ТхылъеджапIэм иактив сыхэтэу сабыйхэм апае тхылъ дэгъухэр ифэшъошэ шIыкIэм тетхэу, кIэракIэхэу зэрэтимыIэхэм бэрэ тырыгущыIагъ. Мы Iофыгъор фызэшIокIыгъ Хьакъунэ-Хъуажъ Заремэ. Тиреспубликэ ар зымышIэрэ исэп сшIошIы; цIыфым зэчый хэлъ зыхъукIэ, ар къэмылъэгъонэу хъурэп.

Заремэ иIофшIагъэхэм къагъэлъагъо хьалэлэу, цIыфым ыгу къыдищае шIоигъоу зэрэщытыр, итхылъ зэфэшъхьафхэмкIэ цIыфыгур шIум къыфищэным зэрэпылъыр. Заремэ сабыйхэм афэгумэкIы, ежьми ипхъорэлъф цIыкIумэ ыгу къаIэты, итворчестви зыкъызэIурагъэхы. Усэу ахэм афиусыгъэхэр кIэлэцIыкIу IыгъыпIэм къыщаIохэу хъугъэ, ахэм кIэлэпIумэ гу лъати, Заремэ къе­лъэIухэмэ усэхэр афитхыхэзэ ары тхэныр къызщежьагъэр.

Анахь осэшхо лъэпкъымкIэ зиIэр ныдэлъфыбзэр арэу зэрэщытыр Заремэ дэгъоу къыгурэIо, ащ икъэухъумэн пылъ. Адыгабзэр сабыйхэм аIэкIэбгъэкIуадэ хъущтэп, ары пакIошъ, ащ ыбзэ удэмылажьэмэ, илъэс пчъагъэкIэ къэмыгущыIэни ылъэкIыщтэу къаIо. Ау ащ Iоф дапшIэмэ, адыгэмэ зэраIоу, «уеуIу» зэпытэу, къыжэдэпщэу упылъымэ, къызэкIэкIыщт.

Илъэсхэр псынкIэу мачъэх, ахэр къэб­гъэуцунхэ плъэкIыщтхэп. Заремэ уахътэм диштэу гъэхъагъэхэр иIэхэ хъугъэ. Тхылъэу «Ныбджэгъу къысфэхъу» зыфиIорэр кIэлэцIыкIухэм афитхыгъ, шъхьи 10-у зэхэт, уегупшысэмэ, ащ иIахь пэпчъ тхылъ икъун. ПчъагъэмкIэ 500 хъурэ тхылъыр хьалэлэу ыгощыгъ ыкIи ащ гухахъо хегъуатэ. ИIофшIагъэхэм, итхыгъэхэм ащыщхэр егъэджэн IэпыIэгъухэм къадэхьэх, ахэм специалистхэм уасэ афашIы. Заремэ итхылъхэм ащыщхэм лъэтегъэуцохэр кIэлэцIыкIу тхылъеджапIэхэм, культурэм иунэхэм ащафашIых.

Джырэблагъэ Заремэ итхылъэу «Ныбджэгъу къысфэхъу» зыфиIорэм Улапэ дэт кIэлэцIыкIу IыгъыпIэм чIэс сабыйхэр нэIуасэ фашIыгъэх. Ар зыпкъ къикIыгъэр куп нахьыжъхэр зезыщэрэ Алэкъэе Фатим. Сабыйхэр ежьхэм ашIэрэ сатырхэу «Жъогъобыным» къы­хэхыгъэхэм езбырэу къяджагъэх. Ащ ыужым тхылъэу «Ныбджэгъу къысфэхъу» зыфиIоу Хъуажъ Заремэ ытхыгъэр арагъэлъэгъугъ, ащ гъэшIэгъоныбэу дэтхэр кIэкIэу къафаIотагъ. Тхылъым усэхэр бэу дэтых: дунаим идэхагъэ, лъытакIэм изэгъэшIэн, ИлъэсыкIэм ехьылIагъэхэр…

«Мыхэр гощыгъэхэу, зэгъэфагъэхэу, тхылъ цIыкIу зырыз шIыгъэхэмэ, яшIуагъэ нахьыбэу къэкIощт, — еIо Алэкъэе Фатимэ, — сыдигъуи тхылъыкIэмэ тяжэ».

Заремэ укъызтегущыIэн плъэкIынэу нэмыкI тхылъхэр, орэдхэр иIэх.

Ащ ыцIэ къызэрепIоу, цIыфхэм «ТызэхэкIыжьы» зыфиIорэ орэдэу Нэхэе Тэмарэ къыIорэр зытхыгъэр ары!» аIо.

Сэ сшъхьэкIэ Заремэ итхылъэу «ТызэрэшIэу тыжъугъэщх» зыфиIорэм сигъатхъэу седжагъ. Тхьаегъэпсэу! ИлъэкI хэхъонэу, тхылъеджэхэми нахь зыкъыфагъэзэнэу, итхылъхэр нахьыбэрэ агъэ­федэнхэу фэсэIо. Сэ сишIошIкIэ, Къэралыгъо шIухьафтыныр Хьакъунэ Заремэ тефэ. Сабыйхэм якъэIэтын зэкIэмэ анахь Iоф шъхьаI!

Пщыкъэнэ Май. Улап.