«Единэ Россием» ифракцие идепутатхэм къагъэхьазырыгъэ законопроектитIоу медицинэ IофышIэхэмрэ сымаджэхэмрэ яфитыныгъэхэм якъэухъумэн тегъэпсыхьагъэр ящэнэрэ еджэгъумкIэ Къэралыгъо Думэм ыштагъ.

Ар зыфэгъэхьыгъэр Урысые Федерацием и Уголовнэ кодексрэ Урысые Федерацием административнэ хэбзэукъоныгъэ­хэмкIэ и Кодексрэ зэхъокIыныгъэ гъэнэфагъэхэр афэшIыгъэн­хэр ары. Медицинэ IофышIэхэм япшъэрылъхэм ягъэцэкIэнкIэ пэрыохъу къафэхъухэрэм пшъэ­дэкIыжьэу арагъэхьырэр нахь гъэлъэшыгъэнэу ахэм къащыдэ­лъытагъ.

Медицинэ IофышIэхэм япшъэ­рылъ агъэцакIэзэ япсауныгъэ зэщагъакъоу, зэрар арахэу загъорэ къыхэкIы. Ащ епхыгъэу Урысые Федерацием и Уголовнэ кодекс ия 115-рэ, ия 119-рэ статьяхэм зэхъокIыныгъэ гъэнэфагъэхэр афэшIыгъэнхэ фаеу законопроектым щалъытэ. Джащ фэдэу медицинэ IэпыIэгъу аратыным пэрыохъу фэхъухэрэми пшъэдэкIыжьэу арагъэхьыщтыр уголовнэ хэбзэгъэуцугъэм щагъэнэфэнэу игъо алъэгъу.

Муниципалитет заулэмэ медицинэ IэпыIэгъу щязытын зылъэкIыщт IофышIэ закъор загъэфыкъокIэ, псэупIэм дэсхэр зыщыгугъын ямыIэжьэу къызэрэнэхэрэм цIыфхэр лъэшэу егъэгумэкIых.

Урысыем административнэ хэбзэукъоныгъэхэмкIэ и Кодекси зэхъокIыныгъэ гъэнэфагъэхэр фэшIыгъэнхэ, медицинэ Iофы­шIэм ипшъэрылъхэм ягъэцэкIэнкIэ пэрыохъу хъухэрэм пшъэдэкIыжьэу арагъэхьыщтыр ащ щыгъэнэфэгъэн фаеу алъытэ. IэпыIэгъу псынкIэм имашинэ блэзымыгъэкIыхэрэм сомэ мини 3-м къыщегъэжьагъэу сомэ мини 5-м нэс тазырэу арагъэтыщт е илъэсрэ транспортыр зэрафэн фимытэу ашIыщт. Джыдэдэм тазырэу аIахырэр сомэ 500 е зы мазэм къыщегъэжьагъэу мэзищым нэс тран­спортыр зэрафэн фитхэп.

Къэралыгъо Думэм идепутатэу, «Единэ Россием» и Генеральнэ совет исекретарь игуадзэу Александр Грибовым къызэриIуагъэмкIэ, а законопроектхэр врачхэмрэ сыма­джэхэмрэ яфитыныгъэхэм якъэухъумэн фэлэжьэщтых.

Шъугу къэтэгъэкIыжьы медицинэ IофышIэхэмрэ сыма­джэхэмрэ яфитыныгъэхэр на­хьышIоу къэухъумэгъэнхэм тегъэпсыхьэгъэ федеральнэ законхэм япроектхэм бэдзэогъум и 10-м Къэралыгъо Думэм пленарнэ зэхэсыгъоу иIагъэм ятIонэрэ хэплъэгъумкIэ къазэращадырагъэштагъэр.