Урысые Федерацием икIэлэеджакIохэм ягъэмэфэ Спартакиадэ ябгъонэрэу зэхащагъ. КIэух зэIукIэгъухэр самбэмкIэ Чебоксары щыкIуагъэх.

Адыгэ Республикэм самбэмкIэ иеджапIэ зыщызыгъасэхэрэм зэнэкъокъум медали 4 къыщыдахыгъ. ЗэIукIэгъухэм кIэли 4-рэ пшъэшъи 3-рэ ахэлэжьагъэх.

Илъэс 15 – 16 зыныбжьхэм язэ­IукIэгъухэм Кобл Рэмэзан, кг 42-рэ, дышъэр къа­щихьыгъ. Тэ­хъутэмыкъуае ар ще­джэ, тренерхэу Джарымэкъо Рус­тамрэ Нурбыйрэ ипащэх.

Тыгъужъ ТIа­хьир, кг 55-рэ, Пэ­нэжьыкъуае щыщ, тренерхэр Хьакурынэ Дамиррэ Хьабэхъу Адамрэ. БэнакIор Адыгэ республикэ гимназием щеджэ. Нарт шъаом зэIу­кIэгъухэу алырэ­гъум щыриIагъэ­хэм текIоныгъэр къащыдихи, апэрэ чIыпIэр къыфа­гъэшъошагъ.

Хьакъуй Амир, кг 66-рэ, Нэчэрэзые щапIугъ, тренерэу Гъомлэшк Алый ипащ. Ти­бэнакIо джэрзыр къыдихыгъ.

Пшъашъэхэм язэIукIэгъухэм Екатерина Соловьевам, кг 70-м къехъу, ятIонэрэ чIыпIэр къащихьыгъ. Ащ Лъэустэнхьаблэ зыщегъасэ, тренерыр Нэныжъ Байзэт.

— Урысыем ишъолъыр 48-рэ Чебоксары щызэ­нэкъокъугъ, Адыгэ Республикэм икомандэ я 8-рэ чIыпIэр къыдихыгъ, — къытиIуагъ ти­бэнакIохэм пэщэныгъэ адызезыхьагъэхэм ащыщ тренерэу ГуIэтыжь Хъалидэ. — Спартакиадэм изэхэщакIохэм зэфэхьысыжьхэр ашIыгъэх. ЦIыфыбэ зыщып­сэурэ шъолъырхэм, гущыIэм пае, Мос­ква, Ленинград хэкум, нэмыкIхэм афэшъхьафхэу Адыгеир, Сыбыр, Къэбэртэе-Бэлъ­къарыр, нэмыкI шъолъырхэр куп шъхьафым хэты­гъэх, ахэр 15 хъущтыгъэх. Адыгеим икомандэ апэрэ чIыпIэр къыдихыгъ.

— БэнакIохэм, тренерхэм, зэхэщэн IофхэмкIэ IэпыIэгъу къытфэхъугъэхэм тафэраз, — къеIуатэ Адыгэ Респуб­ликэм самбэмкIэ иеджапIэ ипащэу, спортымкIэ дунэе класс зиIэ мастерэу Делэкъо Адам. — Ти­кIа­лэхэм яIэпэIэсэныгъэ хагъахъо, зэнэкъокъу инхэм зафагъэхьазыры.

Сурэтхэм арытхэр: Тыгъужъ ТIахьир, Екатерина Соловьевар, Хьакъуй Амир; Кобл Рэмэзанрэ Джарымэкъо Рустамрэ.