«Мэщыкъу» Пятигорск — «Зэкъошныгъ» Мыекъуапэ — 0:1. Бэдзэогъум и 16-м Пятигорскэ щызэIукIагъэх.

«Зэкъошныгъ»: Гиголаев, Кирьян, Катаев, Омаров, Замятин, Ахмедханов, Белов, Делэкъу (Крылов, 75), Къонэ, Мамонов (Макеров, 85), Кадимов (Юрченко, 80). Къэлапчъэм Iэгуаор дэзыдзагъэр Кадимов — 53.

2019 — 2020-рэ илъэс ешIэгъур купэу «Къыблэм» щыра­гъэжьагъ. «Зэкъошныгъэм» иапэ­рэ зэIукIэгъу Пятигорскэ зэрэщыкIуагъэм къыхэдгъэщырэр тиешIакIохэр зэнэкъокъум нахь зэрэфэхьазырхэр ары.

— Къэлапчъэм Iэгуаор дадзэным фэшI тиешIакIохэр чIыпIэшIу итхэу зэп къызэрэхэкIыгъэр, — къытиIуагъ «Зэкъошныгъэм» итренер шъхьаIэу, Адыгэ Респуб­ликэм изаслуженнэ тренерэу Ешыгоо Сэфэрбый. — ЗэгурыIоныгъэ хэлъэу «Зэкъошныгъэр» зэIукIэгъум хэлэжьагъ.

«Зэкъошныгъэр» ыпэкIэ зе­лъым, метрэ 12 фэдизкIэ зыпэ­чыжьэ къэлапчъэм Тофик Ка­ди­мовыр лъэшэу дауи, хъагъэм Iэгуаор ридзагъ. Пчъагъэр 1:0-у зэрэщытым къыхэкIэу «Мэщы­къом» хэтхэр гугъэщтыгъэх ешIэгъур зэфэдэу аухынэу. Арэу щытыгъэми, Адыгеим икомандэ текIоныгъэм фэбанэзэ ухъумэн Iофыгъохэр дэгъоу ыгъэцэкIагъэх. Къэлапчъэм Iэгуаор дадзэн ямурадэу Къонэ Амир, Денис Крыловыр, Ризван Ахмедхановыр, фэшъхьафхэри апэкIэ лъыкIуатэщтыгъэх.

ЕшIэгъухэр

«Черноморец» — СКА — 0:1, «Волгарь» — «Урожай» — 2:0, «Краснодар-3» — «Биолог» — 1:1, «Спартак» Нч — «Анжи» — 1:1, «Махачкала» — «Спартак» Вл — 1:0, «Алания» Вл —«Легион» — 0:1, «Динамо» — «Интер» — 3:0.

«Зэкъошныгъэр» Урысыем и Кубок икъыдэхын хэлажьэ. Апэрэ зэIукIэгъоу иIэщтыр Краснодар щыкIощт, «Урожаим» дешIэщт. Урысыем изэнэкъокъу хэхьэрэ зэIукIэгъур бэдзэогъум и 24-м Мыекъуапэ щыкIощт, «Зэкъошныгъэр» «Махачкала» зыфиIорэм дешIэщт.