Дышъэр къетэжьы
Къыблэм исурэтышI цIэрыIоу, зэлъашIэрэ архитекторэу Бырсыр Абдулахь игушIуагъо дэтэгощы.Урысыем исурэтышIхэм я Союз идышъэ медаль Бырсыр Абдулахь къыфагъэшъошагъ. Адыгэ Республикэм культурэмкIэ и Министерствэ, культурэмрэ искусствэмрэ яIофышIэхэм ацIэкIэ республикэм культурэмкIэ и Министерствэ иотдел ипащэу Шэуджэн Бэлэ зэхахьэм къыщыгущыIэзэ зэрэхигъэунэфыкIыгъэу, Адыгеим исурэтышIхэр Урысыем щызэлъашIэх. IофшIагъэу яIэмкIэ тарихъыр къаIуатэ, щыIэныгъэм нахь куоу ухащэ. Б. Шэуджэныр А. Бырсырым фэгушIуи, медалыр ритыжьыгъ.
Бырсыр Абдулахь исурэтхэм лъэхъаныр къаIуатэ, лIэужхэр зэрапхых. Мыекъуапэ дэт мэщытэу дунаим щашIэрэм, ЗыкIыныгъэмрэ ЗэгурыIоныгъэмрэ ясаугъэтэу Къэралыгъо филармонием ыпашъхьэ щытым, нэмыкIхэу тикультурэ къэзыгъэбаигъэхэм яэскизхэр Бырсыр Абдулахь ышIыгъэх. Адыгэ Республикэм и Къэралыгъо шIухьафтын къыфагъэшъошагъ.
Сирием щыкIорэ заом ехьылIэгъэ сурэтыр гум къегущыIыкIы. Къуаджэр машIом зэлъикIугъ, унагъохэм яунэхэр къабгынэх, щагум дэт былымыр зэкIэми ауж къинагъ…
— СиIофшIагъэ уасэ къыфэзышIыгъэхэм, къысфэгушIуагъэхэм гъэзетымкIи «тхьашъуегъэпсэу» ясIожьы сшIоигъу. Искусствэр сищыIэныгъэ щыщ хъугъэ. СиIахьылхэм, синыбджэгъухэм, кIэлэегъаджэу щыIэныгъэм щысиIэхэм гъунэ имыIэу сафэраз, — къытиIуагъ Бырсыр Абдулахь.
Уахътэр псынкIэу зэрэкIорэр сурэтышIым гукIэ елъэгъу, игупшысэхэр тхьапэм регъэкIух. Бырсыр Абдулахь лъэпкъхэм ясурэтышI, архитектор цIэрыIу, лIэужхэр зэрепхых, исурэтхэмкIэ къыддэгущыIэ.
— Зы сурэтым илъэс заулэрэ сегупшысэу къыхэкIы, нэгъэупIэпIэгъум къыкIоцI гум къихьэрэм сызэлъиштэу уахътэ къысэкIу, — зэдэгущыIэгъур лъегъэкIуатэ Бырсыр Абдулахь. — ЩыIэныгъэр, лъэпкъ шIэжьыр сэ сисурэтхэм акупкIых.
Дышъэр къызфагъэшъошэгъэ Бырсыр Абдулахь тыфэгушIо, иIофшIэгъакIэхэм тяжэ. Опсэу, Абдулахь! Тхьэм нарт бэгъашIэ, насыпышIо уешI.
Сахьидэкъо Нурбый.