ИгущыIэ гум нэсы
ЦIыфхэр зэрэзэфэмыдэм фэдэх, тхылъхэри зэфэдэхэп. Узеджэгъэ уж бэрэ пщымыгъупшэжьэу узыфэзыкъудыирэ тхылъыр зэрэгъэшIэгъоным щэч хэлъэп.
ГутIэ Саныет итхылъэу «ГущыIэр макIэу» зыфиIорэр ащ фэдэ тхылъ. Мыщ гупшысэхэр, сатыриплIхэр ыкIи поэмэхэр къыдэхьагъэх. УсакIом гъашIэр, уахътэр, щыIэныгъэм илъэныкъо зэфэшъхьафхэр зэрэрилъэгъукIыхэрэм ахэр яхьылIагъэх, гупшысэр зэфэдэкIэ ащэIорышIэ. ЦIыф Iушым ыгуи ышъхьи зэхашIэрэм гъуни нэзи иIэп, етIани ар тхакIоу, усакIоу, зэдзэкIакIоу, чэщи мафи гупшысэм хэтмэ, игущыIэ кIуачIэ зэригъотыгъэм, шIоигъор бгъэгум шъхьафитэу къыдэкI зэрэхъугъэм ищыс мы тхылъыр.
ГутIэ Саныет я ХХ-рэ лIэшIэгъум ия 70 — 90-рэ илъэсхэм адыгэ литературэм къыхэхьэгъэ кIочIакIэхэм ащыщ, лъэпкъ поэзиер ибзылъфыгъэ къэлэмкIэ дахэу елэжьы. Ытхыхэрэр 1983-рэ илъэсым къыщегъэжьагъэу къыхеутых, гъэзетэу «Адыгэ макъэм», журналэу «Зэкъошныгъэм» иапэрэ усэхэр къащыхиутыгъэх, непи ныбджэгъуныгъэ пытэ адыриI. Саныет усэхэр зыдэт тхылъхэу «Къеблагъ», «Уаипчъ», «Гупшысэр жьыкорен», повестьхэр зыдэтэу «ШIэныгъэ шъэф», роман-эссеу «ОшъогуитIум азыфагу» ыкIи джы зигугъу къэсшIыщт поэтическэ сборникэу «ГущыIэр макIэу» зыфиIохэрэр ытхыгъэх, къыдигъэкIыгъэх.
Ауми, адыгабзэкIэ тхыгъэ художественнэ тхылъхэр щымыIэхэу, адыгэ усэри гъотыгъуаеу, адыгэ гущыIэри кIодыжьыгъэу зыIохэрэр республикэм икIэлэпIухэми, икIэлэегъаджэхэми ахэтых. Арышъ, кIэсэгъэтхъы, адыгэ тхылъ щыI гупшыси, акъыли, гъэсэпэтхыди хэлъэу, ау щымыIэр, зышIуигъэIофэу, тIысэу ахэм яджэн цIыф — тхылъеджэхэу ныбжь зэфэшъхьафхэм арытхэр арых.
ГутIэ Саныет итхылъэу «ГущыIэр макIэу» зыфиIорэр къоджэ еджапIэхэми, сэнэхьат зэгъэгъотыпIэ колледжхэми, адыгабзэр ыкIи литературэр къыхэгъэщыгъэу зыщызэрагъэшIэхэрэ апшъэрэ еджэпIэшхохэми, ахэм Iоф ащызышIэхэрэ кIэлэегъаджэхэми, студентхэми, аспирантхэми агъэфедэн алъэкIыщт, къашъхьапэнэуи сэгугъэ, адыгэбзэ къэбзэ куукIэ тхыгъэ.
Тхылъэу «ГущыIэр макIэу» зыфиIорэр щэу зэхэт: гупшысэхэр, ахэр хьарыфылъэм хэт хьарыф пэпчъкIэ авторым къырегъажьэх, сатыр пэпчъ, Iудэнэ пхъэтет къызэтещыкIэу, акIоцIипшэгъэ гупшысэр бгъэшIагъо икъоу къащыреIотыкIы, мыхэм адыгэ гущыIэжъхэм яфэмэ-бжьымэ къатео, ау авторым илэжьыгъэ иных. ГущыIэм пае, хьарыфэу «А» зыфиIорэмкIэ къежьэхэрэр ыкIи ащ къыкIэлъыкIорэ хьарыф пэпчъ гупшысэр ащышъхьэлъагъэу тапашъхьэ къырегъэуцо.
Акъыл зыхэмылъ Iофыр лъэпсэнчъэ. АкъылышIом къыIорэр гущыIэжъ. Акъылыр ныбжьым елъытыгъэп. Акъылым ылъапсэр гупшыс. Акъылыр кIуачIэм нахь лъэш.
Мыхэм афэдэ усэ сатырхэу гупшысэр зыщыIорышIэхэрэм узIэпащэу уяджэ, о гу зылъымытэгъабэ усакIом исатыр кIэкIхэм къызэращигъэгъунэрэр, гущыIэу «акъылым» ишIуагъэ, иинэгъэ-лъэшыгъэ кIигъэтхъызэ къегъоты.
Ау акъыл зыхэмылъыр е акъыл зимыIэр зэрэтхьамыкIэри егъэунэфы мыщ фэдэу: Акъылынчъэр насыпынчъ, — нэмыкI гупшысэ-сатырхэри.
Нахь тылъыкIотэнышъ, гупшысэхэр зыфэдэхэр зэдгъэшIэн. Хьарыфэу «З» зыфиIорэмкIэ къежьэхэрэр:
Зыгу губж имылъыр ары шIу зышIэрэр. Зыгу гумэкI илъ цIыфыр чэфынчъэ. Зыгу гушхор къушъхьэ шыгум нэсы. Зыгу къабзэм инэплъэгъу зэIухыгъ. Зыгу къабзэм ыбзэ убзэ хэлъ.
Мы гупшысэхэм шIыкIэшIур ащыкIэгъэтхъыгъ. Ежь усакIори «нэгъунджэшхомкIэ» цIыфхэм гуфаплъэу зэряплъырэр къэошIэ. УсакIом хэукъогъэнчъэу, психолог шъыпкъэу, дэгъури дэири зэфэдэу ипсэлъэ псыхьагъэкIэ нэм къыкIегъэуцо. ГущыIэм пае: Адыгэ гущыIэжъым «пыижъ блэгъэжъ хъурэп» еIомэ, ежь Саныет мыщ фэдэ къэIуакIэхэр егъэфедэх:
Зы пыир ныбджэгъуипшIым апеIэ. Зы пый уиIэнри, пыишъэ уиIэнри зэфэдэ.
Акъыл-шIэныгъэу къолъыр ГутIэ Саныет зэрэбэр, игупшысэ сатырхэм кIуачIэ зэряIэр укIуатэу, сатырхэм уяджэ къэс нахь къыпфэнафэ.
ГущыIакIэрэ шIыкIэрэ зыхэлъымкIэ псэлъэ шIыныр зэрэIэрыфэгъур тхылъэу «ГущыIэр макIэу» зыфиIорэм къеушыхьаты. Гупшысэ сатыр бэгъуагъэхэм ауж къекIых сатыриплIхэр, ахэм усакIом идунэелъэгъукIэрэ идунэееплъыкIэрэ икъу фэдизэу ащызэхэошIэ. ШIумрэ емрэ, дэгъумрэ дэимрэ, шъыпкъэмрэ пцIымрэ зэгопчынхэу щымытэу сыдигъуи щыIэныгъэм зэрэщыIорышIэхэрэр къащыриIотыкIыгъ. Щысэхэр:
ЩыIэныгъэр нарэм фэд, Нарэм фэдэу кIэко дэд. Дэгъуи дэий, къини хъяри ТащыIокIэ ори сэри. * * * Пчэдыжьымрэ пчыхьэмрэ азфагу дэтым IофшIэгъэ пчъагъэр Iапшъэм реIэты. Нэфылъ-нэфшъагъор щагум къыдахьэмэ, ЦIыфым Iоф Iахьэр къыфызэхелъхьэ. * * * УщыIэныр джэгу-къэшъо закъоу зэрэзэхэмылъыр, къини гушIуагъуи къызэпыпчыжьзэ, Iофыр мафэ къэс къыбготэу упсэуныр зэрэшапхъэр къыбгурегъаIо. Ауми, щыIэх бзэгум нахьрэ Iоф зимыIэхэри ыкIи ахэр еумысых тхакIом.
Чатэм нахьи нахь чанэу Бзэгум уеуIэ, бзэм уеукIы. Ау къитэфы жабзэм ынэ — Гум римыхьырэр пытэупкIы. * * * Зэчыишхо хэлъ — ФэIазэу пцIыр зэхелъхьэ. Хыер пцIым релъахъэ, Мысагъэр ыпашъхьэ релъхьэ.
Бзэгухьагъэр, хьилагъэр зэрэшэныжъ дэйхэр, ау ахэр уцлъэнтхъэим фэдэхэу, хыер ыпсэ хагъаIэу щыIэныгъэм джыри зэрэхэлъхэр тегъашIэ Саныет. АщкIэ щыIэныгъэ гъогур хэти тызэрэфаеу зэшъхьэзашъоу, зы лъэпэогъу цIыкIу гори хэмылъэу зэрэмыхъурэм гу лъытигъатэзэ, къиным цIыфыр пэшIуекIошъоу сыдигъуи есэн зэрэфаем, сыд хъугъэкIи гур бгъэкIоды зэрэмыхъущтым кIегъэтхъы. Ушъый-гъэсэпэтхыдэр игупшысэхэми, исатыриплIхэми, ипоэмэхэу «Гур зэгупшысэрэр», «IулIэIуданэу хыягъэр нафэ», «Iэджи щэхъу мы дунаим» зыфиIохэрэм тхакIом ахигощагъ. ЦIыфыр цIыфыным пае къызэрэхъурэр, ощ фэдэ цIыфым ышъхьэ урыкIоныр зэрэмытэрэзыр, шъхьэкIэфэ-лъытэныгъэр зыхэлъыр зэрэтынч насыпышIор, ау жъалымыгъэ-дысыгъэр зиIусхэм, шIур ракIызэ, ежьхэм яакъыл пэтагъэкIэ зэкIэ агъэIорышIэн ыкIи аIэ ралъхьан мурадэу яIэр зэрэпкIэнчъэр, мы дунаир зыIыгъыр шIур арэу зэрэщытыр Саныет поэмэхэм ащыкIигъэтхъыгъ. ШIоигъу адыгэ лъэпкъэу шIукIэ зыцIэ дунаишхом щыIугъэм идахэ хэти ымыулъэгоу, шъыпкъэр, лIыгъэр, зэфагъэр — цIыф къэрар къабзэр тыухъумэу, тызэфэсакъыжьэу тыщыIэнэу. Джащыгъум адыгэри хэхыгъэу, бжьышIоу къызэрэзэтенэщтыр, узфэсакъыжьыным имэхьанэ илъэшыгъэ ащыкIэгъэтхъыгъ поэмэхэм.
МэлэIич закIэу цIыфхэр зэхэтхэп, Ер зипыщэгъуи, шъэфэп, ахэт. Ем зэщифыгъэм игухэлъ бзаджэ Зэхытигъэхырэп шIур къакIоу къаджэми. Арэущтэу зыхъурэм, ем тыдехьыхы, Анахь кIуачIэу ер къыхэтэхы. Пкъэоу, пчэгъушхоу ер тэгъэуцу, ТыкIэгъэкъонышъ, ем тегъэуцо. ЗыкъызытшIэжьырэм шIум тыкъылъэхъу, Зэ къэтлъэгъунба? — Зыфэтэплъыхьэ. Ор дэтэшIэхы, ер итэупкIы, Мо пкъэу джэдэшхор зэдитэкIыкIы. ШIоу тыулъэгуи IэкIыб тшIыгъагъэм, ЗыкъызэIуехы гъэтхэ къэгъагъэу. Ыгу хэдгъэкIыгъэми шIум къытфегъэгъу — Лъэгъо-гъогу зафэр къытегъэлъэгъу.
УсакIоу ГутIэ Саныет ныбжьышхо имыIэми, игущыIэ шIыкIэкIэ ригъэжъыкIыжьыгъэм фэд, гупшысэкIэ амал дэгъухэри, усэкIэ шапхъэхэри, бзэ гъэфедакIэри икъу фэдизэу зиIэрылъхьэх, игущыIэ макIэми, IэшIу, гум нэсы. Бэдзэогъу мазэр Саныет къызыхъугъэ уахът, тыгу къыддеIэу псауныгъэ пытэ иIэнэу, имурадхэр псынкIэу зэшIуихынхэу ыкIи щыIэныгъэм итхъэгъо-тынчыгъо щымыкIэнэу тыфэлъаIо.
Мамырыкъо Нуриет.