Лъэпкъ Iофыгъоу «Культурэр» зыфиIорэм иятIонэрэ едзыгъо Ростов-на-Дону щызэхащагъ.

Урысые фестиваль-зэнэкъо­къоу творческэ купхэм яIагъэм Къыблэм, Темыр Кавказым къарыкIыгъэхэр хэлэжьагъэх. Урысыем и Правительствэ, культурэмкIэ и Министерствэ, Урысыем лъэпкъ творчествэмкIэ и Къэралыгъо Унэу В. Д. Поленовым ыцIэ зыхьырэр Iофтхьабзэм кIэщакIо фэхъугъэх.

Творческэ куп 30 фэдиз фестиваль-зэнэкъокъум щызэIукIагъ, ахэр нэбгырэ 600-м къехъущтыгъэх. Астрахань, Волгоград, Ростов хэкухэр, Краснодар ыкIи Ставрополь крайхэр, Къырым, Севастополь, Дагъыстан, Къэ­бэртэе-Бэлъкъарыр, Къэрэщэе- Щэрджэсыр, Адыгеир, нэмыкIхэри хэлэжьагъэх.

Адыгэ Республикэм пэшIорыгъэшъ зэнэкъокъоу щыкIуагъэм текIоныгъэр къыщыдэзыхыгъэхэр Ростов-на-Дону агъэкIуагъэх. Республикэм культурэмкIэ и Министерствэ, Адыгеим лъэпкъ культурэмкIэ и Гупчэ зэфэхьысыжьхэр ашIыхи, дэгъухэм анахь дэгъужьхэр къыхахыгъэх. Фестивалым лъэпкъ культурэмрэ искусствэмрэ ябаиныгъэ къыщызыгъэлъэгъуагъэхэм тагъэгушIуагъ.

Тэхъутэмыкъое районым илъэпкъ къэшъокIо ансамблэу «Адыгэхэр» «Лъэпкъ къашъу» зыфиIорэ зэнэкъокъум лауреат щыхъугъ. Художественнэ пащэр Адыгэ Республикэм культурэмкIэ изаслуженнэ IофышIэу КIэмрыгъо Азэмат.

Москва щыкIощт кIэух фестиваль-зэнэкъокъум «Адыгэхэр» хэлэжьэнхэу зэхэщакIохэм къа­Iуагъ.

Тэхъутэмыкъуае культурэмкIэ и Унэ иансамблэу «Уджыр» «Лъэпкъ орэд» зыфиIорэ зэнэкъо­къум къыщыхагъэщыгъ, апэрэ степень зиIэ дипломыр къыфагъэ­шъошагъ. «Уджым» ихудожественнэ пащэу, Адыгэ Республикэм изаслуженнэ артистэу Къэлэкъу­тэкъо Инвер къызэрэтиIуагъэу, ШъэуапцIэкъо Адам, КIыкI Аскэр, КIыргъ Юр, Темрыкъо Адам илъэ­сыбэ хъугъэу ансамблэм орэд къыщаIо, музыкальнэ Iэмэ-псымэхэмкIэ лъэпкъ мэкъамэхэр агъэ­жъынчых. Тыкъо Рустам, Мышъэ Аслъан ныбжьыкIэх, опыт зиIэхэм акIырэплъых.

«Лъэпкъ культурэр» зыфиIорэ зэнэкъокъум фольклор ансамблэу «Ащэмэзым» апэрэ степень зиIэ дипломыр къыщыфагъэшъошагъ. Адыгэ Республикэм культурэмкIэ изаслуженнэ IофышIэу Бастэ Асыет купым ихудожественнэ пащ.

Беданыкъо Алан, Беданыкъо Жьыут, Шъэукъуй Айдэмыр, Ногмэ Рустам, Тутарыщэ Заур, Сапый Аскэр адыгэ лъэпкъ орэдхэр фестивалым къыщаIуагъэх.

— Бжыхьэм Грознэм щыкIощт фестивалым тыхэлэжьэнэу зытэгъэхьазыры, — къытиIуагъ Бастэ Асыет. — Ростов-на-Дону тызэрэщыIагъэм тигъэгушIуагъ, лъэпкъ ансамблэ гъэшIэгъонхэм тяп­лъыгъ. «Ошъадэм» хэт ныбжьыкIэхэр IэпыIэгъу къызэрэтфэхъугъэхэр къыхэзгъэщы сшIоигъу.

«Лъэпкъ орэдым» изэнэкъокъу Мыекъуапэ иансамблэу «Долинам» ятIонэрэ чIыпIэр къыщыдихыгъ, художественнэ пащэр Нина Ефремова.

Ростов-на-Дону лауреат щыхъу­гъэхэр Москва кIэух концертэу щыкIощтым хэлэжьэщтых. ЗыкIыныгъэм и Мафэ фэгъэхьыгъэ Iофтхьабзэм хэгъэгум ишъолъыр­хэм ятворческэ куп анахь дэгъу­хэр къырагъэблэгъэщтых.

Сурэтхэм арытхэр: ансамблэхэу «Уджыр», «Ащэмэзыр».