«Щыгъыжъыер» — тилъэгъохэщ
Адыгэ Республикэм икультурэ пытэу къыхэуцуагъэмэ ащыщ кIэлэцIыкIу театральнэ зыгъэсапIэу «Щыгъыжъыер».
Тыркуем къикIыжьыгъэхэ тилъэпкъэгъухэу адыгабзэм, шэн-хабзэхэм язэгъэшIэн ыгъэгумэкIыхэрэр кIэщакIо фэхъухи «Щыгъыжъыер» зэхащагъ. Уахътэр псынкIэу макIо. Илъэси 10-у тешIагъэм уфызэплъэкIыжьмэ, IофшIагъэу щыIэм урыгушхон плъэкIыщт.
Узэкъомытэу улъыкIотэщтэп
Егъэжьэгъур сыдигъокIи къин. Апэрэ мафэхэм «Щыгъыжъыем» къырагъэблэгъагъэхэм адыгабзэкIэ зы гущыIи зымышIэхэрэр ахэтыгъэх. Художественнэ пащэу, Урысыем изаслуженнэ артисткэу, Адыгэ Республикэм инароднэ артисткэу Уджыхъу Марыет театрэм, музыкэм ыкIи кином якъэралыгъо институт Ленинград къыщиухыгъ. Республикэм и Лъэпкъ театрэу Цэй Ибрахьимэ ыцIэ зыхьырэм иактрис.
Республикэ общественнэ движениеу «Адыгэ Хасэм» иIофшIапIэ «Щыгъыжъыем» зыщегъасэ. УпчIэ бащэ Уджыхъу Марыет еттыныр къедгъэкIугъэп. Тхьаусыхэным зыдыригъэхьыхырэп. Арэу щытми, гумэкIыгъоу иIэхэм уащигъэгъуазэ зыхъукIэ, лъэпкъ гупшысэр зэкIэми апшъэ ышIы зэрэшIоигъор къыхэщы.
«Щыгъыжъыем» зызыщигъэсэщт унэ имыIэжьэу уахътэ къызекIум, М. Уджыхъур республикэ общественнэ движениеу «Адыгэ Хасэм» къэкIуагъ. А лъэхъаным тхьаматэм игуадзэу щытыгъэ Къуижъ Къэплъан гущыIэгъу зыфэхъум, Адыгэ Хасэм иIофшIапIэ кIэлэцIыкIухэм зыщагъэсэнэу зэзэгъыныгъэ зэдашIыгъ. «Щыгъыжъыем» иунэ къыкIэмыщхэу, кIэлэцIыкIухэм рэхьат загъотым, яшIэныгъэхэм ахэзыгъахъо зышIоигъохэр хэпшIыкIэу нахьыбэ хъугъэх.
Умакъэ оIэтыкIэ пIорэр цIыфхэм нахьышIоу къагурыIощтэу М. Уджыхъум ылъытэрэп. КIэлэцIыкIу пэпчъ екIолIэкIэ хэхыгъэ къыфигъотыным пылъ. АдыгабзэкIэ мыгущыIэшъоу къытхэт кIэлэцIыкIур акъылышIоу зэрэщытыр пшIэ зыхъукIэ хэта бгъэмысэщтыр?
Адыгабзэм изэгъэшIэн
Ныдэлъфыбзэм изэгъэшIэн унагъом къыщегъэжьэгъэн фаеу Уджыхъу Марыет къыраIоу бэрэ къыхэкIы. Ары шъхьае, уахътэр аIэкIэкIыгъэу кIэлэцIыкIур бзэм фамыгъэсагъэ зыхъукIэ сыда пащэм ышIэщтыр?
Адыгэ Хасэм ныдэлъфыбзэм изэгъэшIэн щытегущыIэхэ зыхъукIэ, унагъом, кIэлэцIыкIу IыгъыпIэм, еджапIэм язэпхыныгъэхэр къыдэплъытэнхэм имэхьанэ осэ ин щыраты.
«Щыгъыжъыем» иапэрэ пчыхьэзэхахьэу Лъэпкъ театрэу И. Цэим ыцIэ зыхьырэм щыкIуагъэм цIыфыбэ еплъыгъ. Къэгъэлъэгъоныр агу зэрэрихьыгъэм дакIоу неущрэ мафэр зыфэдэ хъущтым егупшысагъэх.
— Артист дэгъу хъун зылъэкIыщтхэр «Щыгъыжъыем» хэтых, — къыщиIуагъ зэхахьэм Урысыем итеатрэхэм яIофышIэхэм я Союз икъутамэу Адыгэ Республикэм щыIэм ипащэу, Урысыем, Абхъазым, Къэбэртэе-Бэлъкъарым, Пшызэ язаслуженнэ артистэу, Адыгеим инароднэ артистэу Зыхьэ Заурбый. — КIэлэцIыкIухэм зыкъызэIуахыным фэшI IэпыIэгъу ящыкIагъ — ари зыщыдгъэгъупшэ хъущтэп.
— Щытхъу лые сищыкIэгъахэп, — игупшысэхэм тащегъэгъуазэ Уджыхъу Марыет. — КIэлэцIыкIухэм сишIуагъэ язгъэкIы, театрэм ыбзэкIэ къэзгъэгущыIэхэ сшIоигъу.
Ылъэ теуцуагъ
Теуцожь, Шэуджэн районхэм «Щыгъыжъыем» ипчыхьэзэхахьэхэр ащыкIуагъэх. Гъэмэфэ зыгъэпсэфыгъор заухыкIэ нэмыкI районхэм ащыIэщтых.
ИлъэситIукIэ узэкIэIэбэжьмэ, «Щыгъыжъыер» Тыркуем рагъэблагъи, театрализованнэ къэшIыгъохэр къыгъэлъэгъуагъэх. Адыгабзэмрэ тхыбзэмрэ я Мафэ мыгъэ республикэм игъэкIотыгъэу щыхэдгъэунэфыкIыгъ. Республикэм и Къэралыгъо филармоние «Щыгъыжъыем» изэхахьэ щыкIуагъ.
Ти ЛIышъхьэу КъумпIыл Мурат, Правительствэм икъулыкъушIэхэр, шIэныгъэлэжьхэр, Адыгэ Хасэм хэтхэр, кIэлэеджакIохэр Iофтхьабзэм хэлэжьагъэх. Республикэм и ЛIышъхьэу КъумпIыл Мурат зэхахьэм къызыщэгущыIэм, «Щыгъыжъыем» осэ ин фишIыгъ. КIэлэцIыкIухэм рольхэр дэгъоу къашIыхэу ылъытагъ.
Джырэблагъэ «Щыгъыжъыем» итворчествэ ехьылIэгъэ Iофтхьабзэу филармонием щыкIуагъэм едзыгъо гъэшIэгъонхэр кIэлэцIыкIухэм къыщашIыгъэх. Къайхъан Нэрыс, ХыдзэлI Псэзан, Беданыкъо Мадинэ, Беданыкъо Заринэ, нэмыкIхэм адыгабзэм изэгъэшIэн ехьылIэгъэ едзыгъохэр гъэшIэгъонэу къагъэлъэгъуагъэх.
ТхакIоу Къуекъо Налбый ытхыгъэм техыгъэу лъэпкъ зыкIыныгъэм игъэпытэн адыгабзэр зэрэфэIорышIэрэр IупкIэу цIыфхэм алъагъэIэсыгъ. Беданыкъо Тембот, МэщфэшIу Гунэф, Хьаужьыр Дианэ, Шухъэстэнэ Аминэт, Шухъэстэнэ Камилэ, фэшъхьафхэм адыгабзэмрэ шэн-хабзэхэмрэ зэрэзэпхыгъэхэр театрэм ыбзэкIэ къаIуатэ. Ныбджэгъуныгъэм, гукIэгъум, адыгагъэм зафэбгъасэ пшIоигъомэ, «Щыгъыжъыем» икъэшIыгъохэм уяплъын фае.
Беданыкъо Тембот, КIубэ Аслъан, КIубэ Дамир, Цопсынэхэу Эльбруз ыкIи Налбек, Тыкохэу Адыиф ыкIи Пэрыт, Цурмыт Саусыр, нэмыкIхэм ныбджэгъуныгъэм, адыгагъэм яхьылIагъэхэр къашIых. ХьэкIэ-къуакIэхэм ярольхэм узыIэпащэ. Боджэкъо Суандэ нысэм ироль къызэришIырэм, сабыир кушъэм зэрэхапхэрэм, джэгукIэхэм, фэшъхьафхэм афэгъэхьыгъэхэр лъэпкъ шIэжьым, адыгабзэм изэгъэшIэн адештэх.
«Щыгъыжъыем» икъэгъэлъэгъон еплъыгъэхэ Зыхьэ Заурбый, Хьакъуй Аслъан, МэщфэшIу Нэдждэт, Гъазый Бирамхъан, Бэгъушъэ Алый, нэмыкIхэу къэгущыIагъэхэм кIэлэцыкIухэм яшIэныгъэ зэрэхагъахъорэр къыхагъэщыгъ. Адыгэ Республикэм и Къэралыгъо премие «Щыгъыжъыем» фагъэшъошэныр тефэу алъытагъ. Зэхахьэм хэлэжьагъэхэм къэгущыIагъэхэм адырагъэштагъ, «Щыгъыжъыем» Iэгу фытеуагъэх.
Уахътэм иджэмакъ
Къуаджэхэм, къалэхэм адэс сабыйхэм, ны-тыхэм, кIэлэегъаджэхэм «Щыгъыжъыем» щысэ тырахы тшIоигъу. Къуаджэ пэпчъ «Щыгъыжъыем» фэдэ купхэр щызэхащэныр непэрэ уахътэм дештэ. Тымыгужъуагъэмэ, пасэп. Мылъкоу пэIухьащтыр гъотыгъуае хъущтэп, сыда пIомэ псынкIэу зыкъигъэшъыпкъэжьыщт. Мэшэлахь, Шэуджэн районым икIэлэеджакIохэм «Щыгъыжъыем» иедзыгъохэм ащыщхэр республикэ зэнэкъокъухэм къащашIэу аублагъ.
Уджыхъу Марыет иIэпыIэгъухэу Даур Жаннэ, Хьэлащтэ Саныет, Беданыкъо Замирэ, нэмыкIхэм къызэрэтаIуагъэу, «Щыгъыжъыер» къызэтебгъэуцо хъущтэп. Тыркуем ятIонэрэу рагъэблэгъагъ. Израиль къикIырэ кIэлэцIыкIухэм адыгабзэр ашIэу, Адыгеим щыщхэр яныдэлъфыбзэкIэ гущыIэнхэ амылъэкIэу зыплъэгъукIэ, «Щыгъыжъыем» ишIуагъэ нэгум къыкIэуцо. Тиадыгабзэ бай дэдэу щыт, ащ изэгъэшIэн тэры зэлъытыгъэр.
ЕмтIылъ Нурбый.