«Урожай» Краснодар – «Зэкъошныгъ» Мыекъуапэ – 1:3. Бэдзэогъум и 20-м Краснодар щызэдешIагъэх.

«Зэкъошныгъ»: Ковалев, Кирьян, Катаев, Бровчук, Юрченко (Дыхъу, 77), Белов, Ахмедханов, Делэкъу, Мамонов (Макеров, 80), Къонэ, Кадимов (Крылов, 70). «Зэкъошныгъэм» хэтхэу къэлапчъэм Iэгуаор дэзыдза­гъэхэр: Кадимов – 5, Ахмедханов – 35, 60.

Урысыем и Кубок футболымкIэ къыдэхыгъэным фэгъэхьыгъэ апэрэ пэшIорыгъэшъ зэIукIэгъур Краснодар щыкIуагъ. «Зэкъошныгъэм» ешIапIэм ыбгъухэр ыгъэфедэхэзэ, нахьыбэрэ ыпэкIэ илъыным зэрэпылъым шIуагъэ къыфихьыгъ. Тофик Кадимовым зэIукIэгъум иапэрэ такъикъхэм къэлапчъэм Iэгуаор зэрэдидзагъэм ешIэгъум къэгъэзапIэ фи­шIыгъ. «Урожаим» ухъумэн Iофыгъохэр зыпкъ ригъэуцонхэ ымылъэкIызэ, Ризван Ахмедхановыр ыпэкIэ зелъым хэкIыпIэр псынкIэу къыгъоти, къэлапчъэм Iэгуаор дидзагъ.

Я 47-рэ такъикъым «Урожаим» Iэгуаор тикъэлапчъэ къызыде­дзэм, «Зэкъошныгъэр» нахь шъуам­бгъоу ешIэу фежьэжьыгъ. Р. Ахмедхановым ухъумакIор ыгъэплъэхъуи, лъэшэу зэогъэ Iэгуаор хъагъэм щычэрэгъугъ.

— Урысыем изэнэкъокъу хэхьэрэ ешIэгъур бэдзэогъум и 24-м Мыекъуапэ щытиIэщт, ФК-у «Махачкала» къетэгъэблагъэ. Апэ ит команди 5-мэ ащыщ тыхъуным 2019 – 2020-рэ илъэс зэнэкъо­къум тыфэбэнэщт. Стадион дахэ тиI, ешIэкIэ дэгъу къэдгъэлъэгъон тимурад, — къытиIуагъ «Зэкъо­шныгъэм» итренер шъхьаIэу, Адыгеим изаслуженнэ тренерэу Ешыгоо Сэфэрбый.

Урысыем и Кубок икъыдэхын фэгъэхьыгъэ ятIонэрэ зэIукIэгъур бэдзэогъум и 28-м Мыекъуапэ щыкIощт. «Черноморец» Новороссийск тикъалэ къэкIощт. «Зэкъошныгъэр» неущ Махачкала икомандэ дешIэщт, зэнэкъо­къур сыхьатыр 18.30-м аублэщт.