ТапэкIи зэлъыкIощтых
«Абхъазым и Кубок» зыфиIорэ зэнэкъокъур дзюдомкIэ къалэу Новый Афон щыкIуагъ. Адыгеим ибэнакIохэм хагъэунэфыкIырэ чIыпIэхэр къыдахыгъэх.
Республикэм дзюдомкIэ испорт еджапIэу Кобл Якъубэ ыцIэ зыхьырэм зыщызыгъасэхэрэр зэнэкъокъум хэлэжьагъэх. Аулъэ Астемир, кг 55-рэ, Ордэн Батыр, кг 73-рэ, апэрэ чIыпIэхэр къыдахыгъэх. Тренерхэр Шъынэхъо Муратрэ Бэгъэдыр Руслъанрэ.
ХьакIэмызэ Амир, кг 60, Хьамыцу Щамил, кг 66-рэ, ПIатIыкъо Заринэ, кг 63-рэ, ятIонэрэ чIыпIэхэр къафагъэшъошагъэх. Тренерхэу Роман Оробцовым, Шъынэхъо Мурат, Бэгъэдыр Руслъан, Мерэм Саидэ бэнакIохэр агъасэх.
Дзыбэ Алый, Эдуард Мирошниковым, Бзэджэжъыкъо Батыр, Шъынэхъо СултIан ящэнэрэ чIыпIэхэр къахьыгъэх. Тренерхэу Роман Оробцовыр, Нэджыкъо Руслъан, Мерэм Саидэ япащэх.
ДзюдомкIэ бэнакIохэм, тренерхэм Абхъазым ичIыпIэ дахэхэр зэрагъэлъэгъугъэх, къош республикэм щыщхэм аIукIагъэх, ящыIакIэ зыщагъэгъозагъ. Купхэр тапэкIи нахьыбэрэ зэрэзэлъыкIощтхэм тегущыIагъэх. Тиспортсменхэм адыгэ быракъыр зэнэкъокъум щагъэбыбэтагъ.
Сурэтым итхэр: Адыгеим щыщхэу зэIукIэгъухэм ахэлэжьагъэхэр.