Къалэу Шъачэ щыкIогъэ Урысые фольклор фестивалым хэлэжьэгъэ творческэ коллективхэм ащыщэу Адыгэ Республикэм и Мыекъопэ район икIыгъэ «Кубаночкэр» анахь дэгъуищымэ ахэфагъ.

Фестивалыр псэупIэу ПсышIуапэ лъэпкъ культурэм и Гупчэу дэтым щырекIокIыгъ. Аныбжь емылъытыгъэу, нэбгырэ 250-рэ фэдизмэ ащ зыкъыщагъэлъэгъуагъ. КIэлэцIыкIу фольклор ансамблэу «Кубаночкэм» ихудожественнэ пащэу Полина Мокровам илъэс 13-кIэ узэкIэIэбэжьмэ, артист ныбжьыкIэхэу джы къыщагъэхэм илъэсищ, плIы нахьыбэ амыныбжьэу илъэс къэс зэхащэрэ фольклор фестивалэу «Кубанский казачок» зыфиIорэм хэлэжьэнхэу зэрэрагъэ­жьэгъагъэр ыгу къэкIыжьыгъ. Джы ахэм гурыт еджапIэр къаухы.

КъэшъокIо народнэ ансамблэу «Калейдоскопыр» Ставрополь къикIыгъ. Ахэр ящэнэрэу фестивалым изэхэщэкIо шъхьа­Iэу композиторэу Виктор Захарченкэм ышъхьэкIэ къырегъэблагъэх. Кемеровскэ, Белгородскэ хэкухэм къарыкIыгъэ коллективхэм якъэгъэлъэ­гъонхэр гъэшIэгъо­ныгъэх, яплъыхэрэм агу рихьыгъэх.

Урысыем ичIыпIэ зэфэшъхьафхэм къарыкIыгъэ артист ныбжьыкIэхэр зэкIэ фольклор мэфэкIым зэрэхэлэжьагъэхэр ягуап. Ахэм хым ипсыфабэ, Шъачэ идэхагъэ, ныбджэгъукIэу ашIыгъэхэр ащыгъупшэщтхэп.

ТекIоныгъэр къыдэзыхыгъэхэм фестивалым хэлэжьагъэхэр афэгушIуагъэх, гала-концерткIэ ар къаухыгъ.

Ныбэ Анзор.