистэу Виталий Штыбиныр Iофтхьабзэм кIэщакIо фэхъугъ. Екатерина Штыбинам сурэтхэр тырихыгъэх. 2019-рэ илъэсыр чIыпIэрыс лъэпкъхэм яныдэлъфыбзэ и Дунэе илъэсэу ООН-м ылъытагъ.
Къэгъэлъэгъоным икъызэIухын ехьылIэгъэ зэхахьэм къыщыгущыIагъэх музеим ипащэу Кушъу Нэфсэт, шIэныгъэлэжьэу Елена Малышевар, сурэтышIхэу Бырсыр Абдулахь, Хъуажъ Рэмэзанэ, Эдуард Овчаренкэр, культурэм иIофышIэхэу Чэмышъо Гъазый, Аркадий Кирнос, фэшъхьафхэри.
Сурэтхэм лъэхъаныр, цIыфхэм ящыIакIэ къаIуатэ. ЗэхэщакIоу Виталий Штыбиным къызэрэтиIуагъэмкIэ, тилъэпкъэгъухэм ясэнэхьат, ящыIэныгъэ сурэтхэм къагъэлъагъо. Екатерина Штыбинар цIыф цIэрыIохэм, бэгъашIэхэм, ныбжьыкIэхэм аIукIагъ. Ащ ишIушIагъэмэ къахэдгъэщырэр адыгэ шъуашэм идэхагъэ, лъэпкъ музыкальнэ Iэмэ-псымэхэр ятеплъэкIэ зыфэдэхэр сурэтхэмкIэ дэгъоу къыгъэлъэгъонхэ зэрилъэкIыгъэр ары.
ШыкIэпщынаоу ТIэшъу Мурдинэ, IофшIэным иветеранхэу Мэфэгъэл Сэлымэ, Шъхьэлэхъо Дэхэмылэ, къэшъокIо ныбжьыкIэу Алинэ, нэмыкIхэм ясурэтхэм гур зыфащэ, уадэгущыIэ пшIоигъоу гупшысэхэм узэлъакIу.
Шапсыгъэ шъолъырым щыпсэурэмэ культурэмкIэ яунэхэр, языгъэпсэфыпIэхэр сурэтхэм ахэолъагъох. ЧIыпIэрысхэм ныдэлъфыбзэр къызэраухъумэрэр къэгъэлъэгъоным къыщызэIухыгъошIоп. Къиныгъохэу яIэхэм защыбдзыеныр мытэрэзэу В. Штыбиным елъытэ. Лъэпкъым зиужьыжьыным фэшI амалэу ыгъэфедэн ылъэкIыщтхэри сурэтышIым къыдилъытэзэ, нэмыкI къэгъэлъэгъонхэр зэхищэхэ шIоигъу.
Сурэтхэр зэхахьэм къыщытетхыгъэх.