Гугъэ аримытэу атекIо
Европэм иныбжьыкIэхэм шъхьафит бэнакIэмкIэ язэнэкъокъу Италием щыкIуагъ. Тембот Ахьмэдхъан дышъэр зэIукIэгъухэм къащихьыгъ. 
Адыгэ Республикэм испорт еджапIэу N 2-м Тембот Ахьмэдхъан зыщегъасэ.
Урысыем иныбжьыкIэ хэшыпыкIыгъэ командэ итренер шъхьаIэу Тембот Анзор ыгъэсэрэ Тембот Ахьмэдхъан килограмм 80-м нэс къэзыщэчыхэрэми янэкъокъугъ.
Нарт шъаор зэрэбэнэгъэ шIыкIэр зэхэщакIохэм агъэшIэгъуагъ. Ахьмэдхъан зэIукIэгъухэр къыхьыгъэх. Къебэныхэрэм зы очко нэмыIэми рагъэкъугъэп.
Республикэм испорт еджапIэу N 2-м ипащэу, Урысыем ыкIи Адыгеим язаслуженнэ тренерэу Хъот Юныс къызэрэтиIуагъэу, Тембот Ахьмэдхъан сэнаущыгъэу хэлъыр джыри нахь къызэIуихынымкIэ амалышIухэр иIэх. БэнакIом дунэе зэIукIэгъухэм зафегъэхьазыры.
Адыгэ Республикэм ибыракъ А. Темботым зэнэкъокъухэм лъагэу ащиIэтынэу, имедальхэм ахигъэхъонэу фэтэIо.