Къэралыгъо премие къызэратынхэу зыкъэзыгъэлъэгъуагъэхэр
Нэбгырэ пэпчъ илъэгапIэ ежь къыхехы
Кушъу Аслъан иапэрэ IофшIагъэ зетхым я 6-рэ классым щеджэщтыгъ. Чили икоммунистхэм ягенеральнэ секретарэу Луис Корвалан ар фэгъэхьыгъагъ. А лъэхъаным шъхьафитныгъэм фэбэнэрэ коммунистыр Пиночет ихьапс чIэсыгъ. Я 10-рэ классхэм ащеджэрэ кIэлэеджакIохэм язэнэкъокъу хэлэжьэгъэ кIэлэцIыкIум ящэнэрэ чIыпIэр къыхьыгъагъ. Аслъан ицIыкIугъом къыщегъэжьагъэу усэхэр ытхыщтыгъэх.
ЕтIанэ культурэм икъэралыгъо институтэу Краснодар дэтым икультурнэ-просветительскэ факультет театрэхэм апае режиссерхэр къэзыгъэхьазырырэм иотделение щеджагъ, къыухыгъ. Институтым чIахьэ зэхъум сочинениеу ытхыгъэм еджагъэу урысыбзэмрэ литературэмрэкIэ кафедрэм ипащэу, филологие шIэныгъэхэмкIэ докторэу Инна Ивановна Гусаровам кIалэр къыгъоти, нэIуасэ зыфишIыгъ. Кафедрэм ригъэблагъи, къеупчIыгъ культурэм иинститут кIалэм тэрэзэу къыхихыгъэмэ, ар ежь Аслъан зыпылъын фаер арымэ, тэрэзэу егупшысагъэмэ, тапэкIэ ащ зыкъыщызэIуихын ылъэкIыщтмэ…
— Сыд пае зыкъыщызэIусымыхышъущта? — ыIуагъ Аслъан.
— ГрамматикэмкIэ, синтаксисымкIэ ыкIи пунктуациемкIэ шIэныгъэ дэгъу дэдэхэр уимыIэхэми, ямышIыкIэу утхэн, уигупшысэхэр къипIотыкIынхэ олъэкIы, ар о зэрэпшIырэр сэ сипрофессиональнэ гулъытэ къыубытырэп, — къыриIуагъ Гусаровам.
ЕтIанэ зычIахьэм икIэлэегъаджэрэ кIалэмрэ бэрэ литературэм фэгъэхьыгъэу зэдэгущыIэхэу къыхэкIыгъ. КIэлэегъаджэм Наташа Ростовар шIу дэдэ ылъэгъоу, икIэсэ образэу щытыгъ, сыхьат пчъагъэрэ ащ къытегущыIэн ылъэкIыщтыгъ, Аслъан шIотэрэзыгъэп Наташа Ростовам Андрей Болконскэр IэкIыб зэришIыгъэр, изекIуакIэ къумалыгъэ хилъагъощтыгъ.
Адыгэкъалэ къыщыдэкIырэ гъэзетэу «Единствэм» иредактор шъхьаIэ игуадз Аслъан, ащ щыриIэ кабинетыр ары итворческэ лабораториери, ары къызычIэкIыгъэр итхылъитIоу повестьхэмрэ рассказхэмрэ къызыдэхьагъэхэр. Ахэр «Гончарный круг» ыкIи «Письма в вечность» зыфиIохэрэр арых.
ИныбжьыкIэгъум культурэм иIофышIэу ыкIи народнэ театрэм ирежиссер IэнатIэр къыхихи, етIанэ нэмыкI сэнэхьат зыфигъэзэнэу зэрэхъугъэмкIэ сеупчIы.
— Я 3-рэ курсым сисэу къызгурыIуагъ уищыIэныгъэ зэппхын угу хэлъ IофшIэным профессиональнэу упылъын зэрэфаер. Ар сэзыгъаIорэр тиинститут профессиональнэ режиссерхэр арымырэу, самодеятельнэ театрэм пае а сэнэхьатым Iоф рызышIэщтхэр зэригъэхьазырыщтыгъэхэр ары.
— А лъэхъаным Адыгеим культурэмкIэ игъэIорышIапIэ «бронь» ГИТИС-м укIонэу къыуитыщтыгъ.
— Арэу щытми, сыкIуагъэп, сыда пIомэ аужырэ курсым сисыгъ, сянэ-сятэхэр пенсионерыгъэх. Ахэр зэкIэри мыушъхьагъунхэкIи хъун, институтым творческэу сыгупшысэнэу сигъэсагъэми, а лъэхъаным театрэм сыгукIэ пэчыжьэ сыхъугъагъ. ЦIыфыр ыгукIэ къыхихыгъэу игуапэу ышIэрэр ары зыпылъын фаер.
— Журналистикэм узэрэхэхьагъэм ехьылIагъэу къэпIон хъумэ…
— Ащ сыкъыхэхьаным ыпэкIэ сытхэу езгъэжьэгъагъ, институтым сызычIэсым сценэм щагъэуцущтхэ прозаическэ произведениехэм атехыгъэхэ сценариехэр ыкIи агитбригадэхэм апае сценариехэр стхыщтыгъэх, краевой гъэзетэу «Комсомолец Кубани», дзэм Казахстан сызыщэIэм Среднеазиатскэ дзэ округым игъэзетэу «Боевое знамя» зыфиIорэм сафатхэщтыгъ.
Журналистикэми литературэми а зы уахътэм — 1986-рэ илъэсым — сахэхьагъ. Район гъэзетым ыкIи республикэ гъэзетитIуми ситхыгъэхэр къарыхьэщтыгъэх. 2006-рэ илъэсыр анахь мэхьанэ зиIэу сэрыкIэ хъугъэ — рассказхэр зыдэт сборникэу «Гончарный круг» зыфиIорэр къыдэкIыгъ. ИпчъагъэкIэ зы мин хъоу къыхаутыгъэ тхылъыр псынкIэу зэбгы-рыкIыгъ. Республикэм итхылъ еджапIэхэм, щапIэхэм анэмыкIэу Краснодар краим ибиб-лиотекэхэми ар ящыкIагъэу къычIэкIыгъ.
А илъэс дэдэм синасып къыхьыгъ дунэе ыкIи всесоюзнэ литературнэ премиехэм ялауреатэу, ахэм ахэт дунэе литературнэ премиеу Михаил Шолоховым ыцIэкIэ агъэнэфагъэр къызэратыгъэ Виталий Бакалдиным нэIуасэ сыфэхъунэу. А лъэхъаным ар гъэзетэу «Вольная Кубань» игъусэу къыдэкIырэ «Литературная Кубань» зыфиIорэм иредактор шъхьэIагъ. Стхыхэрэр къыригъэхьанхэу ащ Iуагъэ къыздишIыгъ ыкIи 2007-рэ илъэсым Пшызэ шъолъыри Адыгеими защеджэхэрэ гъэзетхэм язы нэкIубгъо — нэкIубгъуитIумэ, загъорэ нахьыби къарыхьэу хъугъэ. Гъэзетэу ипчъагъэкIэ мин 21 — 23-рэ хъоу къыдэкIырэм илъэсым къыкIоцI сирассказ 11 къарыхьагъ. Анахь тхэкIо цIэрыIори а лъэхъаным ащ кIэхъопсыщтыгъ. Ау 2008-рэ илъэсым гъэзетэу «Литературная Кубань» илъэс 13-рэ къызыдэкI нэуж, ахъщэ зэрэщымыIэм къыхэкIэу, зэфашIыжьыгъ. Аужырэ номерым редколлегием къыщитхыгъагъ: «Анахьэу къыхэдгъэщымэ тшIоигъор «Литературная Кубань» станицэу Васюринскэм щыщ Елена Краянскэмрэ Адыгэкъалэ щыпсэурэ Кушъу Аслъанрэ япрозэ чъэпхъыгъэ тигъэзет къыхиутынэу тинасып къызэрихьыгъэр ары. Ахэр къызэрэдгъотыгъэхэм тырэгушхо».
ЕтIанэ Бакалдиным сызыIокIэм сесэмэркъэугъагъ «шъора тыкъэзыгъотыгъэр, тэра шъукъэзыгъотынэу зинасып къыхьыгъэр?» сIуи. Ежь ынэмэ нэшхъэигъэр къакIэщэу «тыкъэзэрэгъотыгъ тIогъагъэмэ нахьышIугъэн фае» къысиIуагъ.
— Уитворческэ планхэр…
— ИлъэситIукIэ узэкIэIэбэжьымэ сыухи романэу «На седом Кавказе» цIэ зыфэсшIыгъэр Адыгэ тхылъ тедзапIэм естыгъ. Ащ итхын илъэси 7-рэ сыпылъыгъ. Романыр Пшызэ шъолъыррэ Адыгеимрэ я 19-рэ лIэшIэгъум къыщегъэжьагъэу непэрэ мафэхэм анэсыжьэу афэгъэхьыгъ. Ащ нэмыкIэу «Портреты времени» зыфиIорэ тхылъыри хьазыр. Ащ къыдэхьащтых илъэс 30-м ехъурэ журналистикэу Iоф зыщысшIагъэм къысIэкIэкIыгъэхэ IофшIагъэхэу гъэзетеджэхэм дэ-гъоу алъытагъэхэри, гу зылъамытагъэхэу, ау, сэ сишIошIыкIэ, гъэшIэгъонхэри.
— УиIофшIагъэхэр зэнэкъокъубэм къащыхагъэщыгъэх, джы АР-м и Къэралыгъо премие къызэратынэу къагъэлъэгъуагъэхэм уащыщ. ОркIэ ар джыри зы лъэгапIа?
— Нэбгырэ пэпчъ илъэгапIэ ежь къыхихын фит. Мы лъэгапIэм сынэсынэу бэшIагъэу зесэшэты. Апэрэу сирассказэу «Пес в ожидании чуда», ятIонэрэм рассказхэр къызыдэхьэгъэ сборникэу «Гончарный круг», ящэнэрэм повестэу «Голодная степень» къэзгъэлъэгъуагъэх. Джы мары «Письма в вечность» зыфиIорэ сборникэу повестьхэмрэ рассказхэмрэ зыдэтхэр ары.
ЗэлъашIэрэ тхакIоу Юрий Поляковым зэгорэм ыIогъагъ «сэ сшIэзэ литературнэ зэнэкъокъухэм сахэлажьэрэп» ыIуи. Ушъхьагъоу иIэхэри къыпчъыгъагъэх. Сэ сшIэзэ сахэлажьэ, сыда пIомэ сиIофшIагъэхэу къэзгъэлъэгъуагъэхэм сызытеукIытыхьан ахэтэп.
— Тхьауегъэпсэу, уигухэлъхэр къыбдэхъунхэу пфэсэIо.
Тыркоо Мурат.
Журналист.