Хъурмэ Хъусен: «Сэ сыцIыфыгъэу ясIон слъэкIыщт»
УсакIоу, тхакIоу, Адыгэ Республикэм изаслуженнэ журналистэу Хъурмэ Хъусен бэдзэогъум и 7-р къызыхъугъэ маф, илъэс 73-рэ мэхъу. АщкIэ тыгу къыддеIэу псауныгъэкIэ, творческэ гъэхъагъэхэмкIэ тыфэлъаIо.
Хъусенэ лIэшIэгъуныкъом ехъугъэу матхэ: усэ тхылъхэр бэу ыкIи прозэкIэ тхыгъэ романхэу «ШIулъэгъу нэпIэхъ», «Тиурам тыгъэр къыщыкъокIы» (тхылъитIу хъоу) зыфиIохэрэр къыдигъэкIыгъэх. ДраматургиемкIи гъэзагъэу шIукIае шIагъэу Iоф ешIэ, ытхыгъэхэ пьесэхэм ащыщхэу «Пщэ фыжьхэм ядунай», «Гощэмыдэ инысэхэдакI» зыфиIохэрэр Адыгэ Лъэпкъ драмтеатрэм щагъэуцугъэх, цIыфыбэу яплъыгъэхэм ахэр агу рихьыгъэх. Хъусенэ усэкIо-тхэкIо къодыеп, сурэтшIынымкIи IэпэIас, зэкIэ итхылъхэр исурэтхэмкIэ егъэкIэракIэ. Джащ фэдэ къабзэу ыгу етыгъэу 1980-рэ илъэсым къыщегъэжьагъэу лъэпкъ гъэзетэу «Социалистическэ Адыгеим», ащ ыужыIоу «Адыгэ макъ» цIэу зыфашIыгъэм литIофышIэу, отделым ипащэу, редакторым игуадзэу щытыгъ; джы пшъэдэкIыжь зыхьырэ секретарь, щыIэныгъэр дэгъоу изышIыкIыгъэ цIыф чъэпхъыгъ.
Илъэсыбэм адыгэ литературэм хьалэлэу щылэжьэрэ Хъурмэ Хъусенэ упчIэ заулэкIэ зыфэдгъэзагъ.
— Тыдэ къыпфикIыгъа усэныр? Къина ар е псынкIа? ШъуилIакъо хэтыгъэха гупшысэкIо-IорIотакIохэр?
— Адыгэхэм зэраIоу, мы дунаим зы Iоф горэм фэмышIу цIыф къытехъорэпын фае. Сэ сыцIыкIузэ гущыIэм сыкIэдэIукIыныр къыздэсштэгъагъ, сыкъызхэхъухьэгъэ уахътэри къуаджэхэм нахьыжъ лIыжъ Iушыбэр задэсыгъэр ары. КъэсэшIэжьы ахэр пчыхьапэрэ зы чIыпIэ (унэ) щызэрэугъоихэти, чэщныкъо кIасэ нэс зэрэзэхэсыщтыгъэхэр; къэбарыжъхэр, орэдыжъхэр, усэхэр, хъугъэ-шIэгъэ гъэшIэгъонхэр — «Фэрзэпэ заор», нэмыкIхэр ашIэхэу къызэраIуатэщтыгъэхэр, орэдым фэIазэхэу, мэкъэ дахэ зиIэхэри ахэтыгъэх. Ахэм ащыщыгъ сятэкIэ къыспэблэгъэ дэдэу (зэшитIум ябыныгъэх), IорIотэкIо гъэшIэгъонэу, ышIэрэр бэу Хъурмэ Шъэукъар. ТилIакъокIэ Шапсыгъэ тыщыщыгъ, къэкощынэу зэрэхъугъагъэри, тэ, Хъурмэхэм, тятэжъ пIашъэу ШъэубыкIу илъэс 13 фэдиз ыныбжьэу Кавказ заом икIэуххэм адэжь мы чIыпIэхэм къызэрэкIогъагъэр Шъэукъарэ къыIуатэщтыгъэх; етIанэ ар лIы хъуи, лIакъом лъапсэ ыдзыгъ. Тиунэкъощ Шъэукъар тхыдэIуатэр лIыжъ рэхьатэу, ышIэрэр бэу, гулъытэшхо иIагъ. УпчIэжьэгъу бэрэ ашIыщтыгъ, шIэжь дэгъу зэриIэр къапшIэу, джэуапхэр къытыщтыгъэх. Илъэс 92-рэ къыгъэшIагъ. Арышъ, ахэм ыкIи сятэ-сянэхэм къяшIэкIыгъэ дунаим яIэшIупс къыслъыIэсыгъ зыгорэущтэу.
— Апэдэдэ птхыгъагъэр угу къэкIыжьа, илъэс тхьапша уныбжьыгъэр?
— ХьакIэщым щызэхэсхи, еджапIэм тызыщырагъаджи сыгу щызэхэхьагъэу, сэ сшъхьэкIи а зэкIэми сахэтэу, сытIыси тетрадь псэу стхыгъагъэ, ащ дэжьым я 6-рэ классым сисыгъ, сыукIытапэзэ, сыдми гу тесшIыхьи, ар адыгабзэмкIэ тикIэлэегъаджэу КIэрэщэ Къан Айдамыр ыкъом езгъэлъэгъугъагъ. ТхэкIэ шапхъэхэр, къапIомэ пшIоигъор пшIэнхэ зэрэфаехэр, ащ паекIэ къыхаутыгъэхэм уяджэныр зэрищыкIагъэр къысиIогъагъ.
Джащ къыщегъэжьагъэу сыкIоми сычъэми, пчыхьи, пчэдыжьи а тхэн Iофыр къыскIыгъугъ, джащ фэд сурэтшIыныри сыцIыкIу дэдэзэ езгъажьи, сикIасэ хъугъэ. Ау гущыIэм ыкIуачIэ ыкIыIу къызыщыхъурэ уахътэхэри къыхэкIыщтыгъэх. Анахьэу зыпкъ итэу усэныр къызысштагъэр еджапIэм иапшъэрэ классхэм сарыс зэхъур арыми, ифэшъуашэм нэсэу Iоф зыдэсшIэжьэу зезгъэжьагъэр, къыхэсыутынхэу гу зысшIыгъэр дзэм сыкъызекIыжьыр ары.
— Литературэр чъыг дахэм фэд: къутамэхэр — поэзиер, прозэр, драматургиер щызэбгырэкIых. Ахэм ащыщэу о угу нахь зылъызыщэрэр?
— СэркIэ ахэр зэфэдэх. Апэ усэр ары зэрезгъэжьагъэр. Ащ зэ узыпэуцокIэ, шъхьэм мастэ хэлъэу, угупсэфырэп, ренэу зыгорэм уегъапэ, улъэхъу, къэогъоты — жьыкъэщэгъу огъоты; пыодзэжьы, укъитIупщырэпышъ, улъэкIуатэ. Усэныр сэркIэ гуапэ: жъынч-зэпэжъыу макъэу хэIукIырэр сипсыхъо Фарзэ ичъэ псынкIэ фэсэгъадэ, джащ фэд жьыри, псыри — дунаим ыпсэ ахэм зэкIэми ахэлъ. Жанрэхэм афэгъэхьыгъэмэ, зымкIэ къэмыIошъурэр адрэмкIэ къэоIо; жанрэ пэпчъ образ гъэпсынымкIэ шIогъэ гъэнэфагъэ хэлъ, зибэ пшIэрэм укIигъэгъожьырэп.
— Охътэ зэхъокIыныгъэхэр птхыхэрэм сыдэущтэу ащыпхырыпщыхэра?
— ЩыIэкIэ-псэукIэм, ащ ипчэгу ит ЦIыфым, лэжьэкIо Iапшъэ мыпшъыжьэу народым ыкIи къяшIэкIыгъэу хъурэ-шIэрэм ренэу гукIэ сахэт: лъэпкъым иблэкIыгъи, изауи, иIотэжь мафи, хэгъэгушхощтыгъэ СССР-р зэрэзэбгырачыгъи, непэ тызыхэт щыIакIэри усэхэми, сироманхэми, сипьесэхэми темэ шъхьаIэу яIэх, апхырэкIых.
— Узнэмысыгъэу, гур зыкIэмытIасхъэу птхымэ пшIоигъор?
— Бэ егъэжьагъэу сиIэр, ау ренэу сытхэрэп. Ауми, гупшысэр къызыкIорэм — орэчэщныкъу, орэнэфшъагъу, уештэшъ (мы уахътэр ары шапхъэ сфэхъугъэри), гум уимыгъэгупсэфэу бгъэм дэлъыр уфэсакъымэ, уедэхашIэзэ, къыдэбгъэкIын фаеу мэхъу. Ащ дэжьым шхэни, чъыени, нэмыкIи пшIоIофыжь щыIэп, зэкIэошыпыхьэ гупшысэу къэкIуагъэр, етIанэ гум гопэгъур текIыгъэу, икIэрыкIэу зыкъэоштэжьы. Зы мафэп ныIа тызэрэщыIэр? Гузэжъопх псынкIэу уахътэр къытшъхьащыт, зэкIэ къылъытэжьэу, блэбгъэкIырэм узэрэкIэмыхьажьыщтым, нэмыкI къызэрэхъущтым уикъудыеу уиIыгъ. Сымытхыгъэу сшIэмэ сшIоигъуи щыI: тарихъ лъапсэ зиIэ тхылъыр зэкIэми анахьышIу, пфыкIэгъахьэмэ.
— Непэ птхыхэрэр зыфэдэхэр, ахэр анахьэу зыфэгъэхьыгъэхэр?
— Усэхэр сыдигъуи сэтхых. Ау роман е пьесэхэм ауж, нэмыкI гупшысэкIэ-шIыкIэм узхэтыгъэ уж, усэхэм афэгъэзэжьыгъуае мэхъу. Мы аужырэ уахътэм етIупщыгъэу драматургиемкIэ гъэзагъэу сытхагъ, сыгупшысагъ. Пьесэр тхыгъошIоп, ащ зэкIэ гъэлъэшыгъэ-зэгъэпэшыгъэу, геройхэм яшэн-хабзэхэри, хъурэ-шIэрэм зэряхъулIэхэрэри, зэутэкIныгъэу азыфагу илъыри, гумэ ащэчэу акIэхэкIырэри, щэбзэщэ къудыигъэм фэдэу, сюжетри, композициери, зэкъодзэпIэ-егъэжьапIэри, кIэухыри зы гупшысэ-кIапсэкIэ щызэфэмыщагъэхэмэ хъущтэп, гущыIэ пэпчъи ууIучIызэ, а зэкIэр зэбгъэкIуныр ищыкIагъ, ау зэ пIэ къызихьэкIэ, уегупсэфылIэ. Мы илъэсым пьеситIу сыухыжьыгъэ, лакъырдым сыдехьыхы, «Шъофым ит джэнэтыпI» апэрэм сызэреджагъэр, цIыф акъылым, шIыкIэм, IэнатIэм къэмышIэжьынэу тызэрэзэрахъокIырэм ехьылIагъ. ЯтIонэрэр адыгабзэм фэгъэхьыгъ.
Лъэпкъ Iофэу бэ къэуцурэр, пьесэу стхыгъэм янахьыбэр ахэм яхьылIагъ; уцIыфмэ, ущыIэныр зыфэдэр, ущыIэным къикIырэр — узэфэныр, ощ фэдэ цIыфым уфэнэфынэныр; щыIэныгъэр зэкIэ зэрэбэнэ зэпымычыжьыр, узэрэтекIощтым цыхьэ сыдигъуи фыуиIэн зэрэфаер ащыкIэгъэтхъыгъ.
— Джыри зы упчIэ. Унагъор, уигупсэхэр, уипхъорэлъфхэр къыбдеIэха, хьаумэ уагъэохъуа? О пфэдэ ахэта ахэм?
— Тиунагъо нэмыкI унэгъуабэм афэд, хэти фэлъэкIырэр ешIэ, нэхъой илъ. Типшъашъэу Заремэ юрист, бын пасэхэр — зы кIалэрэ пшъэшъитIурэ иIэх. Анахьыжъыр — ТIахьир, илъэс 19 ыныбжь. Мыекъопэ индустриальнэ колледжым ипсэолъэшI факультет истудент, ау футболыр икIэсэ дэдэу, спортым ишъыпкъэу пылъ, Данэ — пшъэшъэ нахьыжъым, медицинэ сэнэхьатыр къыхихыгъ, апэрэ курсыр колледжым къыщиухыгъ. АнахьыкIэу Эланэ я 6-рэ классым ихьагъ. СэркIэ анахь мэхьанэ зиIэр плъэкIырэр афапшIэу, Iорэ-шIэрэ къапымыкIэу, ежь ашъхьэ Iоф ашIэныр; псауныгъэ яIэу, ягухэлъхэр дахэу пхыращынхэр ары.
— Опсэу, Хъусен, уахътэ къыхэпхи тызэрэбгъэгъозагъэмкIэ. Уиилъэсхэр нэфынэнхэу, уигупшысэ чанэу, лъэрыхьэу щытынэу, псауныгъэ пытэ уиIэнэу тыпфэлъаIо ыкIи укъызыхъугъэ мафэмкIэ тыпфэгушIо.
Мамырыкъо Нуриет.