Адыгэ Республикэм хъарзынэщхэмкIэ икъулыкъу зызэхащагъэр илъэс 95-рэ мэхъу
Тарихъым иухъумакIох
Адыгеим и Лъэпкъ хъарзынэщ мы мэфэ благъэхэм июбилей хигъэунэфыкIыщт. Илъэс 95-кIэ узэкIэIэбэжьмэ, 1922-рэ илъэсым мэлылъфэгъум и 19-м РСФСР-м и Гупчэ хъарзынэщ пшъэрылъ къызэрэфишIыгъагъэм тетэу Адыгэ гъэцэкIэкIо комитетым и Президиум Архив бюром изэхэщэнкIэ бэдзэогъум и 22-м унашъо ыштэгъагъ.
Хъарзынэщхэр шъыпкъэм иухъумакIох. Ахэм ачIэлъ документхэмкIэ къэралыгъоми, лъэпкъхэми гъогоу къакIугъэм зыщыбгъэгъозэн плъэкIыщт. ЛIэшIэгъубэ тешIагъэми, лIэуж пчъагъэ дунаим къытехъожьыгъэми, хъарзынэщым документхэу чIэлъхэм хъугъэ-шIэгъэ чыжьэхэр уапашъхьэ къырагъэуцох.
Хъарзынэщым къакIорэ пэпчъ шъэфыбэ къыфызэIухыгъэ мэхъу. Тхьапэхэр зэпыригъазэхэзэ, тиреспубликэ, тикрай, тихэгъэгу тарихъ гъогоу къакIугъэр ащ ынэгу къыкIэуцо.
Хъарзынэщхэм яIофышIэхэм пшъэрылъ шъхьаIэу яIэр осэнчъэу щыт документхэр кIэзыгъэнчъэу къаухъумэнхэр, ахэм къэбархэу арытхэр цIыфхэм алъагъэIэсынхэр ары.
Адыгеим ихъарзынэщ иIофышIэхэмкIэ апэрэ илъэсхэр, егъэжьэгъур къиныгъэ. Документхэр зыщаIыгъыщт унэ щыIагъэп, бюром Iоф щызышIэщтыгъэ нэбгырэ закъом хэку статистическэ бюроми пэщэныгъэ дызэрихьэщтыгъ. 1925-рэ илъэсыр ары унэ къафыхагъэкIи документхэр ахэм зэрагъэуIоу заублагъэр.
Граждан заомрэ Хэгъэгу зэошхомрэ ялъэхъан архив хэку фондым чIэнэгъэшхо зэришIыгъэр къэIогъэн фае. 1932 — 1942-рэ илъэсхэм документхэу аугъоигъэхэм ащыщыбэ нэмыц-фашист техакIохэм тихэку заубытым ашIокIодыгъагъ. Джащ фэдэу Казахстан ит къалэу Челкар агъэкощыхэ зэхъум, хэку хъарзынэщым идокументхэм ащыщхэр ашIокIодыгъагъэх. 1944-рэ илъэсым ыкIэхэм адэжь ахэм къарагъэгъэзэжьыгъагъ. Ау заом Мыекъуапэ зэрэзэщигъэкъогъагъэм къыхэкIэу ахэр зыщаIыгъын чIыпIэ щыIагъэп. 1945-рэ илъэсым ыкIэхэм адэжь ары хэку судыр зычIэтыгъэ унэм ичIыунэ щыщ хъарзынэщым къызыфыхагъэкIыгъагъэр. Джащыгъум Адыгэ автоном хэкум итарихъ зыпкъ игъэуцожьыгъэнымкIэ ахэм Iофышхо ашIагъ. Хъарзынэщхэм ащылажьэщтыгъэхэм псаоу къэнэжьыгъэ документ зэе-тIуаехэм яугъоижьынкIэ, ахэр цIыфхэм къафэухъумэгъэнхэмкIэ апшъэ бэ ифагъэр.
Адыгеим ихъарзынэщ иIофхэр зэпыфэнхэмкIэ бэ зэшIуахыгъ ГъэIорышIапIэм иапэрэ пэщагъэу ЛIыпый Мирэ, илъэс 16-м ехъукIэ ащ пэщэныгъэ дызезыхьэгъэ Шъынэхъо Асе, илъэси 10-м ехъукIэ ГъэIорышIапIэм щылэжьэгъэ Бэрэтэрэ Тэмарэ. Къэралыгъо хъарзынэщым илъэс 34-рэ ипэщэгъэ Арутюнова Любовь, илъэси 10-м ехъукIэ ащ идиректорыгъэу Рагулина Ольгэ, архивхэмкIэ муниципальнэ образованиехэм яотделхэм япэщагъэхэу Гунай Аслъанхъан, Апыщ Эммэ, Червякова Людмилэ, Несмеянова Надеждэ, Даур Щамсэт яIофшIакIэкIэ щытхъур къалэжьыгъ. Адыгэ Республикэм ихъарзынэщ илъэсыбэрэ щылэжьагъэхэу, непи ащ Iоф щызышIэхэу М. ЛъэпцIэрыкъом, Р. Костроминам, Н. Кулагинам, М. Бычковскаям, Н. Рябовам, Т. Харченкэм, Т. Говоровам, Р. ХъуратIэм, Ф. Гъонэжьыкъом, М. Къэзанэм, С. Iэшъынэм, З. Теуцожьым, З. ПIатIэкъом, М. Толмачевам, С. ХъутIыжъым, С. Дзыбэм, М. ЛIыхасэм «тхьашъуегъэпсэу» ятэIо.
Лъэпкъ хъарзынэщым иIофышIэхэу лъытэныгъэ зыфэтшIыхэрэр!
ШъуиюбилейкIэ тышъуфэгушIо, хъупхъэу шъузэрэлажьэрэм, дунаим джыдэдэм тетхэми, ыужкIэ къытехъощтхэми апае Iофышхо зэрэзэшIошъухырэм афэшI лъэшэу тышъуфэраз!
БрантI Азэмат. АР-м и Лъэпкъ хъарзынэщ идиректор. Дзыбэ Зулим. Хъарзынэщым иотдел ипащ.