Урысыем ибзылъфыгъэхэм кушъхьэфэчъэ спор­тымкIэ язэнэкъокъу къалэу Белгород щыкIуагъ.

Адыгэ Республикэм кушъхьэ­фэчъэ спортымкIэ иеджапIэ ипа­щэу Анатолий Лелюк тызэрэщигъэгъозагъэу, спортсменкэхэм ки­лометрэ 30-р къызыщакIугъэ гъогум яIэпэIэсэныгъэ къыща­гъэ­лъэгъуагъ. Тиреспубликэ зыщызыгъэсэрэ Елизавета Ошурковам такъикъ 43.46-кIэ километрэ 30-р къыкIуи, ятIонэрэ чIыпIэр къыфагъэшъошагъ. Тренерэу Алексей Войновыр Е. Ошурковам ипащ.

Иркутскэ щыщэу Анастасия Пляскинам дышъэр фагъэшъошагъ. НэгъэупIэпIэгъу 15-кIэ Е. Ошурковар ащ ыуж къинагъ. Ростов хэкум къикIыгъэ Ксения Добрынинар ящэнэрэ хъугъэ.

Адыгэ Республикэм щапIугъэхэ СтIашъу Мамыр ыкIи Александр Куликовскэм хэгъэгум изэ­нэкъокъу зыфагъэхьазыры. Александр Евтушенкэм ылъакъо хъужьыгъэгоп, джыри еIазэх.

Москва къыщахьыгъэри тыжьын

Хэгъэгум иныбжьыкIэхэм ку­шъхьэфэчъэ спортымкIэ язэIукIэгъухэр Москва испорт псэуа­лъэу «Крылатскэм» щызэхащагъэх.

Тиреспубликэ щыщхэу Анастасия Магилевскаямрэ Кристина Новиковамрэ трекым щыкIогъэ зэIукIэгъум хэлэжьагъэх. Зэнэ­къокъур зэIэпахызэ гъогууанэр къакIугъ. Тренерхэу Алексей Войновым­рэ Анатолий Федотовымрэ агъа­сэхэрэ К. Новиковамрэ А. Маги­левскаямрэ тыжьыныр ­къыдахыгъ.

Бэдзэогъум и 11-м Урысыем икIэлэеджакIохэм я Спартакиадэ Санкт-Петербург щыкIощт. Адыге­им испортсменхэм хэгъэгум изэ­нэкъокъу зыфагъэхьазыры.

Сурэтым итыр: Урысыем ихэ­шыпыкIыгъэ командэ хэтэу Ели­завета Ошурковар.