ОсэшIу къыфашIыгъ
Адыгэ Республикэм и Лъэпкъ тхылъеджапIэ урысые зэнэкъокъоу «Моя Россия. Культура и искусство» зыфиIорэм хэлэжьагъ.
Урысые проектэу «Моя Россия» зыфиIорэм хахьэу Народнэ энциклопедием и Академие зэнэкъокъум кIэщакIо фэхъугъ. Тикъэралыгъо, ащ ишъолъырхэм ятарихъ ыкIи якультурэ, тилъэпкъэгъухэм къарыкIуагъэр зэлъягъэшIэгъэным проектыр фэIорышIэ.
БиблиоЭкоТурэу «Красота земли моей» зыфиIорэм хахьэу сурэт техыгъэхэмкIэ зэнэкъокъоу щыIагъэм изэфэхьысыжьхэр Iофтхьабзэм къыщашIыгъэх.
БиблиоЭкоТурыр краеведческэ нэшанэ зиIэ зэхэубытэгъэ Iофтхьабзэу щыт. Ащ хэхьэх:
— сурэттехыныр, сурэтыр зыщытырахыгъэ чIыпIэр икъоу къиIотыкIыгъэныр;
— БиблиоЭкоТурыр зэрэзэхащагъэм иедзыгъо пэпчъ СМИ-хэм ыкIи социальнэ сетьхэм къарыгъэхьэгъэныр;
— республикэм ичIыпIэ дахэхэм зекIохэр ащызэхэщэгъэнхэр;
— зэнэкъокъум икIэухым жюрим анахь дэгъоу къыхихыгъэ сурэттехыгъэ зэхэубытагъэхэр (сурэтыр зыщытырахыгъэ чIыпIэхэр, тарихъэу пылъыр, къэкIыхэрэм, псэушъхьэхэм ямэхьанэ къыраIотыкIэу) къыдэгъэкIыгъэнхэр ыкIи тхылъеджапIэм ифонд илитературэ гъэфедэгъэныр.
Адыгэ автоном хэкур загъэпсыгъэр илъэси 100 зэрэхъущтым ихэгъэунэфыкIын мы проектыр фэгъэхьыгъ, 2018-рэ илъэсым АР-м и Лъэпкъ тхылъеджапIэ ар щырагъэжьагъ, мы мафэхэми а проектым игъэцэкIэн лъагъэкIуатэ.
БиблиоЭкоТурэу «Красота земли моей» зыфиIорэм мурадэу иIэр экологическэ культурэм фэпIугъэнхэр, къызщыхъугъэхэ чIыпIэр, ячIыгу шIулъэгъуныгъэу фыряIэр зэлъягъэшIэгъэныр ары.
АР-м итхылъеджапIэ осэшIоу къыфашIыгъэм кIуачIэ къаритызэ яIофшIэн лъагъэкIуатэ.