Саидэ игупшысэ дунай
ЗыфасIорэр тилъэпкъ литературэ хахъо фэзышIырэ Хъунэго Саид ары. Бзылъфыгъэм зэфэдэу поэзиеми, прозэми Iоф ащешIэ. Сценариехэри, сэмэркъэухэри ытхыгъэх, ахэм артистхэр къяджэх, телевидением къегъэлъагъох.
ТхэкIо куп ятхыгъэхэр зыдэт тхылъэу «УблапIэ» зыфиIоу Адыгэ тхылъ тедзапIэм 1985-рэ илъэсым къыдигъэкIыгъэм Саидэ ирассказ заулэ дэхьагъ. Ащ ыужыIоу Хъунэго Саидэ тхылъхэу «Осэпсыц», «ГъашIэм илъагъохэр», «Макъэр шъхьафит» (усэхэр, эссехэр, монологхэр) къыдигъэкIыгъэх.
Саидэ рассказ кIэкI щхэнхэр, сценэжъыехэр етхых. Ахэр спектаклэ-миниатюрэ зэхэгъэуцуагъэхэу республикэ телевидениемкIэ, радиомкIэ къатых. Хъунэго Саидэ 1996-рэ илъэсым къыщегъэжьагъэу УФ-м итхакIохэм я Союз хэт.
ИхэшыпыкIыгъэ зэхэугъоегъэ тхыгъэхэр дэтхэу 2012-рэ илъэсым къыдэкIыгъэ тхылъым Саидэ игупшысэ дунай зыфэдэр, псэм зэхишIэу, гум ыщэчырэр къыриIотыкIын амалэу IэкIэлъыр зынэсырэр зэхыуегъашIэ. ТхакIом игупшысэ дунай ипчъэ усэ сатырэ зэфэшъхьафыбэм къыпфызэIуахы. Гур чъэрмэ, зынэмысрэ ыкIи къымыгъэгъунэрэ щыIэп. УсакIом ылъэгъоу, зэхихэу, ыщэчэу зыгъэразэу, зыгъэгушIоу ыкIи гупсэфыгъо къезымытэу гум пхырыкIырэ пстэумэ яджэуапых мы тхылъым къыдэхьагъэхэ усэхэр.
«Сэплъэшъ — слъэгъурэр зыми къымылъэгъу», — еIо ащ. Уеджэнджэшынэуи зыкIи хъурэп, бэшIагъэу гупшысэ дунаим щыхэгърэй хъугъэ тхакIом инэплъэгъу закъокIи бэ къыгъэгъунэу, ыгъэунэфэу зэрэщытым.
Усэу «Ори сэри тызэфэд!» зыфиIорэм цIыфыпсэ къабзэхэр зэлэгъу-зэщыщхэу зэрэзэтехьэхэрэр къыщиIуагъ бзэ зэкIу дахэкIэ:
Ори сэри тызэфэд, СигухэкI оуием фэд, СигушIуагъо — жъогъо лыд — УигушIуагъо фэрэлыд!
Уилыуз сэсыем фэд, КIышъор къесты — Жъокум фэд, УишIулъэгъуи, уинэплъэгъуи ЦIыфым яем фэдэкъабз, ГукIэгъу шIыныр зигъэхабз. Ори сэри сыд дгощын? – къэупчIэ усакIор ыкIи тIэкIу кIотагъэу иусэ щыкIегъэтхъы:
«Арышъ, сэри ори непэ Щегъэжьагъэу — ты ЦIыфын».
Адыгэ поэзием илъэпсэхэщэу, усакIоу Хьаткъо Ахьмэд «цIыфыным пае цIыфыр къэхъугъ» ыIуагъ шIошъхъуныгъэ пытэ, теубытагъэ хэлъэу. Саидэ бзылъфыгъэ IокIэ-шIыкIэ шъабэр къебэкIэу, унашъоу щымытэу, гъэсэпэтхыдэр кIигъэтхъэу гущыIэр къешIы.
ГъашIэмкIэ анахь мэхьанэ зиIэу, псэм кIэгъэкъон фэхъурэ гукIэгъур дгъэкIоды е чIэтынэ зэрэмыхъущтыр сатырэ закъокIэ — «ГукIэгъу шIыныр зигъэхабз» ыIуи, къыухыгъ.
Мафи, чэщи, ошIуи, уаий гупшысэм зылъещэ тхакIор, усэм усэр къыкIэлъэкIо:
Усэр – гъэсэпэтхыд, Ушъэфыгъэ гукъау, Унэзэгъэ гъогурыкIу, ЕлъэкIонрэ гугъапI. Усэр бэмэ яплъапI, Гъунджэу укъещы, Мазэу щэгъуащэ, Ау угу зынэскIэ – КъыуегъаIо усэкIэ.
Усэн зэчыир зыхэлъымкIэ, усэр сабый папкI, епIу, елэжьы, тамэ ыгъотыгъэмэ, зеIэты. Адэ сыд фэдэнхэ фаеха усэхэр? ТыкIэдэIукIын ащ иджэуап къэзытырэм: Сиусэхэм унэ яIэп — шъхьэфитых,
Урамым тетых, Зыфаем готых. Зыфаер къаIо, Зыфаем — раIо! Ау шъхьэфит усэр — ШъхьэрытIупщ усэп!
ПсэкIэ дунаир зышырэ усакIом демыгъэштэн плъэкIырэп уасэу усэм фишIырэм. Зэгупшысэу ыпшысыжьырэм гъуни-нэзи иIэп; ыгу цIыкIужъые илъэу къыщекIокIырэр бэдэд: ЧIыгур, огур, лъэпкъыр, гъашIэр, цIыфхэр…
Лъэпкъым ихъишъэ пIэ шъабэп, Гупсэфэу ущычъыенэу, Данэм ухэгъэкIагъэу Учъыезэ къэбгъэшIэнэу.
Лъэпкъым ихъишъэ — чIыфэп, Хьафэуи птынэу уимылъкоп, ЛIакъохэр ипытапIэу, Яакъыл игугъапIэу — Титыгъ, тинэф, тифаб.
Хъунэго Саидэ игупшысэ тэмабгъу: адыгэ лъэпкъым иблэкIыгъи, инепи, инеущи гукIэ ащэIорышIэ ыкIи ущыIэныр —пфэлъэкIырэр зымыгъэбэлэрэгъэу пшIэныр арэу зэрэщытыр кIегъэтхъы. УиIэм уасэ фэпшIэу уухъумэныр ыкIи ащ хэбгъэхъоныр хэткIи шапхъэу зыхъукIэ, гъашIэри тынчыпIэ-гупсэфыпIэу зэрэщытыщтым укIегъэгушIу.
Ауми, усакIор гупсэфэп, гумэкIыгъуабэу щыIэмэ зэрадзэ: «СэгумэкIы. Ренэу сэгумэкIы — Ащи къэзгъэшIагъэр къеунэкIы». Дунаим щыхъурэ-щышIэрэ пстэумэ ащыгъуазэу, агъэтхьауеу, зэхишIэрэр — тэрэзыр ыкIи мытэрэзыр ыгъэунэфыныр, дэир е Iаер уяпэсэкIымэ, къэмыгъэхъунхэ е щыбгъэзыенхэ плъэкIынхэу щытхэмэ зэхифэу, зэхидзэу, зэригъапшэрэр бэдэд; джарэу усакIом ыгу пщэлъэ ин — зынэмыси, ымылъэгъуи щыIэп, ишъыпкъэ мыпшъыжьэу фэкIо.
КъысэмыIу! Сыфаеп зэхэсхынэу! Сызтет чIыгур чэнэу, зэгочынэу, Сефэхынэу чIэ зимыIэ Iуашъхьэм, СыIутынэу къэпIощтым икъашъхьэ, Сэрэмах, сэрэмыпаг егъашIэм, Сэщ фэдэу минишъэхэр мэплъызы — Зэмыжэгъэ фыртынэм ефырзых, Хэхэс гугъэу къычIэкIыгъ ягугъэ, Зи къэмыIу! ГущыIэхэр бгъэпшъыгъэ. («Зи къэмыIу»).
Лъэхъэнэ мыджырым имэшIожь стыр гу хыябэр зэрилыпкIырэм, зэо-бэнэ зэпымычыжьмэ цIыфи, нэмыкIхэу псэ зыпытхэри зэрякIодылIэхэрэр мы сатырхэм ащыкIэгъэтхъыгъ; зэкIэ, зэкIэ къызэрыкIырэр ыкIи зыфэкIожьырэр мылъкур ары, цIыф цIыкIур зыкIэхъопсырэри зытекIодэжьырэри а мылъку мыгъор ары.
Сыдэу сигъэпшъыгъа зэо-бэнэ къэбарым СедэIузэ. Седжэзэ. Зэзгъэзэфэжьызэ. Сыдэу сигъэпшъыгъа шъхьакIом имашIо СигъашIэ ылъапсэ кIистыкIызэ!
Ау тыдэ пхьына о уихьылъэ, Хэт птырихына а онтэгъур? Зызысэплъыхьэм — сикIалэхэр къызготых — Зыщыщыри къагурымыIоу атезгъэуагъ.
УсакIоу Хъунэго Саидэ щыIэныгъэм, дунаим ипчэгу ит гупшысакIу: лъапи шъхьапи зынэмыси ымышIи щыIэп; иакъыл зэтеуцуагъэкIэ, игулъытэ чанкIэ, игущыIэ фытагъэкIэ гу минхэм алъэIэсы, арэхьэ, зыкъарегъаштэ.
ШIу усэлъэгъу, ГъашIэр! Мафэм ыцакIэ земыгъэфэх — ШIу усэлъэгъу!
Гъунэм сыIутэу чэщым ылъачIэ Уитэу сэлъэгъу! ШIу усэлъэгъу!
ГъашIэр — алрэгъоу Шъо зэфэшъхьаф, ШIу усэлъэгъу!
Мачъэ нэплъэгъур — Илъагъо — нэф! ШIу усэлъэгъу!
ТхьэкъэгъэшIыгъэ дунаишхом ыпсэ пызыгъэтырэр зэфэдэкIэ шIулъэгъур арба?! Ар къыгурыIоу мэусэ бзылъфыгъэр.
ЩыIэныгъэм икъежьапIэри инэфапIэри ЧIыгур ары. «Псэ» зыцIэр пытэу, нэрымылъэгъу кIапсэкIэ ащ епхыгъ. Хъунэго Саидэ гъашIэм хэлъ-хэсыр бэшIагъэу ыгъэунэшкIугъ, усэкIо чъэпхъыгъ, щтапхэп, гукIодыпхэп; чан, сыдымкIи кIочIэгъу зыфырекъужьы; ЦIыфэу мы чIыгум зэрэтетым егъэбжьышIо, зыкIыныгъэу чIыгум дыриIэм егъэлъэшы, еIэты.
О — сэры ЧIыгур мэбыбы — Сэбыбы, ЧIыгур мэлажьэ — Сэлажьэ, ЧIыгур мэпкIантIэ — СэпкIантIэ, ЧIыгур мэгырзы — Сэгырзы, ЧIыгур мэтакъо — Сэтакъо, ЧIыгур мэкъутэ — Сэкъутэ, ЧIыгур мэгуIэ — СэгуIэ, ЧIыгур мэлъаIо — СэлъаIо, ЧIыгур мэдаIо — СэдаIо, ЧIыгур мэкуо — Сэкуо. ЧIыгур мэубзэ — Сэубзэ, ГугъапIэу къэнагъэр… Сыбзэ.
УсакIор акъыли амали щыкIэрэп, гущыIэр иIэрыфэгъу, ыкIуачIэ из. Иадыгэ лъэпкъ, ичIыгу афыриIэ гукIэгъу-шIулъэгъур гъунэнчъ ыкIи ар исатырхэм ащыкIегъэтхъы. Псауныгъэ пытэкIэ тыфэлъаIозэ, хэхъоныгъэ лъэбэкъукIэхэмкIэ бэрэ тхылъеджэхэр ыгъэгушIонхэу фэтэIо.
Адыгэм ынэпс Адыгэ нэпсым сыдрэ гупшыса Налмэс-налкъутэу ымгъэлыдыгъэр? Сыд фэдэ къина ЧIыгум щызекIоу, Адыгэ нэпсым ымыгъэпскIыгъэр?
ЩыIэп хэгъэгуи, чIыгуи, ошъогуи Адыгэ цIыфым ынитIу ымышIэу. Хэхэсы хъишъэм лъэпкъыр ыулъэгуи, Имыжъо шъхьалы сапэ ар ышIэу...
ОуитIу-оуищэу гъыбзэр иIусэу ЧIыгур хъураеу къырикIукIыгъ. Лъэпкъым ишIупIэ игъонэмысэу Хымэ къэхалъэмэ адалъхьажьыгъ.
Адыгэ нэпсым иIэп гъунапкъэ, Ар къэзылъфыгъэм ыцIэ къешIэжь! Адыгэ ЧIыгур тпсэ илъэгапIэу, Адыгэ цIыфым къыфэрэнэжь!
Мамырыкъо Нуриет.