«Зэкъошныгъ» Мыекъуапэ — «Динамо» Ставрополь — 2:1. Бэдзэогъум и 7-м ныбджэгъу ешIэгъур республикэ стадионым щыкIуагъ. «Зэкъошныгъ»: Гиголаев (Ковалев, 46), Кирьян, Кравчук (Омаров, 30), Катаев, Замятин, Белов, Делэкъу (Крылов, 75), Ахмедханов, Къонэ, Мамонов, Кадимов (Юрченко, 40). «Зэкъошныгъэм» хэтхэу къэлапчъэм Iэгуаор дэзыдзагъэхэр: Ахмедханов, 43, Крылов, 83.ЕшIэгъур зырагъажьэм «Динамэр» бэрэ ыпэкIэ къилъы­щтыгъ. ТиухъумакIохэр зэгурымыIохэу зэрешIэхэрэр «Динамэм» ыгъэфеди, «Зэкъошныгъэм» икъэлапчъэ Iэгуаор къыдидзагъ. Тренер шъхьаIэу Ешыгоо Сэфэрбый тикомандэ зэхъокIыныгъэхэр фи­шIыгъэх, гупчэм ухъумэн ыкIи зэхэщэн Iофыгъохэр нахьышIоу ешIакIохэм щагъэцакIэхэу ауб­лагъ.

Делэкъо Аскэр метрэ 11 фэдизкIэ къэлапчъэм пэчыжьэу Iэгуаор шъхьэкIэ къызэкIидзэжьыгъ. Ризван Ахмедхановыр Iэгуаом лъычъи, пхъашэу еуагъ. Лъагэу быбырэ Iэгуаор лэгъупкъопсым фэдэу чэрэгъузэ къэлапчъэм икъогъупэ къофагъ – 1:1.

«Зэкъошныгъэр» ыпэкIэ илъыгъэу Делэкъо Аскэр шъхьэкIэ Iэгуаом дахэу еуагъ, ау ти­гъэгушIуагъэп. Къэлэпчъэ бгы­-къум Iэгуаор къыгъэлъэтэжьыгъ.

Денис Крыловыр ешIапIэм къызехьэм, зэнэкъокъум чанэу хэлэжьагъ, къэлапчъэм Iэгуаор дидзэнымкIэ къулайныгъэ къызхигъэфагъ.

Къонэ Амир, Антон Мамоновыр, Ризван Ахмедхановыр, тикъэлэпчъэIутхэр анахь дэгъоу ешIагъэхэм ащыщых. ЯIэпэIэсэныгъэ къагъэлъэгъонымкIэ гуетыныгъэ къызхэзыгъэфагъэхэм тафэраз.

— Бэдзэогъум и 16-м илъэс зэнэкъокъур тыублэщт, Пятигорскэ тыщыIукIэщт чIыпIэ командэу «Мэщыкъом». ЕшIэгъухэм тафэ­хьазыр, футболым пыщагъэхэу къытлъыплъэхэрэр дгъэгушIонхэ тимурад, — къытиIуагъ «Зэкъошныгъэм» итренер шъхьаIэу, Адыгэ Республикэм изаслуженнэ тренерэу Ешыгоо Сэфэрбый.