Адыгэ Республикэм и ЛIышъхьэу КъумпIыл Мурат иунашъо агъэцакIэзэ, республикэм и Къэралы­гъо филармоние итворческэ купхэм шIушIэ концертхэр Мыекъуапэ къыщатых.

Республикэм икъэлэ шъхьаIэ изыгъэпсэфыпIэ парк зэхэхьэ гъэшIэгъонхэр щэкIох. «Ракушка» зыфаIорэм орэдышъохэр щэIух, пчэгум къыщэшъох, оркестрэ­хэмрэ ансамблэхэмрэ концертхэр щызэхащэх.

Филармонием и Къэралыгъо симфоническэ оркестрэ идирижер шъхьаIэу, Адыгэ Республикэм изаслуженнэ артистэу Аркадий Хуснияровым тызэрэщигъэгъозагъэу, концертхэр нахь гъэшIэгъон зэрэхъущтхэм пылъых. Классикэм хэхьэгъэ произве­дениехэр къырагъаIох, Адыгеим икомпозиторхэм атхыгъэхэр цIыф­хэм нахьышIоу ашIэнхэм фэшI зэхахьэхэм ащагъэIух.

Композитор цIэрыIоу Нэхэе Аслъан ыусыгъэ апэрэ адыгэ оперэу «Бзыикъо заом» щыщ едзыгъохэр симфоническэ оркестрэм иконцертхэм бэрэ ащызэхэтэхых. Адыгеим имызакъоу, Темыр Кавказым щызэлъашIэрэ композиторэу Тхьабысым Умар къызыхъугъэр илъэси 100 зэрэ­хъурэр мыгъэ игъэкIотыгъэу хэ­тэгъэунэфыкIы. Симфоническэ оркестрэм иконцертхэм У. Тхьабысымэм ипроизведениехэр ащэIух. Адыгэ Республикэм щапIугъэ­хэу Урысыем культурэмкIэ ыкIи искусствэхэмкIэ иеджапIэхэм ащеджэхэрэр Мыекъуапэ къырагъэблагъэх, симфоническэ оркестрэм, нэмыкI творческэ куп­хэм ягъусэхэу концертхэр къатых.

Республикэм искусствэхэмкIэ икIэлэцIыкIу еджапIэхэм за­щызыгъасэхэрэр филармонием ипчыхьэзэхахьэ зэрэхэлэжьагъэ­хэр шIукIэ тыгу къэтэгъэкIыжьы. Макерэ Мадинэ фестивальхэм, зэнэкъокъухэм щытхъуцIэхэр къащыдихыгъэх. Искусствэр зыщагъэлъэпIэрэ унагъом ар ща­пIу. СкрипкэмкIэ орэдышъохэр зэригъэжъынчыхэрэм уедэIу зы­хъукIэ, сэнаущыгъэ зэрэхэлъыр къыхэогъэщы.

— Адыгэ, урыс композиторхэм аусыгъэхэр сшIогъэшIэгъоных, — къеIуатэ Макерэ Мадинэ. — Синэнэжъи, сяни искусствэм сы­фагъасэ… СикIэлэегъа­джэхэм сафэраз.

Марк Никифоровым валторнэмкIэ, Аулъэ Бибэ фортепианэмкIэ, Анна Чекодэ виолончелымкIэ, Макерэ Мадинэ скрипкэмкIэ произведениехэр къырагъэIуа­гъэх. Симфоническэ оркестрэр ягъусэу яIэпэIэсэныгъэ къызэрагъэлъэгъуагъэм кIэлэеджакIохэр рэгушхох.

— ЗыгъэпсэфыпIэ паркым та­пэкIи концертхэр щызэхэтщэщтых, — тизэдэгущыIэгъу лъе­гъэкIуатэ республикэм и Къэралыгъо филармоние ипэщэ шъхьа­Iэу, Урысыем изаслуженнэ артистэу, Адыгеим, Темыр Осетием — Ала­нием янароднэ артистэу Къулэ Мыхьамэт. — Ис­кусствэмкIэ цIыф­хэм талъэIэсы, язы­гъэпсэфыгъо уахътэ нахьы-шIоу агъэкIонымкIэ амалыкIэхэм талъэхъу.

Мэкъуогъум и 28-м респуб­ликэм и Къэралыгъо филармоние и Къэралыгъо оркестрэу «Русская удалым» шIушIэ концертыр Мыекъуапэ изыгъэпсэфыпIэ парк къыщитыщт. Шы­шъхьэIум и 22-м эстрадэ купэу «Ошъутенэм» и 25-м нысхъапэхэм ятеатрэу «Дышъэ къошыным» якъэгъэлъэгъонхэр паркым щыкIощтых.

Сурэтым итхэр: Макерэ Мадинэ симфоническэ оркестрэм игъусэу филармонием къыщатырэ концертым хэлажьэ.