Къэзыгъэзэжьырэр аштэжьы
СпортымкIэ дунэе класс зиIэ мастерэу Илья Александровым икъэлэ гупсэу Мыекъуапэ къыгъэзэжьыгъ.
Европэм иапэрэ спорт джэгунхэу Баку щыкIуагъэхэм Урысыем баскетболымкIэ ихэшыпыкIыгъэ командэу 3х3-м хэтэу Илья Александровым дышъэр къыдихыгъ, дунаим изэнэкъокъу апэрэ чIыпIэр къыщихьыгъ. Хъагъэм Iэгуаор анахьыбэрэ изыдзэхэрэм ащыщ.
— Аужырэ илъэсхэм Ярославль икомандэу «Буревестникым» сыщешIагъ, — къеIуатэ Илья Александровым. — Мыекъуапэ къэзгъэзэжьы сшIоигъоу «Динамо-МГТУ-м» итренер шъхьаIэу Андрей Синельниковым гущыIэгъу сызыфэхъум, псынкIэу тызэзэгъыгъ.
Илья Александровыр Мыекъуапэ щеджагъ, баскетбол ешIэныр тикъалэ щыригъэжьагъ. Спортышхом щызэлъашIагъэу Адыгеим къыгъэзэжьыгъ, игъэхъагъэхэм ахигъэхъонэу фэтэIо.
Сурэтым итыр: баскетболым щыцIэрыIоу Илья Александровыр.