Адыгэ Республикэм икIэлэеджакIохэм шахматхэмкIэ язэнэкъокъу Мыекъуапэ щыкIуагъ. Мэкъуогъум и 29-м хагъэунэфыкIхэрэ чIыпIэхэр къыдэзыхыгъэхэм шIухьафтынхэр аратыжьыгъэх.

Аныбжьхэм ялъытыгъэу ешIа­кIохэр купищэу гощыгъагъэх. 2006 – 2007-рэ илъэсхэм къэхъугъэхэ пшъашъэхэм язэIукIэгъухэм Мыекъуапэ щыщ Ирина Кабаян апэрэ чIыпIэр къащыдихыгъ, очкоуи 3 къыхьыгъэр. Мыекъопэ районым икIэлэеджакIоу Ксения Шировам ятIонэрэ чIыпIэр фагъэ­шъошагъ, ащи очкоуи 3 къыдихыгъэр. Инэм икIэлэеджакIоу Камила Кондратскаям ящэнэрэ чIыпIэр ыхьыгъ.

2004 – 2005-рэ илъэсхэм къэ­хъугъэхэ пшъашъэхэм исэнаущыгъэкIэ Лъэцэр Джульеттэ къахэщыгъ. Очкоуи 3,5-рэ къыдихи, апэрэ чIыпIэр фагъэшъошагъ. Лъэцэрыр Адыгэкъалэ щыщ. Урысыем изэнэкъокъу хэлажьэ, тренерэу иIэр Лъэцэр Светлан.

Алина Дрожинам очкоуи 2,5-рэ ригъэкъуи, ятIонэрэ чIыпIэр ыхьыгъ. Мыекъопэ пшъашъэу Елена Шаповаловар ящэнэрэ хъугъэ.

2012 – 2013-рэ илъэсхэм къэ­хъугъэхэ пшъашъэхэм язэIукIэгъухэм Софья Гаджимухамедовам очкоуи 4 къащыдихи, апэрэ чIыпIэр фагъэшъошагъ. Зэшыпхъу­хэу Ксения ыкIи Анастасия Мейстерхэм ятIонэрэ, ящэнэрэ чIыпIэхэр къыдахыгъэх. 2012 — 2013-рэ илъэсхэм къэ­хъугъэхэ кIалэхэри гъэшIэгъо­нэу зэнэкъокъугъэх. Мыекъуапэ щыщхэ ешIакIохэм апэрэ чIыпIищыр къыдахыгъ. ХьапэкIэ Батыр очкоуи 4 ригъэкъугъ, Джэндар Щамилэ ятIонэрэ, Тимур Билен ящэнэрэ хъугъэх.

2004 – 2005-рэ илъэсхэм къэ­хъугъэхэ кIалэхэм яешIэгъухэм Мыекъуапэ икIэлэеджакIоу Вячеслав Бариновым очкоуи 4 къащи­хьи, текIоныгъэр къы­дихыгъ. Мыекъуапэ щыпсэурэ Дмитрий Коробкиным очкоуи 2,5-рэ ригъэ­къугъ, ятIонэрэ чIыпIэр, Инэм къикIыгъэ Кирилл Игнатье­вым ящэнэрэ чIыпIэр къыдахы­гъэх.

Зэнэкъокъум исудья шъхьаIэу Евгений Погребноир, Адыгеим испорт иветеранэу Николай Удовиченкэр хагъэунэфыкIхэрэ чIыпIэхэр къыдэзыхыгъэхэм афэгушIуагъэх, шIухьафтынхэр аратыжьыгъэх.

— Тренерхэу Лъэцэр Светланэ, Сергей Сифундэ, Диана Литвиновар, нэмыкIхэри япащэхэу кIэлэеджакIохэм шахмат ешIэнхэм зыфагъасэ, — къытиIуагъ Николай Удовиченкэм. — Респуб­ликэм шахматхэмкIэ иклуб Iоф зыщишIэрэ унэр зэтегъэпсыхьагъ, Къыблэм изэнэкъокъухэр щэкIох. Адыгеим испорт зызэриушъом­б­гъурэр тигуап. КIэлэеджакIохэм язэIукIэгъухэр илъэсым къыкIоцI гъогогъуитIо Мыекъуапэ щэкIох.

Адыгэ Республикэм физкультурэмкIэ ыкIи спортымкIэ и Ко­митет зэIукIэгъухэр зэхещэх. ХагъэунэфыкIхэрэ чIыпIэхэр къы­дэзыхыгъэхэр чъэпыогъу мазэм псэупIэу Лоо (Шъачэ дэжь) Къыблэм изэнэкъокъоу щыкIощтым хэлэжьэщтых.

Сурэтым итхэр: Адыгэ Респуб­ликэм икIэлэеджакIохэм язэ­нэкъокъу хагъэунэфыкIырэ чIы­пIэхэр къыщыдэзыхыгъэхэр.