Урысыем икIэлэеджакIохэм я Гъэмэфэ Спар­та­киадэ хэхьэрэ кIэух зэнэкъокъу дзюдомкIэ къа­лэу Череповец щыкIуагъ.

Хэгъэгум ия IХ-рэ Спартакиадэ шъолъыр 47-мэ ялIыкIохэр хэлэжьагъэх. Адыгэ Республикэм дзюдомкIэ иеджапIэу Кобл Якъу­бэ ыцIэ зыхьырэм ипащэу, спортымкIэ дунэе класс зиIэ мастерэу КIуае Хьазрэт къызэрэтиIуагъэу, Урысыем пэшIорыгъэшъ зэIукIэгъухэр щыкIуагъэх. Яонтэгъугъэ­хэм ялъытыгъэу апэрэ чIыпIэхэр къыдэзыхыгъэхэр кIэух зэнэкъо­къум хагъэлэжьагъэх.

Килограмм 73-м нэс къэзыщэ­чыхэрэм якуп Григорий Саакян тыжьыныр къыщыфагъэшъошагъ. Урысыем изаслуженнэ тренерэу Сергей Шутоловым бэнакIор ­егъасэ.

ЖакIэмыкъо Темыркъан дзюдомкIи, самбэмкIи мэбанэ, хэ­гъэгум щыкIохэрэ зэIукIэгъухэм хагъэунэфыкIырэ чIыпIэхэр къащехьых. Килограмм 60-м нэс къэзыщэчыхэрэм якуп хэтэу Че­реповец щыбэнагъ, джэрзыр къыдихыгъ.

— Мыекъопэ къэралыгъо технологическэ университетым икол­ледж ЖакIэмыкъо Темыркъан щеджэ, — къытиIуагъ Адыгэ Республикэм изаслуженнэ тренерэу, бэнэкIо ныбжьыкIэм итренерэу Беданыкъо Рэмэзанэ. —Сэнаущыгъэ хэлъ, ыгу етыгъэу иIэпэIэсэныгъэ хегъахъо. Къулайныгъэмрэ кIуачIэмрэ зэдиштэхэу ыгъэфедэнхэм фэшI шIыкIэшIухэм алъэхъу.

Спортым хагъэунэфыкIыхэрэ чIыпIэхэр бэнакIохэм къызэрэщыдахыхэрэм дакIоу, шэн-хэбзэ дэгъухэр щыIэныгъэм щызэра­хьанхэм тренер-кIэлэегъаджэхэр пылъых. Кобл Якъубэ ыцIэ зы­хьырэ бэнапIэм Олимпиадэ джэ­гунхэм, дунаим, Европэм, СССР хэгъэгушхоу тиIагъэм дышъэр къащызыхьыгъэхэр щапIугъэх. Тинепэрэ ныбжьыкIэхэм щысэ зытырахыщтхэр яIэх. Адыгэ Рес­публикэм ибыракъ зэнэкъокъу-хэм ащагъэбыбатэзэ щытхъуцIэ­хэр ренэу къыдахынхэу афэтэIо.