Матвей Мыекъуапэ щыригъэжьагъ
Урысыем футболымкIэ и Союз (РФС) 2018 – 2019-рэ илъэс зэнэкъокъум иешIэкIо анахь дэгъухэр къыхихыгъэх. 
Хэгъэгум футболымкIэ ихэшыпыкIыгъэ командэ икапитанэу, Санкт-Петербург икомандэу «Зенит» иешIакIоу Артем Дзюбэ Урысыем футболымкIэ иешIэкIо анахь дэгъоу ыцIэ къыраIуагъ.
ЕшIэкIо ныбжьыкIэ анахь дэгъоу къыхахыгъэр Матвей Сафоновыр ары. Тигъунэгъу къалэу Краснодар икомандэу «Краснодар» зыфиIорэм икъэлэпчъэIутэу М. Сафоновыр зэрешIэрэм изакъоп ыцIэ къызыкIыхэдгъэщырэр.
— Матвей Сафоновым ятэу Евгений илъэси 4 тикомандэ баскетбол щешIагъ, — къытиIуагъ Мыекъопэ «Динамо-МГТУ-м» итренер шъхьаIэу, Адыгэ Републикэм изаслуженнэ тренерэу Андрей Синельниковым. – А лъэхъаным Матвей сабыигъ. Мыекъуапэ ар къыщыхъугъ. Янэ-ятэхэр тикъалэ къызэкIохэм, ягъусэу ешIэгъухэм яплъыщтыгъ. ГъэшIэгъоныр шъэожъыем Iэгуао ешIэныр ыгу зэрэрихьыщтыгъэр ары.
Футболым нахь пыщагъэу Матвей ылъэ зыщытеуцорэ уахътэм къэлэпчъэIутэу ешIэныр икIэсагъ. «Динамо-МГТУ-м» итренерхэу Андрей Синельниковым, Сергей Золотцевым къызэраIотэжьырэмкIэ, Матвей къэлапчъэм Iутэу Iэгуаор къызэриубытыжьырэм IэпэIэсэныгъэу хэлъыр къыхэщыщтыгъ.
— Къэлапчъэу дгъэунэфыгъэм Матвей Iутэу Iэгуаом гъэшIэгъонэу зылъидзыщтыгъ. Тэри тигуапэу Iэгуаор тштэзэ къэлапчъэм тыдаощтыгъ, — къеIотэжьы щхызэ СССР-м спортымкIэ имастерэу Сергей Золотцевым.
Уахътэр псынкIэу макIо. Матвей исэнаущыгъэ спорт еджапIэм къыщызэIуихыгъ, хэгъэгум икомандэ анахь лъэшхэм ащыщэу «Краснодар» аштагъэу футбол ешIэ. ТичIыпIэгъоу Матвей Сафоновыр илъэс 20-м итэу ешIэкIо анахь дэгъоу хэгъэгум къызэрэщыхахыгъэм фэшI тыфэгушIо, Урысыем ихэшыпыкIыгъэ командэ рагъэблэгъэнышъ, спортышхом цIэрыIо щыхъунэу фэтэIо. Опсэу, Матвей! БэгъашIэ, насыпышIо охъу!
Сурэтым итыр: къэлэпчъэIутэу Матвей Сафоновыр.