Илъэс тIокI зыныбжь пшъэшъэ IэпэIасэу Тэу Аминэт Теуцожь районым ит къуаджэу Тэуехьаблэ щыщ, ау Хьатыгъу­жъы­­къуае щэпсэу. Ащ мы мафэхэм гущыIэгъу сыфэхъугъ.

Пшъэшъэ ныбжьыкIэр гуфэ­бэныгъэкIэ къыспэгъокIыгъ.

ЕджапIэм джыри чIэсэу ащ хидыкIынэу ригъэжьагъ. МэкIэ-макIэу ыгу фэщагъэ ­хъугъэ. Зыгъэпсэфыгъо уахътэ иIэ зэрэхъоу мыщ кIэрэтIысхьэ.

— ЕджапIэм джыри сычIэ­сызэ хэдыкIыным фэгъэхьыгъэ­хэу егъэджэнхэр скIугъэх. Ахэм яшIуагъэкIэ мы лъэныкъом нахь сыфэщагъэ хъугъэ, — къыт­феIуатэ Аминэт. — Си­шIэныгъэхэм зэрахэзгъэхъуагъэр лъэшэу IэпыIэгъу къыс­фэхъугъ.

Сыд фэдэ сэнэхьати къин гъэнэфагъэхэр хэлъых. Тигущы­Iэгъу къызэриIорэмкIэ, апэрэ IофшIагъэхэр псынкIэу къыдэ­хъугъэхэп. Ау тIэкIу-тIэкIузэ мы лъэныкъом «шъэфэу» хэлъхэр къызIэкIигъэхьагъэх.

— ХэдыкIыным «бэдзэр идэ» ыкIи «адыгэ идагъ» зыфаIорэ шIыкIэхэр щыбгъэфедэнхэ плъэ­кIыщт, — игущыIэ лъегъэкIуатэ Аминэт. — Сэ «бэдзэр идэмкIэ» сэшIых. Сыд фэдизэу уахътэ симыIэми, мафэм зы сыхьат къыхэсымыгъэкIэу, хэдыкIыным сыпэмытIысхьэу хъурэп.

Апэрэ IофшIэнэу тигущыIэгъу ышIыгъэр телефоныр зэры-лъыщт пкъыгъор ары. Ащ джы зе­плъыжьыкIэ хэукъоныгъэу хи­лъагъорэр къыдилъытэзэ, иIэпэIэсэныгъэ хигъэхъоным пылъ.

Къин къыщыхъу зыхъукIэ, хэдыкIыныр ыгъэтIылъыжьыныри ыгу къихьэщтыгъэ, ау ащ зэрэфэщагъэм къыхэкIэу Iуданэхэр къымыштэхэу бэрэ щысын ылъэкIыщтыгъэп. Гум къыхихыгъэ лъэныкъом фэкIонымкIэ пэрыохъу иIэп.

Хьацако Джэнэт. АКъУ-м истудентк.