Джэныкъо машIор щыкIосэщтэп
Кавказ лъэпкъхэм къашъомкIэ, орэдышъомкIэ я Дунэе фестиваль Тыркуем икъалэу Яловэ щыкIуагъ.
Кавказ шъолъырым ыкIи дунаим ямамыр псэукIэ гъэпытэгъэным фэгъэхьыгъэ я ХVI-рэ фестивалым Дагъыстан иансамблэу «Дагъыстан иныбжьыкIэхэр», Къэбэртэе-Бэлъкъарым къикIыгъэ «Щагъдыир», Темыр Осетием — Аланием икупэу «Орионыр», Адыгэ Республикэм иансамблэу «Мыекъуапэ инэфылъэхэр», Тыркуем икупхэр хэлэжьагъэх.
— Хабзэм икъулыкъушIэхэр, искусствэм иIофышIэхэр, ныбджэгъухэр бэ хъухэу дахэу къытпэгъокIыгъэх, тагъэлъэпIагъ, — къытиIуагъ «Мыекъуапэ инэфылъэхэм» яхудожественнэ пащэу, Къэбэртэе-Бэлъкъарым изаслуженнэ артистэу, Адыгэ Республикэм инароднэ артистэу Нэныжъ Айдэмыр.
— Пащэхэм лъэпкъ искусствэм зиушъомбгъунымкIэ сыда анахьэу яеплъыкIэхэм къащыхагъэщыгъэр?
— Яловэ игубернаторэу Муаммэр Эрол искусствэм лъэпкъхэр зэрэзэфищэхэрэр, яцIыкIугъом къыщегъэжьагъэу кIэлэеджакIохэр лъэпкъ шIэжьым, культурэм апыщагъэхэ зэрэхъухэрэм къатегущыIагъ. Кавказ шъолъырым исхэм шэн-хэбзэ гъэшIэгъонхэр зэряIэхэм мэхьэнэ ин иIэу ылъытагъ, тэ, адыгэхэм, къытщытхъугъ.
— Яловэ имэрэу Вэфа Салман адыгэ махъулъэу зэрэщытыр къышъуиIуагъа?
— Тэ тызэрэщыгъуазэр ешIэ. УпчIэ етымытэу къэбар гъэшIэгъонхэр къытфиIотагъэх. Адыгэ къашъохэр ыгу рехьых, тиорэдышъохэм ядэIузэ пчэгум щыуджы шIоигъоу уахътэ къекIу.
— Кавказ заом адыгэхэу хэкIодагъэхэм саугъэтэу афагъэуцугъэр зэжугъэлъэгъугъа? — ХыIушъом ичIыпIэ анахь дахэм саугъэтыр щагъэуцугъ. Адыгэ быракъыр сурэтэу тешIыхьагъ. Саугъэтым ыпашъхьэ тыщытэу нэпэеплъ сурэтхэр ттырахыгъэх. НыбжьыкIэхэр лъэпкъ шIэжьым изыкъегъэIэтын зэрэпылъхэр, тарихъыр нахьышIоу зэрагъашIэ зэрашIоигъор зэхахьэм къыщылъэгъуагъ.
Егъэжьэгъур
— Фестивалым ублапIэу фашIыгъэм тытегъэгущыIэба.
— Нурбый, ащ фэдэ фестивалым ухэлажьэзэ гум къихьэрэр макIэп. Нэрылъэгъу IэпыIэгъухэр дахэу агъэпсыгъэх. Тыркуемрэ Адыгеимрэ ябыракъхэр нахь хэушъхьафыкIыгъэхэу зы пхъэмбгъум къыщагъэлъагъохэу тлъэгъугъэх. Адыгэ Республикэм ибыракъ зэрагъэбыбатэщтыгъэр сыдым ымыосагъа?!
— Сэри ар сшIогъэшIэгъон, къэIуат.
— «Мыекъуапэ инэфылъэхэм» хэтхэу Хьакъуй Ислъамрэ Быщтэкъо Анамиррэ зэкIэми апэ ишъыгъэхэу адыгэ быракъыр лъагэу аIэтыгъэу агъэбыбатэщтыгъ. Мамсыр Мадинэ, Сихъу Джэнэт, ЯхъулIэ Альмир, нэмыкIхэри апэ итхэм алъэкIох. ЗэкIэ тиартистхэм быракъыр аIыгъ, жъогъо 12-р, щэбзищыр къызэрэхэлыдыкIыхэрэм егъэгушхох. Урамым ыбгъукIэ щытхэу къытэплъыхэрэр къытфэнэгушIохэу Iэгу къытфытеуагъэх. Урамым тырыкIозэ чIыпIэ хэхыгъэхэм къашъохэр къащытшIыгъэх.
— Концертыр гъэшIэгъонэу кIуагъэу ны-тыхэу шъуигъусагъэхэм къаIуагъ.
— Культурэм и Унэшхо щызэхащэгъэ концертым нэбгырэ мини 4 фэдиз еплъыгъ. Кавказ илъэпкъ искусствэ зэрэбаир цIыфхэм ашIэ, языгъэпсэфыгъо уахътэ гум къинэжьынэу агъакIо.
— Фестивалыр зэнэкъокъоу щытыгъэп.
— Тызэнэкъокъуным, щытхъуцIэ къыдэтхыным пае Тыркуем тыщызэIукIагъэп. Искусствэм ыбзэкIэ «тызэдэгущыIагъ», лъэпкъхэм якультурэ нахьышIоу зэдгъэшIагъ. Чэщым сыхьатыр 12-м къехъугъэу концертыр къызаухым, цIыфхэр зэбгырыкIыжьынхэм дэгуIагъэхэп. Джэгум щыуджыгъэх.
— Айдэмыр, адыгэ быракъыр, адыгэ шъуашэр…
— КъызгурыIуагъ къапIомэ пшIоигъор. Адыгэ шъуашэм идэхагъэ зыIэпищагъэхэу нэбгырипшI пчъагъэ къытэкIолIагъ, нэпэеплъ сурэтхэр атырахыгъэх. Адыгэ шъуашэмрэ адыгэ быракъымрэ дунаим шIукIэ щашIэх, лъэпкъхэр зэфащэх.
— Адыгэ къуаджэу Сэуджакъ шъузэрэщыIагъэм сыда къепIолIэщтыр?
— Илъэс заулэ хъугъэу къуаджэм тэкIо, адыгэх ащ дэсхэр. Тиныдэлъфыбзэ ашIэ. Адыгэ джэгум тыкъыщышъуагъ. Пхъэ машIор зэкIагъани, чэщым сыхьатыр зы хъугъэу цIыфхэр зэбгырыкIыжьыгъэх.
— Сэуджакъ лъэпкъ шэн-хабзэу щызэрахьэрэр ижъырэ адыгэхэм япхыгъэу щыта?
— Iанэм лъэпкъ шхыныгъоу къытырагъэуцуагъэм къыщебгъэжьэнышъ, джэныкъо машIом тыкIэлъырысэу къэбарэу къытфаIотагъэхэр тятэжъ пIашъэхэм ящыIэныгъэ щыщых. Къалэу Баликесир тыщыIэу шыухэр тапэ итхэу, адыгэ шъуашэр ащыгъэу, фестивалым хэлажьэхэрэм ябыракъхэр быбатэхэзэ урамым къызэрэрыкIуагъэхэр егъашIи тщыгъупшэщтэп. Джэныкъо машIор Сэуджакъ зэрэщыблэрэр сынэгу кIэт.
— Айдэмыр, дунаим щызэлъашIэрэ «Налмэсым» илъэсыбэрэ укъыщышъуагъ, IэкIыб къэралыгъохэм уащыIагъ. Плъэгъурэр угу къызэрибгъэнэжьырэр къытапIо тшIоигъу.
— Гум щыщыр псэм хэпхын плъэкIыщтэп. Сэ анахьэу сызыгъэгушIорэр «Мыекъуапэ инэфылъэхэм» ащыуджыхэрэм гукъэкIыжь гъэшIэгъонхэр яIэу республикэм къызэрагъэзэжьыгъэр ары. Адыгэ Республикэм и ЛIышъхьэу КъумпIыл Мурат бэмышIэу Тыркуем зэрэщыIагъэм щыгъуазэх, республикэм ипащэ къыщытхъугъэх. ЦIыфхэр нахьыбэрэ зэIукIэхэ ашIоигъу… Адыгэхэр зыхэт кIэлэцIыкIу футбол командэм тыIукIагъ.
— «Мыекъуапэ инэфылъэхэм» фестивалым къыщашIыгъэ къашъохэр къытаIоба.
— Къашъохэу «Ислъамыер», «Уджыр», «ЗэфакIор» къэдгъэлъэгъуагъэх. Сэе фыжьхэр зыщыгъ пшъашъэхэр къахэщыгъэх. «Си Адыгеири» бэмэ агу рихьыгъ.
— КъэшъуакIохэм ащыщхэм ацIэ кытфеIоба.
— Быжь Эльдар, Къазый Бислъан, Нэгъой Мадинэ, СултIан Эльмирэ, Шыумэфэ Астемир, Гъащтэ Ренат, Гъащтэ Тамир, нэмыкIхэр къахэзгъэщыхэ сшIоигъу. «Си Адыгеир» къыхадзэ ЯхъулIэ Альмиррэ Нэныжъ Амилэрэ. Фестивалым къыщыттыгъэ концертым еплъыгъэхэ Муаммэр Эрол, Вэфа Салман, Урысыем илIыкIоу Истамбул щыIэ Алексей Свердник, нэмыкIхэри тизэхахьэхэм къащыгущыIагъэх. Адыгэ Республикэм и ЛIышъхьэ, Правительствэм, нэмыкIхэу IэпыIэгъу къытфэхъугъэхэм тафэраз.
— ТапэкIи зэхахьэхэм чанэу шъуахэлэжьэнэу шъуфэтэIо.
— Тхьашъуегъэпсэу.
ЕмтIылъ Нурбый.