IофшIапIэу «Кофе-Фрешым» Мыекъуапэ истадион зэIукIэгъу гъэшIэгъон щызэхищагъ.

Къалэм ищапIэхэм кофе ащызыщэфыхэрэм пхъэдз афырадзи, автомашинэу «Мерседесыр», нэмыкI шIухьафтынхэр афашIыгъэх.

«Мерседесыр» зыфагъэшъошэщтыр къэшIэгъошIугъэп. Зипхъэдз къикIырэр а уахътэм стадионым дэсын, такъикъищым къыкIоцI зэхэщакIохэм къякIолIэнышъ, ипаспорт къаригъэлъэгъун фэягъэ.

Насыпым ныбжь иIэп, ар къы­зыпфэкIощтыр Тхьэм нэмыкI ымышIэу цIыфхэм зэраIорэм шъыпкъагъэ хэлъ. ПхъэдзкIэ «Мерседесыр» зыхьыгъэхэр стадионым дэмысхэу гъогогъуитIо къычIэкIыгъ. Ящэнэрэ пхъэдзыр Мыекъуапэ щыпсэурэ Иван Бобро ыхьыгъ.

Пчыхьэзэхахьэр зезыщэгъэ Мэкъулэ Руслъан къызэриIуагъэу, ащ фэдэ зэIукIэгъухэр тапэкIи зэхащэщтых. IофшIапIэу «Кофе-Фрешым» ипащэу М. Аулъэр И. Бобро фэгушIуагъ, «Мерседесыр» фигъэшъошагъ.

ЗэIукIэгъур мэфэкIышхом фэдэу республикэ стадионым щыкIуагъ, нэбгырэ мин пчъагъэ хэлэжьагъ. Стадионым орэдхэр щыIугъэх, къыщышъуагъэх, щапIэхэм дэгъоу Iоф щашIагъ, цIыфхэм загъэпсэфыгъ. Гугъэм стадионым щызэфищагъэхэм хэбзэ къулыкъушIэхэр, IофшIапIэхэм аIутхэр, еджакIохэр ахэтлъэгъуагъэх.

КъэкIощт зэIукIэгъур нахь гъэшIэгъон зэрэхъущтым тицыхьэ телъ.

— ЗэхэщакIохэм, къысфэгу­шIуагъэхэм лъэшэу сафэраз, — къытиIуагъ «Мерседесыр» зыфагъэшъошэгъэ Иван Бобро машинэм итIысхьаным ыпэкIэ. Кофе уешъоныр дэгъу, насыпыр ащ къыдэкIоныр нахь дэ­гъужь.

Сурэтым итхэр: М. Аулъэмрэ И. Бобромрэ.