«Адыгэ макъэм» ипроект
Мы илъэсэу тызхэтыр къызихьагъэм къыщыублагъэу гъэзетэу «Адыгэ макъэм» зы проект пхырищынэу ригъэжьагъ. Ар IофыгъуакIэу «Адыгэ къэIуакIэхэр» зыфиIорэр ары.
Тыкъэзыуцухьэрэ дунаим тет, щытлъэгъурэ пстэуми: псэушъхьэхэм, къэкIыхэрэм ыкIи нэмыкIхэм цIэ гъэнэфагъэу яIэхэр ащ къыщытэтых. Ау ахэр бэрэ тижабзи, нэмыкI лъэныкъохэми зэращытымыгъэфедэрэр дэи. Тиныдэлъфыбзэ тIулъынымкIэ, къыткIэхъухьэхэрэ ныбжьыкIэхэм ар кIэзыгъэнчъэу аIэкIэдгъэхьажьынымкIэ зи пэрыохъу щыIэп.
Тигъэзет а Iофым зыкIыфежьагъэр адыгабзэм иIэшIугъэ икъоу зэхэтшIэным, тIэкIэзыжьхэрэ къэIуакIэхэр тыгу къэдгъэкIыжьынхэм апай. Псэушъхьэхэм ацIэхэмкIэ Iофыр егъэжьагъэ хъугъэ ыкIи ар едзыгъуибл хъоу къыхэтыутыгъах.
Мы IофыгъуакIэр къырахьыжьэнэу зыкIэхъугъэм, тапэкIи ащ илъыгъэкIотэнкIэ гухэлъышIоу яIэхэм нахь игъэкIотыгъэу къытедгъэгущыIагъ гъэзетэу «Адыгэ макъэм» иредактор шъхьаIэу Дэрбэ Тимур.
— Адыгабзэм икъызэтегъэнэн, илъыгъэкIотэн епхыгъэ Iофтхьабзэу республикэм бэ щызэрахьэрэр, — къеIуатэ ащ. – Тигъэзет иIахьышIу ащ хешIыхьэ. Ау адыгабзэкIэ тыкъызэрэдэкIырэ закъом джы тыкъыщымыуцоу, урысыбзэкIэ къэIуагъэхэ гущыIэхэу псэушъхьэхэм, пцэжъыехэм, бзыухэм, къэкIыхэрэм афэгъэхьыгъэхэр зэтыдзэкIыжьынхэу итхъухьагъ. Мы купхэм ауж псэолъэшIыным хахьэхэрэ пкъыгъохэм, джырэ технологиякIэу къежьагъэхэм ащагъэфедэхэрэ гущыIэхэм язэдзэкIын тафежьэщт.
ЗэдзэкIыгъэ ыкIи гущыIалъэ фэдэ къодыеу мыхэр щытхэп. ГущыIэм пае, а псэушъхьэр е бзыур къызхэфэхэрэ рассказхэу, пшысэхэу титхакIохэм атхыгъэхэм пычыгъохэр къахахыхэшъ, рагъэгъусэжьых. Ащ нахь кIэракIи, гъэшIэгъони къешIы, шъхьэми нахь къенэжьы.
Редактор шъхьаIэм къызэриIуагъэмкIэ, илъэситIу, щы горэкIэ мы гущыIэхэм язэдзэкIын Iоф зыдашIэкIэ, ахэр зэхэугъоягъэхэу зыдэхьащтхэ тхылъ къыдагъэкIын гухэлъ щыI.
— Мы Iофым мэхьанэшхо иIэу тэлъытэ, — къыIуагъ Дэрбэ Тимур. — Проектнэ офисым итхьаматэу ЛIыIужъу Адамэ зыIудгъакIи, тхылъэу зигугъу къэтшIырэр зыфэдэщтыр, гухэлъхэу тиIэхэр къыфэтIотагъэх. Проектнэ офисым имылъку къыдыхэлъытагъэу мыщ икъыдэгъэкIынкIэ IэпыIэгъу къытфэхъунэу зыфэдгъэзагъ ыкIи къыддеIэнэу тыкъигъэгугъагъ.
Къыхэзгъэщымэ сшIоигъу мы тхылъыр гущыIэлъэ къодыеу зэрэщымытыщтыр. Ащ электроннэ версие игъусэщт, сурэтхэмкIэ баеу гъэкIэрэкIэгъэщт, мультипликационнэ едзыгъохэр хэтыщтых. Ау шъхьэу иIэщтыр ыкIи нэкIубгъо пчъагъэу зэрэхъущтыр джыри гъэнэфагъэгоп.
Уахътэр къэсэу тхылъыр къызыдэкIыкIэ, кIэлэегъаджэхэмкIи, еджакIохэмкIи, адыгабзэ зэзыгъашIэ, бзэр зышIэу зишIэныгъэ хэзыгъахъо зышIоигъохэмкIи мы тхылъыр IэпыIэгъушIу зэрэхъущтым тицыхьэ телъ.
«Адыгэ макъэм» пхырищырэ IофыгъуакIэу «Адыгэ къэIуакIэхэр» зыфиIорэм нахь фэгъэзагъэу Iоф дэзышIэрэр зэдзэкIынымкIэ отделым иIофышIэу ЛIышэ Саныет. Ащ къызэриIуагъэмкIэ, псэушъхьэхэм ацIэхэр къыхаутыгъах, ащ къэкIыхэрэр лъыпадзагъ.
Гъэзетым рихьыжьэгъэ Iофым тэ тимызакъоу, нэмыкIхэри къыхэлажьэхэмэ тигопэщт. ТызылъымыIэсхэрэ лъэныкъохэу, щыкIагъэхэу гу зылъышъутэхэрэм, зигугъу къэтымышIыгъэхэ къэIуакIэхэм шъхьэихыгъэу шъуакъытегущыIэмэ дэгъу. Мы уахътэм ехъулIэу тисайт къатхыгъэхэ еплъыкIэхэм тагъэгушIуагъ ыкIи тагъэгушхуагъ. Ащ фэдэ Iоф зэредгъэжьагъэр зэрягуапэр, бэшIагъэу зэрэтищыкIэгъагъэр бэмэ хагъэунэфыкIыгъ.
Проектым фэгъэхьыгъэу Инстаграмым (@adygvoice), Фейсбукым (Адыгэ макъ), тиофициальнэ нэкIубгъоу WWW.ADYG-VOICE.RU зыфиIорэм къарыхьэхэрэм, тигъэзет къыщыхэтыутыхэрэм нэIуасэ зафэшъушIымэ, джыри тапэкIэ Iофтхьабзэм шъукъыхэлажьэмэ тигопэщт.
Шъугу къэдгъэкIыжьын адыгабзэм изэгъэшIэнкIэ проектнэ офис гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм къызэрэщызэIуахыгъэр.
Адыгабзэм изэгъэшIэн, ащ икъызэтегъэнэжьын лъэхъаным къызыдихьыгъэхэ зэхъокIыныгъэхэри къыдыхэлъытагъэхэу лъэныкъо пстэумкIи къекIолIэгъэныр проектнэ офисым ипшъэрылъ.
Аужырэ уахътэм тыбзэ зэрэчIэтынэрэм пстэури щыгъуаз. Ар Iофыгъуабэмэ къапкъырэкIы. Ахэм зэу ащыщ тхылъыкIэхэу лъэхъаным диштэхэрэр, егъэджэкIэ-амалыкIэхэу бгъэфедэшъущтхэр зэхэугуфыкIыгъэу зэрэщымыIэхэр, электроннэ шъуашэм ахэр илъхьэгъэнхэ зэрэфаер, унагъохэм Iоф адэшIэгъэныр, нэмыкIыбэри. Мы зэпстэуми Iоф адэзышIэщт купи 7 зэхащагъ. А купхэм ахэхьагъэх шIэныгъэмрэ гъэсэныгъэмрэкIэ, культурэмкIэ министерствэхэм яIофышIэхэр, шIэныгъэлэжьхэр, Адыгэ Хасэм илIыкIохэр, адыгабзэмкIэ кIэлэегъаджэхэр, егъэджэн шIыкIэхэр зэхэзыгъэуцохэрэр.
Iэшъынэ Сусан.