Краснодар краим икъалэу Шытхьалэ (Белореченск) каратэмкIэ зэIухыгъэ зэнэкъокъу щыкIуагъ.

Шъачэ, Новороссийскэ, Краснодар, Апшерон районым, Къырым, Адыгэ Республикэм, нэмыкI­хэм къарыкIыгъэхэр каратэм хэхьэрэ шIыкIэхэмкIэ зэнэкъокъу­гъэх. БэнэкIуи 190-рэ алырэгъум щызэIукIагъ.

Адыгэ Республикэм ихэшыпыкIыгъэ командэ нэбгырэ 29-рэ хэтыгъ. Тренерхэу Владимир Васильченкэм, Армен Норсоян, Гарик Кулигиным, ХьакIэкожъ Муратэ, Абрэдж СултIанэ агъасэхэрэр Адыгэ Республикэм икомандэ фэбэнагъэх.

Назир Христофоровым, Пакъэ Астемир, Эмиль Лысенкэм, Къушъхьэ Самир, Виталий Тарарыкиным, ПакIэ Алихъан, Роберт Мугдесян, Егор Христофоровым, Кирилл Шевченкэм, Таисия Котловам, Мирзадибировым, Виталий Гордеевым, Лъэустэнджэл Амир ябэнэгъухэм щысэшIу къащагъэлъэгъуагъ, текIоныгъэр къащыдахыгъ.

БэнэкIэ зэфэшъхьафхэм апэрэ чIыпIэхэр гъогогъуитIо е нахьыбэрэ къащыдахэу къыхэкIыгъ. Эмиль Лысенкэр, Къушъхьэ Самир, Пакъэ Алихъан, Виталий Тарарыкиныр, Егор Христофоровыр дышъэр къызыфагъэшъошагъэхэм ащыщых. Лъэустэнджэл Амир ыкIи Виталий Гордеевыр Урысыем изэнэкъокъухэм пчъагъэрэ ахэлэжьагъэх, медальхэр къащахьыгъэх.

КIэлэеджакIохэм илъэс еджэгъур аухыгъ, гъэхъагъэу ашIы­гъэр зэфахьысыжьынэу уахътэ яI. Iоныгъо мазэм Урысыем иныбжьыкIэхэм каратэмкIэ язэIукIэгъухэр Анапэ щыкIощтых. Адыгеим ибэнакIохэм зэнэкъокъум зыфагъэхьазыры. Тренерэу Владимир Васильченкэм къызэрэтиIуагъэмкIэ, Адыгэ Республикэм ихэшыпыкIыгъэ командэ медальхэм афэбэнэщт.

Сурэтым итхэр: АР-м икомандэу Шытхьалэ щыбэнагъэр.