Хэгъэгу жъуагъоу мэшIэты
Тилъэпкъэгъухэр зыщыпсэухэрэ хэгъэгоу Израиль ит адыгэ къуаджэу Кфар-Камэ щыкIогъэ фестивалым Адыгэ Республикэм и Къэралыгъо орэдыIо-къэшъокIо ансамблэу «Ислъамыер» хэлэжьагъ.
— Фестивалым урысхэр, арабхэр, джуртхэр, адыгэхэр, фэшъхьаф лъэпкъхэр щызэIукIагъэх, — къеIуатэ «Ислъамыем» ихудожественнэ пащэ игуадзэу, Адыгэ Республикэм инароднэ артистэу Мышъэ Андзаур. – ЧIым шъхьащыIэтыкIыгъэ театральнэ Унэшхом нэбгырэ шъэ пчъагъэ къыщызэрэугъоигъ. ЦIыфхэр ашIогъэшIэгъоным зэфищагъэх.
ХьакIэщ лъыхъугъэхэп
— Концертым тытегущыIэным ыпэкIэ къызэрэшъупэгъокIыгъэхэм, зэхахьэхэм тащыбгъэгъуазэ тшIоигъу.
— Израиль тыкIуагъэу хьакIэщхэм зыкIи тягупшысэрэп. ШэнышIу зэрафэхъугъэу, тилъэпкъэгъухэр къытпэгъокIых. Нэбгыри 2 – 3 тыхъоу Кфар-Камэ щыпсэухэрэ адыгэ унагъохэм тарагъэблагъэ. ЯIофшIэн къагъанэзэ къытпэгъокIых, къыддыщысых, гущыIэгъу тызэфэхъу. КъэшъокIо ансамблэу «Тыпсэ» зыфиIорэр, къоджэ зыгъэIорышIэжьыпIэм ипащэхэр, лъэпкъ шIэжьым пыщагъэхэр агу ихыгъэу къытпэгъокIыгъэх, къытфэуджыгъэх.
— Хэгъэгум икъалэхэм, къуаджэхэм шъуадэхьагъа, тыкъэзыуцухьэрэ дунаим изытет шъуеплъыгъа?
— Тель-Авив тащагъ. Къалэм дахэу щэпсэух, урысыбзэр чIыпIабэмэ ащызэхэохы. Тихэгъэгу икIыгъэхэу бэмэ зыщагъэпсэфы. Шъыхьэм тытесэу сурэтхэр къыттырахыгъэх, адыгэ орэдхэр къыщытIуагъэх, зэлъэпкъэгъухэмкIэ тызэхэтэу джэгоу зэхэтщагъэм тыкъыщышъуагъ. Ащ фэдэ зэIукIэгъум гум икIырэр псэм пыкIэжьызэ зыщыогъэпсэфы. Хэгъэгу зэфэшъхьафхэм тащэпсэуми, зы бзэкIэ тызэдэгущыIэ. Тызыщыщ лъэпкъым гушхоныгъэу фытиIэм хэхъо.
Лъэпкъ фестивалыр
— Фестивалым къешIэкIыгъэ нэрылъэгъу IэпыIэгъухэр, зэIукIэгъухэр къытфэпIуатэхэ тшIоигъу.
— Кфар-Камэ, Рихьание музейхэр адэтых, лъэпкъ тарихъыр, культурэр къащагъэлъагъо. Фестивалым ипэгъокIэу лъэпкъ Iэмэ-псымэхэр, шхыныгъохэр зэIукIапIэм къырахьылIагъэх. Тэри адыгэ къуаеу IофшIапIэу «Матэм» щырахырэр ядгъэлъэгъугъ, фестивалым изэхэщакIохэм, хьакIэхэу нэмыкI хэгъэгухэм къарыкIыгъэхэм яттыгъ. Къуаем идэгъугъэ уасэ къыфашIызэ, зэрэрахырэ шIыкIэм, нэмыкIхэм къакIэупчIагъэх. Адыгэ къуаем икъэбар бэшIагъэу зэхэзыхыгъэхэм таIукIэнэу зэрэхъугъэри тшIогъэшIэгъоныгъ.
— Фестивалым икъызэIухын хабзэм икъулыкъушIэхэр, лъэпкъ зэфэшъхьафхэр зэрэхэлэжьагъэхэр «Ислъамыем» икъэшъуакIохэм къысаIуагъ.
— Урысыем и ЛIыкIо иупчIэжьэгъоу Израиль щыIэр, Иорданием и ЛIыкIоу Израиль щыIэр, фэшъхьафхэри пчыхьэзэхахьэм къыщыгущыIагъэх, къытщытхъугъэх. «Ислъамыем» иIофшIагъэ зытетхэгъэ дискхэр шIухьафтын зыфэтшIыгъэхэм гушIор анэгу къыкIихэу гущыIэ фабэхэр къытфаIуагъэх.
Урысыем ыцIэкIэ
— Андзаур, фестивалым «Ислъамыер» зэрэхэлэжьагъэм тигъэзетеджэхэр къыкIэупчIэх.
— Урысыем и ЛIыкIо иупчIэжьэгъоу Игорь Мартыновым пчыхьэзэхахьэм къыщиIуагъэм тигъэгушхуагъ. Урысые къэралыгъошхом ыцIэкIэ «Ислъамыер» ары фестивалым хэлэжьагъэр. Израиль гъэсэныгъэмкIэ иминистри IупкIэу къэгущыIагъ, «Ислъамыер» дунаим зэрэщашIэрэм иеплъыкIэхэр къыриIолIагъэх. Ансамблэр Урысыем ижъогъо нэфэу зэралъытэрэр къыхагъэщыгъ.
— КъызэрэпIорэмкIэ, «Ислъамыер» Дунэе фестивалэу зыхэлэжьагъэм къэралыгъо екIолIэкIэ ин фашIыгъ.
— IофшIагъэу яIэм укIырыплъы пшIоигъоу къаIуатэрэм уедэIу. Кфар-Камэ и Адыгэ Хасэ итхьаматэу Нэпсэу Зэчэрые Адыгэ Республикэм зэп къызэрэкIуагъэр. Зэхахьэм адыгабзэкIи, джуртыбзэкIи къыщыгущыIагъ. Лъэпкъхэр зэфэзыщэрэ фестивалым инеущрэ мафэ нахьышIу зэрэхъущтым ицыхьэ телъ.
Концертыр
— Фестивалыр сыда нахь гъэшIэгъон къэзышIыгъэр?
— Кфар-Камэ икъэшъокIо ансамблэу «Тыпсэм» зэхахьэр къызэIуихыгъ. Художественнэ пащэу Iапшъэ Рустам Къэбэртэе-Бэлъкъарым къыщыхъугъ. Iоф ышIэнэу къуаджэм зырагъэблагъэм, щыпсэунэу къэнагъ.
— «Ислъамыем» ихудожественнэ пащэу, Урысыем, Адыгеим янароднэ артистэу, композитор цIэрыIоу Нэхэе Аслъан Израиль ис адыгэмэ шIукIэ ашIэ.
— Нэхэе Аслъан къыкIэупчIагъэр бэ, «Ислъамыер» яныбджэгъушIу. Тыркуем, Иорданием, Германием, нэмыкI хэгъэгу укIуагъэми, тилъэпкъэгъухэу тызыIукIэхэрэм Нэхэе Аслъани, тиартистхэу ХъокIо Сусани, Агъыржьэнэкъо Саныети, Лъэцэр Светлани, Къумыкъу Щамсудини, Шъымырзэ Казбеки, нэмыкIхэри ашIэх.
— Нэхэе Аслъан «Ислъамыем» пае зэригъэфэгъэ произведениехэр дунаим щызыгъэжъынчыхэрэ артистхэри цIэрыIо мэхъух.
— Орэдым псэ къыпагъакIэ, тамэ раты. ХъокIо Сусанэ мэкъэ IэтыгъэкIэ орэдэу къыхидзэрэм узыIэпещэ.
— Концертэу къэшъутыгъэм нахь игъэкIотыгъэу къытегущыIэба.
— «Хьагъэуджым изэфакIо» Лъэцэр Светланэ пщынэмкIэ къыхедзэ. Тыгъужъ Асыет — «Сиорэдыр», «Ислъамыем имэкъамэхэр» Нэгъой Азэ къаIох. «Адыифыр» Шъымырзэ Казбек кIырегъэщы. «ХьапакIэм иорэд» Агъыржьэнэкъо Саныетрэ Къумыкъу Щамсудинрэ къызэдаIо. Мышъэ Азэмат пщынэмкIэ адежъыу.
— Орэдхэр къыхэзыдзэхэрэм хорым, оркестрэм ахэтхэр къадежъыух.
— Нурбый, «Ислъамыем» ирепертуар ори ущыгъуаз. ЗэкIэми ацIэхэр къетымыIуагъэми, тафэраз.
— КъэшъуакIохэр къыхэдгъэщыгъэхэп.
— Ахэри фестивалым шIукIэ щашIагъэх. Лъэустэнджэл Рузанэрэ Сихъу Руслъанрэ къашъоу «Ислъамыер» дахэу къашIыгъ, лъэпкъ зэхахьэр зэкIэми къагъэбаигъ.
Зэфэхьысыжьхэр
— Израиль щыщхэр Нэхэе Аслъан, артистхэм телефонкIэ къафытеох, «тхьашъуегъэпсэу» къараIожьы.
— Тыкъызщытхъужьыныр тишэнэп. Сэ Цушъхьэхэм яунагъо сисыгъ, дахэкIэ сыгу къэкIыжьых. Кфар-Камэ чэщдэсхэр, джэгухэр щытиIагъэх. ЗэкIэ къуаджэм дэсхэм адыгабзэр ашIэ, тигуапэу ныдэлъфыбзэкIэ орэдыбэ къафэтIуагъ, тафэуджыгъ. ТизэфыщытыкIэхэр нахь пытэ хъугъэхэу къэдгъэзэжьыгъ. Адыгеим и ЛIышъхьэу КъумпIыл Мурат, Правительствэм тафэраз.
— Лъэпкъ искусствэр тапэкIи лъыжъугъэкIотэнэу шъуфэсэIо.
— Тхьашъуегъэпсэу.
ЕмтIылъ Нурбый. Сурэтхэм арытхэр: «Ислъамыер» фестивалым хэлажьэ.