Сурэтым зыщелъэгъужьы
Новороссийскэ щыпсэурэ Николай Джанян сурэтэу ышIыгъэхэр Мыекъуапэ къыщагъэлъагъох.
Урысыем исурэтышIхэм я Союз, Адыгэ Республикэм культурэмкIэ и Министерст- вэ, республикэм исурэт къэгъэлъэгъуапIэ зэхащэгъэ Iофыгъом зэлъашIэрэ сурэтышIэу Бырсыр Абдулахь къыщыгущыIагъ. Н. Джанян иIэпэIэсэныгъэ уасэу фишIыгъэр щыIэныгъэм дештэ.
Сурэт 90-рэ фэдиз Николай Джанян Мыекъуапэ къыщегъэлъагъо. Къушъхьэм, хым, нэмыкIхэм еплъыкIэу афыриIэр сурэтхэм къащыриIотыкIы шIоигъоу шъо зэфэшъхьафхэр егъэфедэх. Плъыжьым, уцышъом нахь афэщагъэу иIофшIэн егъэпсыми, хэкIыпIэу къыгъотыхэрэм уягупшысэ пшIоигъоу уяплъы.
Хыр къушъхьэ тIуакIэм, нэпкъым дэжь зэращыуалъэрэм, ащ иорхэр зэрэкъабзэхэм, фэшъхьаф сурэтхэм щыIэныгъэм нахь куоу ухащэ. ЦIыфым изыгъэпсэфыгъо уахътэ хым щигъакIо шIоигъо зыхъукIэ, Н. Джанян исурэтхэри нахь зэхэугуфыкIыгъэхэу нэгум къыкIэуцох.
Унагъом щагъэфедэрэ пкъыгъом исурэт икъыхэхын IэшIэхэу къыщыхъурэп, Мафэ къэс плъэгъурэ пIэкIорым е Iанэм ясурэтхэм «уадэгущыIэ» пшIоигъоу уяплъы. Къэгъагъ Iэрамыр шъхьаныгъу-пчъэм ыпашъхьэ щыт, Iанэм пхъэшъхьэ-мышъхьэхэр телъых — ахэри сурэт хэхыгъэх. Нэплъэгъу къызэрыкIом къымыубытырэр сурэтым илъэгъохэщхэм ахэолъагъох.
Ор-орэу уисурэт пшIыныр псынкIа?
Н. Джанян шэнышIу зэрэфэхъугъэу сурэтэу ышIыгъэм зыкъыщигъэлъагъозэ, тыкъэзыуцухьэрэ дунаим изытет лъэплъэ. Сурэтыр, цIыфыр, щыIэныгъэр. Ахэр зэзыпхын зылъэкIырэ гупшысэу къыгъотыгъэр гум къегущыIыкIы.
1975-рэ илъэсым Андрей Тарковскэм ифильмэу «Гъунджэр» Ленинград щыкIорэ фестивалым къыщагъэлъэгъуагъ. Фильмэр къагурымыIоу нэбгырабэ чIэкIыжьыгъэми, Н. Джанян зэфэхьысыжь гъэшIэгъонхэр ышIыгъэх. ЦIыфым игушъхьэ кIуачIэ, дэхагъэм еплъыкIэу афыриIэр гъунджэмкIэ къыIотэн зэрилъэкIыщтым мэхьэнэ ин ритыгъ. Сэнэхьатэу къыхихыгъэр нахьышIоу къыпкъырыхьанымкIэ фильмэр IэпыIэгъу къызэрэфэхъугъэр сурэтышIым щыгъупшэрэп. Сурэтыр гъунджэмкIэ къетэжьыгъ.
Къэгъэлъэгъоныр бэдзэогъум и 17-м нэс Мыекъуапэ щыкIощт.